ნიკა კვეკვესკირი: ტობოლის ხელმძღვანელობას ვთხოვ, ნაკრებში გამიშვას...

2 თებერვალს საქართველოსა და აზერბაიჯანის ეროვნული გუნდები თურქულ ანთალიაში ამხანაგურ მატჩს გამართავენ. მეზობელი ქვეყნის მედიაში ამ ფაქტს დიდი გამოხმაურება მოჰყვა.

"აზერიფუტბოლმა" ჯერ საქართველოს ნაკრების მწვრთნელ ვლადიმირ ვაისთან ჩაწერა ინტერვიუ, ხოლო შემდეგ ეროვნული გუნდისა და ყაზახური "ტობოლის" ნახევარმცველ ნიკა კვეკვესკირსაც გაესაუბრა. 25 წლის კვეკვესკირს აზერბაიჯანელები კარგად იცნობენ. ის ჯერ ბაქოს "ინტერში" თამაშობდა წარმატებით, მერე კი "გაბალას" ერთ-ერთი ლიდერიც იყო...

მოკლედ, გადავიდეთ კვეკვესკირის ინტერვიუზე, ხოლო შემდეგ აზერბაიჯანის ნაკრების მთავარი მწვრთნელის გურბან გურბანოვის ნააზრევსაც შემოგთავაზებთ...

- აზერბაიჯანისა და საქართველოს ნაკრებები ერთმანეთს ამხანაგურ მატჩში შეხვდებიან. თქვენ ისევ მოგეცემათ საშუალება, მინდორზე ნახოთ ყოფილი თანაგუნდელები, ის ფეხბურთელები, რომელთაც კარგად იცნობთ აზერბაიჯანის ჩემპიონატიდან...

- როცა შევიტყვე ეს ამბავი, ძალიან გავიხარე. ყოველთვის საინტერესოა აზერბაიჯანის ნაკრების წინააღმდეგ თამაში. თქვენი ქვეყანა ჩემთვის მშობლიურივით გახდა. იქ ბევრი მეგობარი მყავს. ვიცნობ თითქმის ყველა ფეხბურთელს, რომელიც თამაშობს აზერბაიჯანის ჩემპიონატში. ძალიან მინდა, მათ ისევ შევხვდე მინდორზე.

- ეს მატჩი არ ემთხვევა უეფას "ფანჯარას". აქედან გამომდინარე, კლუბებს შეუძლიათ, ფეხბურთელები სანაკრებოდ არცკი გაათავისუფლონ. "ტობოლი" ხომ არ შეგიქმნით ანალოგიურ პრობლემას?

- კარგ თემას შეეხეთ. სამწუხაროდ, ამ შეხვედრაში ჩემი მონაწილეობა არ იქნება დამოკიდებული არც ჩემზე და არც საქართველოს ფეხბურთის ფედერაციაზე. ეს სწორედ "ტობოლის" გადასაწყვეტია.

თამაში 2 თებერვალსაა და გუნდს აქვს უფლება, ნაკრებში არ გამიშვას. ამ დროს შეკრება გვექნება. რა თქმა უნდა, მე ვთხოვ კლუბის ხელმძღვანელობას, რომ ნაკრებში გამიშვან და იმედი მაქვს, ისინი გაგებით მოეკიდებიან ჩემს თხოვნას.

- რას მისცემს ეს თამაში ორივე ნაკრებს?

- თუ არ ვცდები, საქართველოსთან მატჩი სადებიუტო იქნება აზერბაიჯანის ნაკრების მწვრთნელის, გურბან გურბანოვისთვის. ეს ფეხბურთელებისთვის განსაკუთრებული მოტივაცია იქნება. ისინი შეეცდებიან, დაუმტკიცონ ახალ მწვრთნელს, რომ იმსახურებენ ეროვნულ გუნდში თამაშს...

რაც შეეხება ჩვენს ნაკრებს, ალბათ, ძირითადი შემადგენლობით ვერ ვითამაშებთ, რადგან ბევრი ლეგიონერი გვყავს. ნებისმიერ შემთხვევაში, აზერბაიჯანთან შეხვედრა ჩვენთვის ძალიან სასარგებლო იქნება ერთა ლიგისთვის მოსამზადებლად.

- გურბანოვი ახსენეთ. როგორ შეხვდით აზერბაიჯანის ნაკრების მთავარი მწვრთნელის პოსტზე მის დანიშვნას?

- ფაქტია, ის აზერბაიჯანის საუკეთესო მწვრთნელია, აქვს თამაშის საკუთარი სტილი და დაფასება გულშემატკივრებს შორის, მედიაში... მე მას ვუსურვებ წარმატებას ახალ თანამდებობაზე, ოღონდ, არა ჩვენთან შეხვედრებში...

- როგორ აფასებთ ერთა ლიგაში საქართველოსა და აზერბაიჯანის შანსებს და რომელ ნაკრებს თვლით ტურნირის ფავორიტად?

- ეს იქნება ძალიან სპეციფიკური ტურნირი. ძნელია, ფავორიტი დაასახელო. ყველას აქვს კარგი შანსი და ყველა ნაკრები ბოლომდე იბრძოლებს. იმედი მაქვს, 2 თებერვლის შემდეგ საქართველოსა და აზერბაიჯანის ნაკრებები ერთმანეთს ერთა ლიგის ფინალშიც შეხვდებიან.

ბადავი ჰუსეინოვი:  საქართველო ერთა ლიგაში ერთ-ერთი  ფავორიტი  იქნება!

საქართველოსთან მატჩის თაობაზე "აზერისპორტთან" კომენტარი გააკეთა "ყარაბაღისა" და აზერბაიჯანის ნაკრების ერთ-ერთმა ლიდერმა ბადავი ჰუსეინოვმა.

"საქართველოს ნაკრები ძალიან კარგი გუნდია და ერთა ლიგაზე ერთ-ერთი ფავორიტიც იქნება. დარწმუნებული ვარ, თამაში ძალიან საინტერესო გამოვა. რაც შეეხება ჩვენს ცენტრალურ დაცვას, რა თქმა უნდა, ძალიან რთული იქნება რაშად სადიგოვის შეცვლა, მაგრამ არიან ფეხბურთელები, რომლებიც კარგად თამაშობენ. განსაკუთრებით მინდა გამოვყო ჩემი თანაკლუბელი ელვინ იუნუსზადე".

გურბან გურბანოვი არ მინდა პრობლემატური ფეხბურთელები

დაბოლოს, ინტერვიუ აზერბაიჯანის ნაკრების ახალ მთავარ მწვრთნელ გურბან გურბანოვთან. საქართველოს ნაკრების უახლოესი მეტოქის თავკაცი არაერთ საინტერესო საკითხზე ლაპარაკობს. ჩვენ მხოლოდ ინტერვიუს იმ ნაწილს შემოგთავაზებთ, რომელიც აზერბაიჯანის ნაკრებს ეხება...

- უნდა ველოდოთ თუ არა ეროვნულ გუნდში რაუფ ალიევის, ილგარ გურბანოვისა და რუფატ დადაშევის დაბრუნებას? ამ ფეხბურთელებს დიდი ხნის განმავლობაში არ ეძლეოდათ ნაკრებში თავის გამოჩენის შანსი...

- ეს ჯერ არ გადაგვიწყვეტია. ვიცნობთ ამ ფეხბურთელებს და მიახლოებით მაინც ვიცით ის პოტენციალი, რომელიც მათ აქვთ. მაგალითად, მე ვიცი რაუფის დიდი პოტენციალის შესახებ. ეს ნაკრებია და ყველას განსაკუთრებული პასუხისმგებლობა გვეკისრება.

შეიძლება, პირველი შეკრების შემდეგ იყოს გარკვეული სიახლეები. ვისაც ამ შეკრებაზე არ მივიწვევთ, არ უნდა იფიქროს, თითქოს, მათთვის ნაკრების კარი დახურულია. ბაქო პატარა ქალაქია. ჩვენ ვიცით, როგორ ცხოვრობენ ფეხბურთელები, როგორია მათი ინტერესები და ასე შემდეგ...

ნაკრებში იქნებიან მხოლოდ ისინი, ვინც ცხოვრობს ფეხბურთით, სუნთქავს ფეხბურთით და მისდევს ცხოვრების ჯანსაღ წესს. მირჩევნია, ცოტა სუსტი იყოს მოთამაშე, ოღონდ, სწორედ ისეთი იყოს, როგორიც გვსურს. არ მინდა, ნაკრებში იყვნენ ისეთი ფეხბურთელები, ვისგანაც შეიძლება პრობლემებს ველოდოთ.

- ქამრან აგაევზე მიანიშნებთ?

-არა, რატომ?.. მე საერთოდ ვამბობ. ხანდახან ფეხბურთელები პრესასთან საუბრისას პატრიოტის შთაბეჭდილებას ტოვებენ, მაგრამ ყოველთვის ასე როდია...

ყოველდღიური სპორტული გაზეთი "ლელო"
1793
მკითხველის კომენტარები / 0 /
მსგავსი ამბები
რუბრიკის სხვა სიახლეები
;