..."ეს ძალიან უცნაური გადაწყვეტილება იყო". ნიკოლოზ ბასილაშვილი უცხოურ მედიაში...

ნიკოლოზ ბასილაშვილმა ექსკლუზიური ინტერვიუ მისცა tennishead.net-ს, რომელზე დაყრდნობითაც გამოცემამ თბილი წერილი მოამზადა. ვფიქრობთ, ის საინტერესო იქნება ჩვენი მკითხველისთვისაც:

"პროფესიონალი ჩოგბურთელის ხვედრი ასეთია: ის მუდმივ მოგზაურობაშია. ასევეა ნიკოლოზ ბასილაშვილიც, რომელსაც თავისი ქვეყანა ძალიან ენატრება. 27 წლის ქართველმა მოზარდობის წლების დიდი ნაწილი ამერიკის შეერთებულ შტატებში გაატარა, მთელი 4 წლის განმავლობაში სწავლობდა თურქეთში, ახლა კი ხშირად არის გერმანიაში, სადაც მისი მწვრთნელი ცხოვრობს...

"ძალიან მენატრება ჩემი ქვეყანა, - ამბობს ბასილაშვილი, - მიყვარს საქართველო და მიყვარს სახლში ყოფნა. მინდა, მუდმივად იქ ცხოვრება... ვფიქრობ, ყველა, ვინც საქართველოში ყოფილა, შეყვარებულია ჩემს ქვეყანაზე"...

რუსეთს, თურქეთს, სომხეთსა და აზერბაიჯანს შორის მოქცეული საქართველო ერთგვარი ხიდია ევროპასა და აზიას შორის. ქვეყანა, სადაც 4 მილიონამდე მოსახლეა, თვალწარმტაცი ბუნებით გამოირჩევა - შავი ზღვის სანაპირო, კავკასიის მთები, მდიდარი და დრამატიზმით აღსავსე ისტორია, საქვეყნოდ განთქმული სტუმართმოყვარეობა და დიდებული სამზარეული - ასეთია საქართველო!..

თუმცა იქ იშვიათობაა მსოფლიო კლასის ჩოგბურთელი. ალექსანდრე მეტრეველი ყველაზე წარმატებული ქართველი იყო საბჭოთა კავშირში. ქართველი ჩოგბურთელი, რომლითაც განსაკუთრებით აღფორთოვანებული იყო ნიკოლო ბასილაშვილი, გახლდათ ირაკლი ლაბაძე, რომელმაც 1998 წელს უიმბლდონის ახალგაზრდული ტურნირის ფინალში წააგო ჩოგბურთის მომავალ გიგანტთან, როჯერ ფედერერთან...

ნიკოლოზ ბასილაშვილი ერთადერთი ქართველია, ვისაც ATP-ის ორი ტურნირი (ჰამბურგის და პეკინის) აქვს მოგებული და საუკეთესო 20-ეულშიც იყო შესული. მის ოჯახში ჩოგბურთი არავის უთამაშია. მამამისი ქართული ეროვნული ბალეტის ცნობილი მოცეკვავე გახლდათ. ნიკოლოზი სულ რაღაც 5 წლის იყო, როცა მამამ პირველად დააჭერინა ხელში ჩოგანი:

"ეს ძალიან უცნაური გადაწყვეტილება იყო, - ამბობს ბასილაშვილი, - არ ვიცი, რატომ აირჩია მან ჩემთვის მაინცდამაინც ჩოგბურთი".

საქართველოში საჩოგბურთო კლუბი ბევრი არ არის. ჩვენმა გმირმა თამაში თბილისში, ლეილა მესხის სახელობის ჩოგბურთის აკადემიაში დაიწყო: "მამაჩემს თავიდანვე სერიოზული დამოკიდებულება ჰქონდა ჩემს კარიერასთან. მან ჩემთვის ძალიან ბევრი გააკეთა. თუ დღეს რამეს წარმოვადგენ, დიდწილად მისი დამსახურებაა...

ჩემს ოჯახს ბევრი ფული არ ჰქონია, თუმცა მამა ყველაფერს აკეთებდა იმისთვის, რომ უცხოურ ტურნირებზე მევლო. ისეთი შემთხვევებიც ყოფილა, ევროპის სხვადასხვა ქვეყანაში მოგზაურობისას, სასტუმროს ფული რომ არ გვქონია, მანქანაშიც გაგვითენებია ღამე და კარავშიც"...

12 წლის ნიკოლოზი კარიერის გასაგრძელებლად მამამ ამერიკაში წაიყვანა. საამისოდ, საქართველოში პირობები შეზღუდული იყო: "მამაჩემს კარიერის სხვადასხვა ეტაპზე ბევრი სწორი გადაწყვეტილება მიუღია. სწორედ მისი გადაწყვეტილება იყო, ფლორიდაში რომ მოვხვდი და ყოველწლიურად Orange Bowl-სა და Eddie Herr-ის ტურნირებში ვმონაწილეობდი...

მამა ძალიან მეხმარებოდა. ამერიკაში ყოფნისას ხშირად ვყოფილვარ მარტო, თვეობითაც კი, ხანდახან ეს ძალიან ძნელი იყო, მაგრამ, სამაგიეროდ, ვისწავლე დამოუკიდებლად ცხოვრება უკვე ახალგაზრდული ასაკიდან". 

15 წლის ბასილაშვილი საკრამენტოს საჩოგბურთო აკადემიაში გადავიდა. 18 წლისა დაბრუნდა საქართველოში, თუმცა ცოტა ხნით - მალე გაემგზავრა თურქეთში, სადაც ავსტრალიელი მწვრთნელის, გევინ ჰოპერის აკადემიაში მოხვდა. ბოლო 5 წელიწადია, ნიკოლოზი მეუღლესა და 3 წლის შვილთან ერთად საქართველოში ცხოვრობს. თუმცა გერმანული ვოიაჟების გარეშე არაფერი გამოდის - იქ მას მწვრთნელი, იან დე ვიტი ელოდება...

"საქართველოში ჩოგბურთს ძალიან ბევრი პრობლემა აქვს, - ამბობს ნიკოლოზი, - ჩვენთან ძალიან ცოტაა კარგი ჩოგბურთელი, ახალგაზრდებს ძალიან მცირე შანსი აქვთ პროგრესისთვის, თუ უცხოეთში არ წავლენ...

არის რამდენიმე საჩოგბურთო კლუბი. საქართველოს ჩოგბურთის ფედერაციას აქვს "ჰარდის" კორტები, სადაც უფასოდ შეიძლება ვარჯიში, მაგრამ კარგი მოთამაშე ბევრი არ არის, თავად საჩოგბურთო მომზადების სისტემა დღესდღეობით ვერ არის სათანადო დონეზე. თბილისში სულ რაღაც 5-6 დახურული კორტია, თბილისის გარეთ კი უფრო ცოტა - ერთი თუ ორი"...

ფეხბურთი, რაგბი, კალათბურთი, ძალოსნობა, კრივი და ჭიდაობა - საქართველოში ყველა ეს სახეობა ჩოგბურთზე მაღლა დგას: "შესაძლოა, ჩოგბურთში იყოს ახლა პატარა პროგრესი, რადგან ჩემს მაგალითზე ახალგაზრდებმა დაინახეს, რომ დიდი ძალისხმევის ხარჯზე გარკვეული შედეგების მიღწევა შეიძლება. ქართული ტელევიზიები გადასცემდნენ ჩემს თამაშებს US Open-ზე და ქომაგები, რომლებიც უყურებდნენ ამ თამაშებს, გამამხნევებელ შეტყობინებებს მიგზავნიდნენ"...

ბევრ ქვეყანაში, სადაც ბასილაშვილს ამ თუ იმ ტურნირზე გამოსვლა უწევდა, იქ მცხოვრები ქართველებისგან მხარდაჭერა არ მოჰკლებია. მან გახსნა ქართული რესტორნები ნიუ იორკსა და ჰამბურგში, სადაც გემრიელი ხინკლის მირთმევა შეგიძლიათ: "ქართული საჭმელები ძალიან გემრიელია, - ამბობს ნიკოლოზი, - ჩვენ ძალიან ბევრი ეროვნული კერძი გვაქვს". 

7 წლის წინ იყო, როცა ბასილაშვილმა ბოლოჯერ ითამაშა და მოიგო ტურნირი თბილისში. თუ ის წავა უფრო მაღლა მსოფლიო რეიტინგში, ერთ დღესაც შეიძლება კიდევ ითამაშოს სამშობლოში რომელიღაც ტურნირში, რადგან ეს უკვე პრესტიჟული იქნება...

5774
მკითხველის კომენტარები / 2 /
777
0
გაიხარე, წარმატებები.
vaaaa
1
გაშორდა ცოლს და ნუღარ შეაწუხეთ გული მისი ცოლის ხსენებით.
მსგავსი ამბები
რუბრიკის სხვა სიახლეები
;