ნიკა კვეკვესკირი: ბიჭებმა ვილაპარაკეთ და შევთანხმდით... ჩვენ ეს ნამდვილად შეგვიძლია...

"არიან უხერხული მეტოქეები, მაგრამ ბალანსი საჩვენოდ უნდა შევცვალოთ"

საქართველოს ეროვნული ნაკრებისთვის ნიკა კვეკვესკირი შეუცვლელ მოთამაშედ იქცა. მინდვრის ცენტრში ის ვლადიმირ ვაისის გუნდისთვის მართლაც ფასდაუდებელ საქმეს აკეთებს: მოწინააღმდეგის იერიშებს ხომ შლის და ჩვენს შეტევებსაც მშვენივრად იწყებს.

კვეკვესკირმა და ჯაბა კანკავამ ცოტა ხნის წინ კონტრაქტები გააგრძელეს ყაზახურ "ტობოლთან". საქართველოს ნაკრების ნახევარმცველთან სასაუბრო სხვაც ბლომად დაგროვდა. თუნდაც, ერთა ლიგის ჯგუფური ეტაპის ფინიში და ევროპის ჩემპიონატის შესარჩევი ციკლის წილისყრა. ჩვენი საუბარი სწორედ დუბლინური წილისყრის შედეგების განსჯით დავიწყეთ...

- რა თქმა უნდა, მძიმე ჯგუფია, მაგრამ პირადად მე წილისყრას ასე ვუყურებ: რომელი გუნდიც უნდა იყოს, ყველასთან შეიძლება თამაში და გამარჯვება. ჩვენ ეს ნამდვილად შეგვიძლია იმ პროგრესის ფონზე, რომელიც ნამდვილად გვაქვს. გასაგებია, რომ არიან უხერხული მეტოქეები, მაგრამ ბალანსი საჩვენოდ უნდა შევცვალოთ.

ბიჭებს უკვე გვქონდა კონტაქტი ერთმანეთში და საფუძვლიანადაც განვიხილეთ ჯგუფის რაობა, შევთანხმდით კიდეც - ბრძოლა შეიძლება ყველასთან! თანაბარი ჯგუფია, სადაც არაერთი ქულა დაიკარგება. განსაკუთრებით იმედიანად ვუყურებ საშინაო თამაშებს. სავსე "დინამო არენაზე" ყველა მოწინააღმდეგეს ძალიან გაუჭირდება. იმედი მაქვს, ამ შეხვედრებში საქართველოს ნაკრები ოპტიმალური შემადგენლობით ითამაშებს. ბოლოს და ბოლოს მორჩება ეს ტრავმების ეპიდემია!..

- როგორ აფასებთ ნაკრების თამაშს ერთა ლიგის ჯგუფურ ეტაპზე?

- მხოლოდ დადებითად! საქართველოს ნაკრებმა ითამაშა სანახაობრივი და ამავე დროს პრაგმატული, შედეგზე ორიენტირებული ფეხბურთი. ერთადერთი გამონაკლისი იყო ანდორასთან გასვლითი მატჩი. მაგრამ იქ იყო რამდენიმე ფაქტორის ერთობლიობა, რომელსაც უკვე გაესვა ხაზი. საქართველოს ნაკრები მნიშვნელოვნად გაიზარდა. ამის თქმა გადაჭარბების გარეშე შემიძლია.

- რას იტყვით ერთა ლიგის პლეი ოფში ჩვენს მეტოქე ბელარუსის ნაკრებზე?

- იქამდე ჯერ შორია, მაგრამ ზოგადი შეფასების გაკეთება უკვე შესაძლებელია. ჩვენთვის დიდი პლუსია ის, რომ შინ ვთამაშობთ. საქართველოს ნაკრები მთელი ჯგუფური ტურნირის მსვლელობისას სწორედ ამისთვის იბრძოდა და კარგია, რომ მიზანს მივაღწიეთ. ახლა ისეთი დროა, მაღალ დონეზე ერთი კონკრეტული თამაშის ჩატარება ყველა ნაკრებს შეუძლია, მაგრამ მჯერა, ჩვენ შევძლებთ ამ ბარიერის გადალახვას.

- როგორი გამოდგა "ტობოლისთვის" ახლახან დასრულებული სეზონი?

- ჩვენი მიზანი იყო ყაზახეთის ჩემპიონატში მესამე ადგილზე გასვლა და ეს შევძელით. მიზანი მიღწეულია და სეზონიც დადებითად შეფასდა. დასრულებულ სეზონში "ტობოლი" არ იყო იმ დონეზე, რომ "ასტანასა" და "ქაირათისთვის" გაეწია კონკურენცია. 8 წელი ისე გავიდა, გუნდს მედლები არ აუღია და აგერ, ნავსი გატყდა. მომავალ სეზონში ჩვენ ევროპა ლიგის საკვალიფიკაციო ეტაპზე ვითამაშებთ. კლუბში ჩაიდო სოლიდური ინვესტიციები, მოვიდნენ ძლიერი ფეხბურთელები... აქედან გამომდინარე, ვეცდებით, ჩვენი სიტყვა ვთქვათ ევროთასებზე.

- ცოტა ხნის წინ ჯაბა კანკავასთან ერთად კონტრაქტი გაახანგრძლივეთ "ტობოლთან". გვქონდა მოლოდინი, რომ კარიერას უფრო ძლიერ ევროპულ კლუბში გააგრძელებდით...

- არ მიმაჩნია, რომ ყაზახეთის ჩემპიონატი სუსტია, უფრო პირიქით და ჩემს ამ მოსაზრებას ამტკიცებს ევროთასებზე "ასტანას" ასპარეზობა. სიმართლე გითხრათ, არ იყო ევროპიდან ისეთი შეთავაზება, რომ ხაზი გადამესვა ყველაფრისთვის და წავსულიყავი გუნდიდან, სადაც ვითვლები ერთ-ერთ ლიდერად და მაქვს დიდი ნდობა. ამასთან, მნიშვნელოვანი მომენტი იყო ისიც, რომ საქართველოს ნაკრებში გვიწევს ძალიან მნიშვნელოვანი თამაშები და ჩავთვალე, რომ არ იყო დრო ახალი ექსპერიმენტებისა და ახალი თავგადასავლების საძიებლად.

ყოველდღიური სპორტული გაზეთი "ლელო"
973
მკითხველის კომენტარები / 0 /
მსგავსი ამბები
რუბრიკის სხვა სიახლეები