ფედერერისა და ნადალის შემდეგ - ბასილაშვილის ახალი ისტორია

ქართველმა ჩოგბურთელმა ნიკოლოზ ბასილაშვილმა კარიერაში პირველად მოიგო პროფესიული ტურის (ATP) ტურნირი და რეიტინგში TOP40-ის წევრი გახდება.

მეოთხედფინალურ ეტაპზე ბასილაშვილმა მსოფლიოს მე-13 ნომერი, ესპანელი ფავორიტი პაბლო კარენიო-ბუსტა ორ სეტში დაამარცხა - 7:6(3), 6:4. შეხვედრა საათი და 48 წუთი მიმდინარეობდა.

პირველ სეტში ბასილაშვილმა პირველივე გეიმში შეასრულა ბრეიკი და კარგა ხანი ინარჩუნებდა უპირატესობას, მაგრამ 5:4-ზე, როცა ქართველი სეტზე აწვდიდა, ესპანელმა მოახერხა საპასუხო ბრეიკის გაკეთება და პარტიის ბედი ტაი-ბრეიკზე გადაწყდა. აქ პირველი მინი-ბრეიკი კარენიო-ბუსტას ჰქონდა, თუმცა, 1:2-ზე ბასილაშვილმა ზედიზედ ოთხი ქულა აიღო და გადამწყვეტი უპირატესობა მოიპოვა. ტაი-ბრეიკი მან დამაჯერებლად - 7:3 მოიგო.

პირველი სეტის მსგავსად, ბასილაშვილმა მეორე სეტის სტარტზე მოახერხა ბრეიკის შესრულება. და ისევ ვერ შეძლო უპირატესობის შენარჩუნება - კარენიო-ბუსტამ მეშვიდე გეიმში შეასრულა უკუბრეიკი. საქმე ისევ ტაი-ბრეიკისკენ მიდიოდა, როცა 5:4-ზე ბასილაშვილმა მიღებაზე სამმაგი მატჩბოლი გამოიმუშავა და პირველივე ცდაზე მიაღწია მიზანს.

ბასილაშვილი წელს პირველად და კარიერაში მეექვსედ გავიდა ATP-ის ტურნირის ნახევარფინალში. ფინალში გასასვლელად ნიკა ჩილელ ნიკოლას ხარის უნდა შეხვედროდა, რომელიც მსოფლიოს კლასიფიკაციაში 69-ე ნომერია. სამხრეთამერიკელმა მეოთხედფინალში ტურნირის პირველი ნომერი, ავსტრიელი დომინიკ ტიმი დაამარცხა. ბასილაშვილი და ხარი 2016 წელს, სავანას "ჩელენჯერში" შეხვდნენ ერთმანეთს და ჩილელმა ორ სეტში - 7:6(4), 6:2 მოიგო.

ხარისთან ნახევარფინალში ბასილაშვილმა საათსა და 36 წუთში სამ სეტში მოიგო - 7:5, 0:6, 6:1.

პირველი სეტი ძალიან დაძაბული გამოვიდა. პარტიის პირველი ნახევარი აშკარად ჩილელის უპირატესობით მიდიოდა - მან მეხუთე გეიმში ბრეიკი შეასრულა და ძალიან ახლოს იყო მოგებასთან: 5:3-ზე სამი სეტბოლი ჰქონდა, მაგრამ ვერ გამოიყენა, 5:4-ზე კი სეტზე ვერ ჩააწოდა. ბასილაშვილმა ჯერ უკუბრეიკი შეასრულა, 6:5-ზე კი 19-გათამაშებიან გეიმში მეოთხე ცდაზე გამოიყენა სეტბოლი და პარტია 7:5 მოიგო. ისე გამოვიდა, რომ ბასილაშვილმა 3:5-დან ზედიზედ ოთხი გეიმი აიღო.

მეორე სეტში ბრძოლა არ ყოფილა - ხარიმ სამი ბრეიკი შეასრულა და 6:0 მოიგო. საჭირო გახდა მესამე სეტის ჩატარება, რომელშიც ბასილაშვილმა თითქმის სრულფასოვანი რევანში აიღო - 6:1 მოიგო.

ფინალში ბასილაშვილს მსოფლიოს 36-ე ჩოგანი, არგენტინელი ლეონარდო მაიერი ელოდა, რომელმაც ორი მატჩბოლი მოიგერია სლოვაკ კოვალიკთან ნახევარფინალში და სამ სეტში მოუგო - 6:7(6), 6:4, 7:6(7).

ჰამბურგის ტურნირი განსაკუთრებულია ლეონარდო მაიერის კარიერაში - მას პროფესიულ ტურში ორი ტურნირი აქვს მოგებული და ორივე გერმანიის ამ ქალაქში: 2014 წელს, ფინალში დავიდ ფერერს მოუგო, შარშან კი გერმანელ მოგვარეს ფლორიან მაიერს.

საერთოდ, ჰამბურგის ტურნირი ერთ-ერთი ყველაზე პრესტიჟულია გრუნტის საფარზე - ათი წელი, ტურნირს "მასტერსის" სტატუსი ჰქონდა და აქ რაფაელ ნადალსა და როჯერ ფედერერს არაერთხელ გაუმარჯვიათ.

ბასილაშვილისთვის ეს მესამე ფინალი იყო კარიერაში. 2016 წელს, ქართველმა კიტცბუელში წააგო იტალიელ პაოლო ლორენცისთან, 2017 წელს კი მემფისში დამარცხდა ამერიკელ რაიან ჰარისონთან. ასე რომ, ეს იყო ATP-ის ტურნირის მოგების მესამე ცდა.

პირველ სეტში ბასილაშვილს ერთადერთი ბრეიკ-პოინტი ჰქონდა - მესამე გეიმში მიიღო ეს შანსი და გამოიყენა. ლეონარდო მაიერს სამჯერ შეეძლო მეტოქის მოწოდების აღება, მაგრამ ქართველმა ყველა საფრთხე მოიგერია და სეტი 51 წუთში მოიგო.

ისევე, როგორც ნახევარფინალში, მეორე სეტი ბასილაშვილმა პირწმინდად დათმო და "მშრალი" ანგარიშით წააგო. საჭირო გახდა მესამე სეტის ჩატარება.

გადამწყვეტ პარტიაში ჩოგბურთელები დამაჯერებლად თამაშობდნენ საკუთარ მოწოდებაზე, განსაკუთრებით ბასილაშვილი, რომელმაც პირველ ხუთ თავის გეიმში მხოლოდ ოთხი ქულა დათმო.

სეტმა კულმინაციას მეათე გეიმში მიაღწია, როცა ქართველმა ორმაგი ბრეიკ-პოინტი მოიპოვა და მეორე ცდაზე შეძლო მეტოქის მოწოდების აღება, რითაც ტიტულზე ჩაწოდების უფლება მიიღო. ბასილაშვილს გაუჭირდა ბოლო გეიმის მოგება - არგენტინელმა ბრეიკ-პოინტი გამოიმუშავა და შეეძლო სეტის ტაი-ბრეიკზე გადაყვანა, მაგრამ ქართველმა თავიდან აიცილა ზედმეტი გართულებები - 2 საათსა და 13 წუთში მოიგო 6:4, 0:6, 7:5.

ამ გამარჯვებით, ბასილაშვილი ორშაბათიდან ATP-ის რეიტინგის TOP40-ში შევა, რაც მის კარიერაში საუკეთესო შედეგია.

ყოველდღიური სპორტული გაზეთი "ლელო"
1691
მკითხველის კომენტარები / 0 /
მსგავსი ამბები
რუბრიკის სხვა სიახლეები
;