ნეიმარი ძილშიც კი წამში თითქმის ერთ ევროს გამოიმუშავებს

Sportsmail-მა ევროპის ტოპკლუბების სახელფასო ბიუჯეტები მიმოიხილა და აღმოაჩინა, რომ ახალ სეზონში "ბებერ კონტინენტს" ახალი ლიდერი ჰყავს - ყველაზე დიდი სახელფასო ფონდი უკვე არა "ბარსელონას", არამედ, "პარი სენ-ჟერმენს" აქვს.

გთავაზობთ ყველაზე მაღალი სახელფასო ბიუჯეტის მქონე კლუბების ტოპ ათეულს:

1. პარი სენ-ჟერმენი (საფრანგეთი)
სახელფასო ბიუჯეტი:
279 მლნ ფუნტი
უდიდესი ხელფასი: ნეიმარი, 537 ათასი ფუნტი* კვირაში

ახალი ლიდერი ერთი ტრანსფერის გამო გვყავს, მაგრამ ამ ტრანსფერმა მსოფლიო ფეხბურთი ლამის თავდაყირა დააყენა - ზაფხულში ნეიმარი 222 მილიონი ევროს სანაცვლოდ "ბარსელონადან" პსჟ-ში გადაბარგდა.

ნეიმარს ხელფასიც მეფური აქვს პარიზში - 537 ათასი გირვანქა სტერლინგი კვირაში! ეს კი ლეო მესის ხელფასს აღემატება. ნეიმარი წამში თითქმის ფუნტს (0,88) გამოიმუშავებს, ძილშიც კი. შესაშური სამსახურია. ნეიმარის ხელფასი წელიწადში 33 მილიონი გირვანქაა.

2. ბარსელონა (ესპანეთი)
ბიუჯეტი: 264 მლნ
უდიდესი ხელფასი: ლიონელ მესი, 500 ათასი

მიუხედავად იმისა, რომ ნეიმარის ხელფასში "ბარსა" დიდ ფულს იხდიდა, კატალონიურმა გრანდმა ბრაზილიელის წასვლით, მხოლოდ პირველი ადგილი დაკარგა.

არავის სჯერა, რომ "ბარსელონა" მეორეობას შეეგუება და, ალბათ, მალე განახორციელებს ისეთ ტრანსფერს, რომ პსჟ-სგან წართმეული პირველი ადგილი დაიბრუნოს. ისიც გასათვალისწინებელია, რომ ახალი ხელშეკრულებით მესი კიდევ უფრო მეტ ხელფასს მიიღებს.

3. მანჩესტერ იუნაიტედი (ინგლისი)
ბიუჯეტი: 264 მლნ
უდიდესი ხელფასი: პოლ პოგბა, 290 ათასი

კლუბი გააფთრებით ცდილობს სერ ალექს ფერგიუსონის დროინდელი დიდების დაბრუნებას და საამისოდ, ჟოზე მოურინიოს კრებულისთვის თანხებს არ იშურებს. ფეხბურთი კომპლექსური სპორტია და ხშირად ძნელია, სწორად გაითვალო ვინ იმსახურებს ყველაზე მაღალ ხელფასს.

4. ჩელსი (ინგლისი)
ბიუჯეტი: 250 მლნ
უდიდესი ხელფასი: ედენ აზარი, 200 ათასი

"ბარსელონას" დარად, შემცირდა "ჩელსის" სახელფასო ბიუჯეტიც. ეს ნაწილობრივ დიეგო კოშტას წასვლამაც გამოიწვია კლუბიდან. თუმცა ისიც სათქმელია, რომ არც ალვარო მორატას დარი ფეხბურთელების დამატება ჯდება იაფი.

5. მანჩესტერ სიტი (ინგლისი)
ბიუჯეტი: 244 მლნ
უდიდესი ხელფასი: სერხიო აგუერო, 220 ათასი

ამ თვის დასაწყისში კლუბმა კიდევ ერთხელ განაცხადა, რომ ყველანაირად გვერდში უდგას პეპ გვარდიოლას პროექტს. კატალონიელის პირველი სეზონისგან განსხვავებით, "სიტი" ხელფასებში 25%-ით მეტს ხარჯავს.

ამ სეზონში კლუბი დატოვა ბევრმა ისეთმა მოთამაშემ, რომელთა ხელფასებიც საკმაოდ დიდი იყო (ხესუს ნავასი, სამირ ნასრი, ჯო ჰარტი და სხვები), თორემ სახელფასო ფონდი კიდევ უფრო გაზრდილი იქნებოდა.

6. რეალი (ესპანეთი)
ბიუჯეტი: 240 მლნ
უდიდესი ხელფასი: კრიშტიანო რონალდო, 365 ათ.

ზინედინ ზიდანისთვის ყველაზე რთული დროებაა ახლა მადრიდულ კლუბში. მორატასა და დანილოს ინგლისში გადაბარგებამ "რეალის" ხარჯები შეამცირა, რადგან ახალწვეულები უფრო ნაკლებ ხელფასზე თამაშობენ "სამეფო კლუბში".

7. ბაიერნი (გერმანია)
ბიუჯეტი: 235 მლნ
უდიდესი ხელფასი: რობერტ ლევანდოვსკი, 160 ათ.

სახელფასო ბიუჯეტი გაიზარდა ხამეს როდრიგესის იჯარის გამო. კლუბში სხვა ახალწვეულებიც სოლიდურ ხელფასს იღებენ.

8. არსენალი (ინგლისი)
ბიუჯეტი: 210 მლნ
უდიდესი ხელფასი: მესუთ იოზილი, 150 ათასი

"მეთოფეების" სახელფასო ბიუჯეტი ალექსანდ ლაკაზეტის მისვლით გაიზარდა. მაგრამ არსენ ვენგერის კრებული იმდენს მაინც არ იღებს ყოველკვირეულად, რამდენსაც იმ კლუბებში იღებენ, რომელსაც "არსენალი" კონკურენტებად მიიჩნევს.

9. ლივერპული (ინგლისი)
ბიუჯეტი: 210 მლნ
უდიდესი ხელფასი: ფილიპე კოუტინიო, 200 ათასი

ინგლისურ ფეხბურთში ყველაფერი სწრაფად იცვლება, ამის ნათელი მაგალითი "ლივერპულის" ჩამოქვეითებაა სიაში. გასულ წელს "ლივერპულის" სახელფასო ბიუჯეტი "სიტის" ბიუჯეტზე დიდი იყო. როცა ფილიპე კოუტინიოც დატოვებს "წითლებს", იუგენ კლოპის გუნდი შეიძლება სულაც გავარდეს ათეულიდან.

10. იუვენტუსი (იტალია)
ბიუჯეტი: 150 მლნ
უდიდესი ხელფასი: გონსალო იგუაინი, 130 ათასი

იტალიური გრანდი ყველა საკითხში პირველია სამშობლოში, მაგრამ ინგლისურ და ესპანურ გრანდებთან ფინანსური ჭიდილი უჭირს. უახლოეს იტალიურ მეტოქეს ("მილანი") კი "იუვე" მაინც ძალიან უსწრებს.

* - შენიშვნა: 1 ბრიტანული ფუნტი 1,12 ევროს უდრის.

ყოველდღიური სპორტული გაზეთი "ლელო"
1460
მკითხველის კომენტარები / 0 /
მსგავსი ამბები
რუბრიკის სხვა სიახლეები
;