ნეით მაკმილანი: თაუნსთან თამაში გოგასთვის კარგი გამოცდა იყო 

გოგა ბითაძეს „ინდიანა პეისერსში“ 14-ქულიანი დებიუტი ჰქონდა. ნამატჩევს მთავარმა მწვრთნელმა ნეით მაკმილანმა ქართველ ცენტრზე ვრცლად ილაპარაკა:

„თავიდან არ ვაპირებდით, რომ 5-7 წუთზე მეტი გვეთამაშებინა ამ შეხვედრაში, რადგან მან ბევრი ჩვენი კომბინაცია არ იცის. თუმცა, ძალიან სასიამოვნო იყო მისი თამაშის ხილვა.

კარლ-ენტონი თაუნსთან ჭიდილი მთლად საუკეთესო ვარიანტი არ არის NBA-ში დებიუტისთვის, თუმცა მინდოდა, რომ სწორედ კარლ-ენტონის წინააღმდეგ მიმეცა გოგასთვის წუთები. თაუნსი ამ ლიგაში ძალიან მაღალი დონის დიდი ბიჭია. გოგას მის მსგავს მაღლებთან არასდროს უთამაშია. თაუნსი კარგად ატარებს ბურთს, კონტაქტში ძალისმიერად შედის, ისვრის პერიმეტრს შიგნიდანაც და გარედანაც. ბუნებრივია, ხარვეზები იყო, თუმცა მე იმით ვარ კმაყოფილი, რომ, ბოლოს და ბოლოს, გოგა პარკეტზე საქმეში ვიხილეთ.

გოგას კარგად შეუძლია სროლა, მშვენიერი მეპასეა. მომთმენი და რაციონალურია პერიმეტრიდან შეტევის დროს. ის კარგად იცავს ფარს. მართალია, დღეს თაუნსმა მასთან ორთაბრძოლისას ჩატენა, თუმცა გოგას არ ეშინია და დაფარებაზე მუდმივად მიდის. 

სეზონის დაწყებამდე ბითაძე კიდევ უფრო უნდა მომჯობინდეს ფიზიკურად, ისწავლოს ჩვენი კომბინაციები, ისწავლოს, თუ როგორია ჩვენი დაცვა. თუმცა, ეს ხომ პირველი თამაში იყო. მას არ აქვს გამოცდილება NBA-ის მაღლებთან თამაშისა. პირველ სათამაშო დღეს დრამონდი და გრიფინი გვყავს მოწინააღმდეგედ, ხომ ხვდებით, რაზეა საუბარი?! პირველ სეზონში ის წუთები, რასაც გოგა მიიღებს, იქნება მისი გაზრდისთვის, იმისათვის, რომ შეეჩვიოს NBA-ში თამაშს.

თუმცა, ვერ ვიტყვით, რომ წინასწარ რამე გადაწყვეტილია. როცა სეზონი დაიწყება, მერე უნდა შევხედოთ ყველაფერს. თუ გოგა სწრაფად გაივლის ადაპტაციას და მზად იქნება თამაშისათვის, წუთებს მიიღებს. ყველა, ვისაც შეეძლება ჩვენი დახმარება, შევა და ითამაშებს. მიგვაჩნია, რომ გოგა არის ახალგაზრდა ბიჭი, რომელსაც აქვს პოტენციალი და ექნება შანსი, რომ ითამაშოს და დაგვეხმაროს.

არა მგონია, დღეს გოგა ნერვიულობდა. უბრალოდ, ცოტა გაკვირვებული იყო იმ ბიჭებით, ვის წინააღმდეგაც თამაშობდა. მისი დებიუტი ისეთი იყო, როგორსაც ველოდი: ცდილობდა გაერკვია, რა და როგორ ხდებოდა. ამასთანავე, უნდა ვთქვათ, რომ მას ძალიან კარგი სამიანი აქვს და დღეს 2-ჯერ ზუსტად ისროლა. გვინდა, რომ მან ეს ყოველთვის გააკეთოს, როცა საშუალება მიეცემა“.

ყოველდღიური სპორტული გაზეთი "ლელო"
498
მკითხველის კომენტარები / 0 /
მსგავსი ამბები
რუბრიკის სხვა სიახლეები
;