ნიკოლოზ ბასილაშვილი მაიამის "მასტერსს" დაემშვიდობა

მსოფლიოს 89-ე ჩოგანმა ნიკოლოზ ბასილაშვილმა ვერ შეძლო მაიამის "მასტერსზე" მეორე წრის ბარიერის გავლა.

ქართველი ჩოგბურთელი მსოფლიოს მე-8 ნომერს, სამხრეთაფრიკელ კევინ ანდერსონს ხვდებოდა, რომელმაც წინა კვირას, ინდიან უელსის "მასტერსზე" მეოთხედფინალამდე მიაღწია.

პირველ სეტში ანდერსონი საკუთარ მოწოდებაზე შანსს არ აძლევდა ბასილაშვილს - ქართველმა მეტოქის გეიმებში მხოლოდ ოთხი ქულა აიღო. თავად, ნიკას გეიმებში კი თითქმის მუდმივად ბრძოლა იყო, თუმცა, ანდერსონი კარგა ხანი ვერ ახერხებდა ბრეიკის შესრულებას. ეს მან მხოლოდ მეათე გეიმში, 5:4-ზე შეძლო, როცა რიგით მეექვსე ბრეიკ-პოინტის გამოყენება მოახერხა.

მეორე სეტი ანდერსონმა კიდევ უფრო კარგად დაიწყო - ორი საკუთარი გეიმი "მშრალი" ანგარიშით აიღო, ბრეიკიც გააკეთა და 3:0 დაწინაურდა. მაგრამ ბასილაშვილმა შეძლო გაბრძოლება - მეხუთე გეიმში მატჩში პირველი ბრეიკ-პოინტი მოიპოვა და შეძლო მისი გამოყენება, თუმცა, იქვე ისევ წააგო საკუთარი მოწოდება და მეტოქეს უპირატესობა დაუბრუნა.

მეცხრე გეიმში, როცა აფრიკელი მატჩზე აწვდიდა, ქართველმა სცადა თამაშის გადარჩენა, სამი ბრეიკ-პოინტიც მოიპოვა, თუმცა, ეს შანსები ვერ გამოიყენა.
საათსა და 29 წუთში ანდერსონმა 6:4, 6:3 მოიგო.

ყოველდღიური სპორტული გაზეთი "ლელო"
325
მკითხველის კომენტარები / 0 /
მსგავსი ამბები
რუბრიკის სხვა სიახლეები