ნიკოლოზ ცქიტიშვილი: ილიას ზუროსს ვესაუბრე...

საქართველოს ნაკრები 24 ნოემბერს მსოფლიოს ჩემპიონატის საკვალიფიკაციო ეტაპში ჩაერთვება. ეროვნულ გუნდში ნიკოლოზ ცქიტიშვილის დაბრუნებას უნდა ველოდოთ, რომელსაც 2013 წლის შემდეგ ნაკრების მაისურა არ მოურგია. მას ნაკრების მთავარი მწვრთნელი ილიას ზუროსი სპორტის ახალ სასახლეში ესაუბრა და შეთანხმდნენ...

აქვე შეგახსენებთ, რომ ნიკა "დინამოს" ჩემპიონთა ლიგის საკვალიფიკაციოში დაეხმარა, ამჟამად კი საქართველოშია და უცხოური კლუბების შეთავაზებებს განიხილავს.

- ჯერჯერობით კონტრაქტი არცერთ კლუბთან არ გამიფორმებია. ბოლო წლებში აზიაში ვთამაშობ, იქაურ გუნდებში პირობებიც კარგია, თავსაც მშვენივრად ვგრძნობ და, რაც მთავარია, წარმატება მნიშვნელოვნადაა დამოკიდებული ჩემს თამაშზე. ეს კი ნებისმიერი კალათბურთელისთვის ბევრს ნიშნავს.

- არის საინტერესო წინადადებები?

- ირანული "პეტროჩიმი" მეპატიჟებოდა, მაგრამ უარი ვუთხარი. ძლიერი გუნდია, ჩემპიონობისთვის იბრძოლებს, პირობებსაც კარგს მთავაზობდნენ, მაგრამ ვთვლი, რომ იმ ქალაქში კომფორტულად ვერ ვიქნები და ამიტომაც არ გავაფორმე კონტრაქტი. თეირანის გუნდი რომ ყოფილიყო, სიამოვნებით დავთანხმდებოდი. სხვათა შორის, ჩემი ყოფილი კლუბი "მაჰრამი", რომელთანაც ჩემპიონობა მოვიპოვე, უმაღლეს ლიგაში დაბრუნდა. ხელმძღვანელობას გარკვეული პრობლემები ჰქონდა, გუნდი დასუსტდა და ქვედა ლიგაში დაქვეითდა, მაგრამ ამჟამად სიტუაცია გამოსწორდა და კვლავ უმაღლესშია. მათაც ვესაუბრე და მითხრეს - ახალგაზრდული გუნდის გაკეთება გვინდა, თორემ აუცილებლად დაგიძახებდითო.

- ყველაზე რეალური ვარიანტი რომელია?

- ორი გუნდი მეპატიჟება ტაივანიდან. ეს კუნძულიც მაინტერესებს და იქაური კალათბურთიც. სხვათა შორის, შარშანაც გამომიგზავნეს გამზადებული კონტრაქტი და როდესაც ხელის მოწერას ვაპირებდი, ბაჰრეინიდან მივიღე არანაკლებ საინტერესო შეთავაზება. არჩევა ძალიან გამიჭირდა და ბოლოს, ოჯახთან ერთად ბაჰრეინის ვარიანტი ვამჯობინე.

- ბაჰრეინიდან რამდენად კმაყოფილი ჩამოხვედი?

- ბაჰრეინის დედაქალაქი მანამაც დუბაის მსგავსია, უბრალოდ, სხვაობა ის არის, რომ დუბაიში სულ ახალი შენობებია, შუშებში ჩასმული, ბაჰრეინში უძველეს ნაგებობებსაც ხშირად შეხვდები, საინტერესო ისტორიაც აქვს. სხვათა შორის, მოსახლეობის გარკვეული ნაწილი ირანელია. მათთან კარგი ურთიერთობა ჩამომიყალიბდა. კომუნიკაცია არავისთან მიჭირს, მაგრამ თვითონ ირანელებიც ისეთები არიან, თავად შემოდიან კონტაქტში. ხშირი იყო შემთხვევა, როდესაც ირანელი მეზობლები ოჯახში სადილად მიწვევდნენ. საოცრად სტუმართმოყვარეები არიან.

- ჩემპიონი რომ გახდი, დავწერე, თუმცა სტატისტიკა ვერსად მოვიძიე...

- საშუალოდ 22 ქულა და 12 მოხსნა მქონდა. სხვათა შორის, სტატისტიკა როგორც საიტ ევრობასკეტზე ქვეყნდება, ასე ბაჰრეინულ საიტებზე არსად იყო. გუნდების ვებ-გვერდებსა და "ინსტაგრამებზე" ქვეყნდებოდა მატჩის ოქმის ფოტოები. "ალ მანამა" თავიდანვე ფავორიტი იყო, ვინმე თუ 30 ქულას აგდებს ჩემპიონატში, ყველა თავისთან მიჰყავთ. ამით კონკურენტებს ასუსტებენ, ჩემპიონატს ინტერესს უკარგავენ და გუნდშიც არ იყო კარგი სიტუაცია - ბურთს ვერ ვიყოფდით, ყველას სროლა უნდოდა, დაცვაზე არ ფიქრობდნენ, ყველგან მე უნდა ვყოფილიყავი, მოხსნა იქნებოდა თუ დაფარება... თან ძალიან სწრაფი კალათბურთია...

- ბაჰრეინის ჩემპიონატში ნაცნობი კალათბურთელი ხომ არ იყო?

- ლორენ ვუდსი "ალ ჰალაში" თამაშობდა, იქვე იყო ნემანია ილიჩი, რომელსაც საქართველოშიც აქვს ერთი სეზონი გატარებული. თითო გუნდს თითო ლეგიონერის დამატების უფლება ჰქონდა.

- ჩემპიონთა ლიგის საკვალიფიკაციო ეტაპზე "დინამოს" დაეხმარე. "ხუვენტუდთან" პირველ მატჩში 23 ქულა გქონდა, მეორეში - შედარებით ცოტა ითამაშე...

- ძალიან სასიამოვნო იყო რამდენიმეწლიანი შესვენების შემდეგ სპორტის სასახლეში, ქართველი გულშემატკივრის წინაშე დაბრუნება. მაქსიმალურად ვეცადე გუნდს დავხმარებოდი და ქომაგისთვის ჩემი თამაში გამეხსენებინა. მატჩის ბოლოს ზურგის ტრავმა მივიღე, რამაც საშუალება არ მომცა განმეორებით შეხვედრაში უკეთ მეთამაშა... "დინამოს" ახლაც ვგულშემატკივრობ და ევროპის თასზე წარმატებას ვუსურვებ.

- ტაივანში კარიერის გაგრძელება საქართველოს ნაკრებში ჩამოსვლაში ხელს ხომ არ შეგიშლის?

- კლუბებს უფლება არა აქვთ მოთამაშეს ხელი შეუშალონ. ტაივანში რა წესებია არ ვიცი, მაგრამ არა მგონია, პრობლემა შემექმნას. თუმცა, მინდა, ჯერ კარგად გავერკვიო, ნაკრებში ვთამაშობ თუ არა, მწვრთნელი მიძახებს თუ არა. მე თამაში მსურს.

- მთავარ მწვრთნელ ილიას ზუროსთანაც ისაუბრე ამ თემაზე...

- სპორტის ახალ სასახლეში შევხვდი, ვუთხარი: გუნდი თუ გამომიშვებს, 100 პროცენტით ნაკრებთან ერთად ვარ-მეთქი. მწვრთნელმა მითხრა - ეს ყველაფერი გამაგებინეო. სხვათა შორის, ტაივანში სეზონი დეკემბერში იწყება და ვფიქრობ, საქართველოში დავრჩე, ნაკრებისთვის მოვემზადო და მსოფლიოს შესარჩევი ეტაპის შემდეგ გავფრინდე ტაივანში. იქაურებს ვეტყვი, რომ ნაკრებთან ერთად ვვარჯიშობ და რომ ჩამოვალ, ფორმაში ვიქნები-მეთქი. ასე რომ, მე მზად ვარ და ველი.

ყოველდღიური სპორტული გაზეთი "ლელო"

 

1398
მკითხველის კომენტარები / 0 /
მსგავსი ამბები
რუბრიკის სხვა სიახლეები