ნიკო კოვაჩი უნიკალური გახდა

ლაიპციგი-ბაიერნი 0:3
გოლები: 0:1 ლევანდოვსკი (29), 0:2 კომანი (78), 0:3 ლევანდოვსკი (85)

ლაიპციგი (4-4-2): გულაში - კლოსტერმანი, ორბანი (70. უპამეკანო), კონატე (82. ჰაიდარა), ჰალსტენბერგი - ზაბიტცერი, ადამსი (65. ლემერი), ფორსბერგი, კამპლი - პოულსენი, ვერნერი.
ბაიერნი (4-3-2-1): ნოიერი - კიმიხი, ზიულე, ჰუმელსი, ალაბა - გნაბრი (73. რობენი), ტიაგო ალკანტარა, ხავი მარტინესი (65. ტოლისო) - მიულერი, კომანი (87. რიბერი) - ლევანდოვსკი.

ერთი წლის წინ, “ბაიერნის” მთავარი მწვრთნელი ნიკო კოვაჩი მაჟორულ ნოტაზე გამოეთხოვა “აინტრახტს” - მოუგო თასის ფინალი თავის მომავალ გუნდს. ის სიუჟეტი მეტად უნიკალური იყო, შაბათს კი ხორვატი გახდა პირველი ისტორიაში, ვინც “ბაიერნთან” ერთად დუბლი შეასრულა როგორც მოთამაშის (2003), ასევე მწვრთნელის რანგში.

“ლაიპციგმა” ფინალი უფრო აქტიურად დაიწყო, ვიდრე ამ გუნდების მატჩი ცოტა ხნის წინ ბუნდესლიგაში, რომელიც უგოლო ფრით დასრულდა. შესაძლოა, “ხარებს” ანგარიშიც გაეხსნათ, მაგრამ “ბაიერნის” კარში ნოიერი დაბრუნდა, რომელმაც დაამტკიცა, რომ იოახიმ ლიოვი მას შემთხვევით არ ენდობა. დარტყმის ავტორი პოულსენი ვერაფრით მიხვდა - როგორ შეძლო ოთხი-ხუთი მეტრიდან დარტყმულის მოგერიება მეკარემ.

სულ მალე კი ანგარიში “ბაიერნმა” გახსნა - ალაბას პასით 190-ე გოლი გაიტანა მიუნხენურ კლუბში ლევანდოვსკიმ. ტაიმის მიწურულს კი ჰუმელსმა იდეალური პასით ერთი ერთზე გაიყვანა მეკარესთან კომანი, რომელმაც თითქოს ყველაფერი სწორად გააკეთა - მოატყუა მეკარე და ზუსტად დაარტყა, მაგრამ კონატემ თავით გამოიტანა ბურთი ცარიელი კარიდან.

ამ გამოუყენებელ შანსს კომანს აუცილებლად შეახსენებდნენ, “ლაიპციგს” მეორე ტაიმის დასაწყისში ანგარიში რომ გაეთანაბრებინა. კონატემ, ამჯერად, შესანიშნავი პასი შეასრულა და კარისკენ წასული ფორსბერგი ისევ ნოიერმა შეაჩერა. შემდეგ ეპიზოდში კი ისიც ვერ შველოდა თავის გუნდს, მაგრამ ვერნერის დარტყმა ზედ კარის ხაზზე ზიულემ შეაჩერა.

“ლაიპციგის” მეკარე გულაშისაც ბევრი საქმე ჰქონდა. მან ბევრჯერ გადაარჩინა თავისი გუნდი, ერთხელ კი იღბალიც დაეხმარა, როცა ტიაგო ალკანტარამ დამატებაზე მეტრნახევრიდან ააცილა. ეს ყველაფერი დასრულდა კომანის ეფექტური გოლით, რითაც ფრანგმა წინა გაფუჭებული მომენტები გამოისყიდა. სხვათა შორის, კომანს ამ შემთხვევაში გაუმართლა, რადგან კიმიხის გადაცემის ჩაჭრისას, კონატემ შეცდომა დაუშვა და ბურთი ფრანგს მიუვიდა.

ამ გოლის შემდეგ, თასის მფლობელის ვინაობა პრაქტიკულად გარკვეული იყო. ხოლო წერტილი ფინალს ისევ ლევანდოვსკიმ დაუსვა, რომელიც შვიდი გოლით ზედიზედ მესამედ გახდა თასის გათამაშების საუკეთესო ბომბარდირი.

ერთადერთი, რაც, ალბათ, “ბაიერნის” გულშემატკივრებს დააკლდათ, რობენისა და რიბერის გოლები იყო. მათ ბოლოჯერ ითამაშეს მიუნხენურ კლუბში და ბოლო ტიტული იზეიმეს გუნდთან ერთად. ეს მე-19 თასია “ბაიერნის” ისტორიაში.

ყოველდღიური სპორტული გაზეთი "ლელო"
471
მკითხველის კომენტარები / 0 /
მსგავსი ამბები
რუბრიკის სხვა სიახლეები
;