ნიკა ტოგონიძე: 0:0 იტალიასთან, ბაჯო თბილისში [VIDEO]

საქართველოს ნაკრებს რამდენჯერმე უთამაშია იტალიასთან და თამამად შეიძლება ითქვას, რომ ყველა ეს შეხვედრა დასამახსოვრებელია ჩვენთვის. ის კი არა, აპენინელებთან ახალგაზრდული ნაკრების დონეზეც გვქონდა გამორჩეული მატჩი, როცა ჯიჯი ბუფონს ლევან ქებაძემ და გიორგი კიკნაძემ გაუტანეს გოლები რუსთავულ შეხლაში. 

საქართველო
0
იტალია
0
10 სექტემბერი, 1997
ფიფა 1998 - შესარჩევი მატჩი.
თბილისი, ბორის პაიჭაძის სახელობის ეროვნული სტადიონი.
55000 მაყურებელი
საქართველო: ნიკა ტოგონიძე, გელა შეყილაძე, კახი ცხადაძე (კაპ) (კახი კალაძე 13), მურთაზ შელია, გიორგი ჩიხრაძე, ლევან კობიაშვილი, არჩილ არველაძე (გიორგი დარასელია 79), თემურ ქეცბაია, გიორგი ქინქლაძე (კახი გოგიჩაიშვილი 65), შოთა არველაძე, მიხეილ ყაველაშვილი
მწვრთნელი: დავით ყიფიანი
იტალია: ანჯელო პერუცი, ალესანდრო ნესტა, ჩირო ფერარა, ფაბიო კანავარო, პაოლო მალდინი (კაპ), ანჯელო დი ლივიო, ატილიო ლომბარდო (რობერტო ბაჯო 73), რობერტო დი მატეო, დინო ბაჯო, კრისტიან ვიერი (პიერლუიჯი კაზირაგი 64), ჯანფრანკო ძოლა (ფილიპო ინძაგი 80)
მწვრთნელი: ჩეზარე მალდინი
გაფრთხილება: გელა შეყილაძე, არჩილ არველაძე, რობერტო დი მატეო, ფაბიო კანავარო
მსაჯები: რუნე პედერსენი; ტორე ალანდი, ოლა ბიერსენი (ნორვეგია)

 და მაინც, ჩვენს მახსოვრონაში არასოდეს წაიშლება 1997 წლის 10 სექტემბერს თბილისში გამართული დუელი, როცა მართლაც რომ უძლიერესი შემადგენლობით მოასპარეზე "სკუადრა აძურას" საქართველოს ნაკრებმა არაფერი დაუთმო და ის შეხვედრა ფრედ, 0:0 დასრულდა.

სწორედ ამ შეხვედრის შემდეგ გაირკვა, რომ იტალიის ნაკრებს მსოფლიოს 1998 წლის ჩემპიონატზე მოსახვედრად პლეი - ოფის თამაში დასჭირდებოდა. რა გვახსოვს იმ თამაშიდან?

ის, რომ კახა კალაძე ტრავმირებული კახა ცხადაძის ნაცვლად შევიდა მინდორზე და იმ დროისათვის მსოფლიოს ერთ-ერთ საუკეთესო ფორვარდს, კრისტიან ვიერის ფეხი არ გაანძრევინა. და კიდევ, ლომივით მოთამაშე ქართველთა კარის დარაჯი ნიკა ტოგონიძე, ვისაც ვთხოვეთ კიდეც იმ შეხვედრის დეტალების გახსენება.

"თამაშამდე ზუსტად ვიცოდით, რა დონის და გაქანების გუნდთან მოგვიწევდა საქმის დაჭერა. ამას ხანდახან მხოლოდ დითირამბად და გადაჭარბებით ამბობენ, მაგრამ იმ იტალიის ნაკრებში მართკლა ყველა ვარსკვლავი იყო.

საქართველოს ნაკრებს აღარ ჰქონდა მსოფლიოს ჩემპიონატზე გასვლის შანსი. იტალია და ინგლისი კი გააფთრებით იბრძოდნენ ჯგუფში პირველი ადგილისათვის, რათა თავიდან აერიდებინათ მსოფლიო ჩემპიონატის პლეი - ოფის თამაში და პირდაპირ გამგზავრებულიყვნენ მუნდიალზე.

როცა იმ შეხვედრაზე ვსაუბრობთ, არ უნდა დაგვავიწყდეს, რა მდგომარეობა იყო მაშინ ქვეყანაში. იტალიელებს შუქი მხოლოდ სასტუმროში და "დინამოს" სტადიონზე დახვდათ, ქართულ გზებზე კი საბურავები იწვოდა, ასე თბებოდა ხალხი.

შეიძლება, რთული დასაჯერებელია, მაგრამ ეს უდიდეს მოტივაციას გვაძლევდა. რა თქმა უნდა, იტალიის ნაკრებთან ვერ მივიდოდით, მაგრამ ჩვენც გვყავდა ჩვენი ვარსკვლავები და თუ სტაბილურობა გვაკლდა, სამაგიეროდ ერთ კონკრეტულ შეხვედრაში ნებისმიერის გამწარება შეგვეძლო.

     ⇒გიორგი ნემსაძე: ასე დავამარცხეთ ბულგარეთი... [VIDEO]

გამოვედით სტადიონზე და უამრავი ქართველის არნახული მხარდაჭერა ვიგრძენით. ამან მართლაც რომ ფრთები შეგვასხა და კიდევ უფრო განგვიმტკიცა ჩვენი ძალების რწმენა. იტალიას მხოლოდ მოგება სჭირდებოდა თბილისში. თამაში ძალიან ყოჩაღად დაიწყეს და ძოლამ ჩემი კარის ძელს გაარტყა ბურთი.

კახა ცხადაძე მალევე დაშავდა, ჩვენი გუნდის კაპიტანი და შეუცვლელი ფეხბურთელი. ცხადაძისა და შელიას ტანდემი პირადად ჩემი აზრით ერთ-ერთი საუკეთესო იყო ზოგადად ქართული ფეხბურთის ისტორიაში.

ცხონებული დავით ყიფიანი რისკს არასოდეს ერიდებოდა და მის ნაცვლად მინდორზე კახა კალაძე შეუშვა. მანამდე კახას საქართველოს ნაკრებში მეტწილად ამხანაგური შეხვედრები ჰქონდა ჩატარებული. ერთ-ერთ პირველ ოფიციალურ თამაშში კი მართლაც რომ დიდებულად ითამაშა.

ფეხი არ გაანძრევინა იტალიელ ფორვარდება. მეტადრე, კრისტიან ვიერის, ვინც მაშინ არნახულ ფორმაში იყო. ალბათ, ამად თუ იყო, რომ იტალელთა სამწვრთნელო შტაბმა ვიერი თამაშის დასრულებამდე დაახლოებით ნახევარი საათით ადრე შეცვალა.

პირველ ტაიმში რამდენიმე მომენტი ჩვენც გვქონდა. მეორე ნახევარში იტალია მაგრად მოგვაწვა, მაგრამ ერთად დგომით შევძელით სასურველი შედეგის შენარჩუნება. საკუთარ თავზე ძალიან არ მიყვარს საუბარი, მაგრამ რადგან მკითხეთ, გეტყვით. რამდენიმე მართლაც რომ რთული ბურთი ავიღე.

არ გავატანინე ვიერის, დინო ბაჯოს, ფილიპო ინძაგის. და მაინც, გარდამტეხი რობერტო ბაჯოს დარტყმა იყო. როცა ის ავიღე, ზუსტად ვიცოდი, რომ გოლს აღარ გავუშვებდი. საიდან ვიცოდი? მეკარეს წლების განმავლობაში უყალიბდება რაღაც ინსტინქტი, რომელსაც ვერ ახსნი.

თამაში რომ მორჩა ყველანი უზომოდ ბედნიერები ვიყავით. იტალია კი პირდაპირ ვერ გავიდა მსოფლიოს ჩემპიონატზე. ინგლისური მედია ხოტბას ასხამდა საქართველოს ნაკრებს. იტალიელებიც ბევრს წერდნენ ჩვენზე.

ისე მოხდა, რომ იტალია მაინც გავიდა მუნდიალზე, ოღონდ ამისათვის "სკუადრა აძურას" პლეი - ოფის თამაში დასჭირდა რუსეთთან. რუსებმა საშინაო მატჩში ისეთ მინდორზე ათამაშეს იტალიელები, კაცს ფეხბურთზე მეტად ჰოკეი ეგონებოდა.

     ⇒თენგიზ სულაქველიძე: ლობანოვსკი მეძახის და მეუბნება, მარადონა უნდა დაიჭიროო! [VIDEO]

რატომ ვერ გავაგრძელე კარიერა რომელიმე იტალიურ გუნდში? მაშინ ამის ძალიან რეალური შანსი მქონდა. მოლაპარაკება მიდიოდა "ბრეშასთან" და "პერუჯასთან". იყოს სხვა შეთავაზებებიც, თუმცა არ გამოვიდა და ამის ერთ-ერთ მიზეზად მე მოკლე სატრანსფერო ფანჯარას დავასახელებდი. სხვა მიზეზებზე საუბარი კი შორს წაგვიყვანს და არცაა ამ ძალიან საინტერესო და კარგი რუბრიკის თემა."

3066
მკითხველის კომენტარები / 0 /
მსგავსი ამბები
რუბრიკის სხვა სიახლეები