ნიკა კვეკვესკირი: არ მსურდა, პირველ რაუნდში ქართულ გუნდთან შეხვედრა

"სამტრედიასა" და "ტობოლის" მატჩამდე ყაზახური კლუბის სათადარიგო მეკარე ვაიჩესლავ კოტლიარი ქართველებზე გველაპარაკა.

"მათ გარეშე "ტობოლი" წარმოუდგენელია. ნიკას მსგავსი აზრიანი, ტექნიკური და გემოვნებიანი ნახევარმცველი ბევრად ძლიერ ლიგაშიც ითამაშებდა, ჯაბა კანკავა კი გუნდის სული და გულია. საერთოდ, მსგავსი მოწესრიგებული მოთამაშეები იშვიათად მინახავს და ამიტომაც დიდ პატივს სცემენ მათ ჩვენთან", - გვითხრა კოტლიარმა.

მატჩმა გამოაჩინა, რომ ყაზახეთის ჩემპიონატის ერთ-ერთ ლიდერ გუნდში ქართველები გამორჩეულები არიან. გუნდს ისინი ათამაშებდნენ და "სამტრედიასთან" ლამის ყველა სახიფათო მომენტი მათი მონაწილეობით შეიქმნა...

ნამატჩევს "ლელომ" კვეკვესკირთან ინტერვიუ ჩაწერა...

- თამაშამდე თქვით, რომ არ გსურდათ, ქართული გუნდის წინააღმდეგ თამაში...

- რა თქმა უნდა, არ მსურდა. შენიანის წინააღმდეგ თამაში ფსიქოლოგიურად რთულია.

- მოულოდნელი იყო, რომ "ტობოლს" 4 დღის შეკრებილ გუნდთან მოგება გაუჭირდა. არადა, თქვენთან ლამის ყველა ფეხბურთელი საკუთარი ქვეყნის ნაკრების წევრია...

- საერთოდ, თამაშამდე გაურკვევლობაში ვიყავით და მწვრთნელმა მართალი თქვა, სიურპრიზებს ველოდით. არ ვიცოდით, რა გუნდი იქნებოდა ახალი "სამტრედია", ვინ ითამაშებდა, რა ტაქტიკას შემოგვთავაზებდა.

თამაშამდე 4 დღით ადრე 8 ტრანსფერი გააკეთეს და ასეთ მოწინააღმდეგესთან დამშვიდებული ვერ ვიქნებოდით. პლუს, იყო გია ცეცაძის ფაქტორიც, რომელიც საქართველოში გამორჩეული მწვრთნელია და ჩვენი კოზირების განეიტრალებას შეეცდებოდა. რა დასამალია და, ეს თითქმის მოახერხა.

- თუმცა ახალშეკრებილ გუნდთან "ტობოლის" სიფრთხილე მაინც გაუგებარი იყო...

- ასე იმიტომ ვითამაშეთ, რომ ეს შეხვედრა "ტობოლისთვის" ძალიან მნიშვნელოვანი იყო. ფსიქოლოგიური ბარიერი გვქონდა. გუნდი წლების წინ "ინტერტოტოს" გათამაშების ერთ-ერთი გამარჯვებული იყო, მაგრამ ევროპის ლიგის პირველი ეტაპი არასოდეს გაუვლია.

ახლა მაქსიმალურ შედეგს და პირველი ეტაპის აუცილებლად გადალახვას ითხოვენ ჩვენგან. ამის გამო ცოტა დაძაბულობა იყო და შებოჭილები ვთამაშობდით. პლუს, ამინდმაც იქონია გავლენა. წამოსვლამდე ყაზახეთში სიგრილე იყო და ამან მოთამაშეებზე ცუდად იმოქმედა.

- ეს საერთო აზრია?

- დიახ, ყველა ფეხბურთელი ამას ამბობდა, რომ ასეთ სიცხეში თამაში ძალიან ძნელი იყო. ყაზახებს კი არა, მე და ჯაბასაც გაგვიჭირდა - ძალიან ცუდად ვიყავით. მგონია, თბილისს გადავეჩვიეთ.

- რის ხარჯზე მოიგეთ?

- ალბათ, მეტოქე ბოლოს გამოცდილების, კლასისა და ინდივიდუალური ოსტატობის ხარჯზე გავტეხეთ. პლუს, გავლენა ჩვენმა უკეთესმა ფიზიკურმა მომზადებამაც იქონია. მეორე ტაიმში ამინდთან, გუნდთან ადაპტირება მოვახერხეთ და ბოლოს ერთი გოლიც გავიტანეთ, რაც ჩვენთვის ძალიან მნიშვნელოვანი იყო.

- საპასუხო შეხვედრასა და შანსებზე არაფერს გკითხავთ. ამიტომ, საქართველოს ნაკრებზეც ვილაპარაკოთ. ეროვნული გუნდის ორი ნახევარმცველი ერთა ლიგაზე ჩვენი მომავალი მეტოქის ჩემპიონატში თამაშობთ, სადაც ყაზახეთის ნაკრების ფეხბურთელთა უმრავლესობა გამოდის. ალბათ, მეტოქე კარგად შეისწავლეთ...

- ეს ჩვენი პლუსია, ყაზახ ფეხბურთელებს რომ ვიცნობთ. მაგრამ "ქაირათში" დიდხანს მუშაობდა ვლადიმირ ვაისი და დარწმუნებული ვარ, მეტოქეს ის ჩვენზე უკეთ იცნობს და ჩვენზე კარგადაც აქვს შესწავლილი მისი სუსტი და ძლიერი მხარეები. დღეს 21-ე საუკუნეა და არანაირი ინფორმაცია დამალული არ არის. დარწმუნებული ვარ, ჩვენი ნაკრები ყაზახებსაც კარგად ჰყავთ შესწავლილი.

- სტანიმირ სტოილოვის გუნდმა ძალიან კარგი შთაბეჭდილება დატოვა - დაახლოებით, ისლანდიის ნაკრების სტილში თამაშობს...

- სტოილოვი ძალიან კარგი სპეციალისტია. მისი დამსახურებაა, "ასტანა" მაღალი დონის გუნდად რომ ჩამოყალიბდა. ნაკრებსაც თანამედროვე, ევროპულ ფეხბურთს ათამაშებს - ფიზიკურად ძლიერები არიან.

ასე რომ, ძალიან საინტერესო თამაშები გველოდება. 6 სექტემბერს, ასტანაში, ჩვენი ნაკრებების მატჩს მოუთმენლად ველით. ერთი სული გვაქვს, ყაზახებს ქართული ფეხბურთი ვაჩვენოთ.

ყოველდღიური სპორტული გაზეთი "ლელო"
416
მკითხველის კომენტარები / 0 /
მსგავსი ამბები
რუბრიკის სხვა სიახლეები