ნიჩბოსნობა. ზაზა ნადირაძე: მიზანი რეალობად უნდა ვაქციო

მცხეთელმა ზაზა ნადირაძემ ქართული ნიჩბოსნობის ისტორიაში პირველმა იასპარეზა კანოეთი ოლიმპიურ თამაშებში და მე-5 ადგილი დაიკავა,

შარშან 26 აგვისტოს ჩეხურ რაჩიცეში მსოფლიოს ჩემპიონატის ვერცხლის მედალი მოიპოვა, მანამდე კი, ასევე, კანოეთი 200 მეტრ დისტანციაზე, პლოვდივში უფროსებსა და მერე 23-წლამდელთა ევროპის პირველობებზე მესამე ადგილები დაიკავა.

ზემოაღნიშნული წარმატებების გარდა, ბოლო ექვსი წლის განმავლობაში ზაზა ნადირაძემ არაერთი გამარჯვებით გაახარა სპორტის ქართველი გულშემატკივარი: მისთვის იღბლიანი იყო 2014 წელიც: გერმანიაში ევროპის ჩემპიონატზე მე-10 ადგილზე გავიდა და ბაქოს პირველი ევროპული თამაშების ლიცენზია მოიპოვა.

იმ შეჯიბრებიდან ორი კვირის თავზე უნგრულ სეგედში 23-წლამდელთა მსოფლიოს პირველობაზე ბრინჯაოს მედალი ხვდა, რაც დამოუკიდებელი საქართველოს სახელით ნიჩბოსნობაში ოფიციალური შეჯიბრებებიდან პირველი ჯილდო იყო...

ამჟამად ზაზა ნადირაძე ბელარუსში იმყოფება და ახალი სეზონისთვის ემზადება. გუშინ მას ბრესტში შევეხმიანეთ.

- შარშანდელი სეზონი ოლიმპიადისშემდგომი პირველი წელი იყო და მინდოდა, საკუთარი თავი დამერწმუნებინა, რომ რიოს ოლიმპიადაზე უკეთ ასპარეზობა შემეძლო. - გვითხრა მან.

- ვფიქრობ, რომ ეს მოვახერხე: სამ შეჯიბრებაში მოვსინჯე ძალები და ყველგან მედალი ავიღე - მსოფლიოს თასსა და ჩემპიონატზე, ასევე, ევროპის პირველობაზე.

ისე, მართალი გითხრათ, რაღაც ხინჯი მაინც დამრჩა გულში: როცა ოქროს უმიზნებ, ცხადია, მეორე ადგილი ვეღარ გაკმაყოფილებს. მსოფლიოზე ფინიშამდე 2-3 წამით ადრე დაღლა ვიგრძენი, ეს მცირე დრო კი საკმარისი აღმოჩნდა, რომ ბელარუს მსოფლიოს ჩემპიონ არტიომ კოზირს ჩემთვის გაესწრო. ვეცდები, დანაკლისი წლეულს ავინაზღაურო.

- ბრესტში დიდი ხანია ემზადები?

- საწვრთნელი შეკრება 5 იანვარს დამეწყო. საქართველოში ზამთრობით, სამწუხაროდ, სავარჯიშო პირობები არ გვაქვს. აქ ყოველმხრივ მიწყობენ ხელს. ადგილობრივი მწვრთნელების - იგორ და ოლეგ რადომსკების ხელმძღვანელობით დღეში ორჯერ ვმეცადინეობ დიდი დატვირთვით.

ამ ბაზაზე არის ნიჩბოსნობის სპეციალური ტრენაჟორები, ძალოსნობის დარბაზი და აუზი გამდინარე წყლით, სადაც ნავითაც ვვარჯიშობ. თუმცა ამჯერად ტექნიკაზე მეტ ყურადღებას გამძლეობას, ფიზიკური კონდიციების ამაღლებას ვუთმობ.

- კანოეთი 200-მეტრიანი დისტანცია ოლიმპიური სახეობა აღარ არის...

- დიახ, ამიტომაც 2018 წლიდან 1 000 მეტრზე მექნება დებიუტი, რადგან ამ დისტანციაზე არასდროს მიასპარეზია. სპრინტერულ დისტანციაზე მეტად აქ გამძლეობაა საჭირო, ძალების თანაბარი განაწილებაც - უნდა გაითვალისწინო, რომელი მონაკვეთი რა სიჩქარით გაიარო, რომ სასურველი შედეგი მიიღო. ტექნიკა კი, ფაქტობრივად, იგივეა.

- კონკურენციაზე რას იტყვი?

- ჩემსავით ყველა ამ დისტანციაზე გადმოერთო, რაც, ცხადია, კონკურენციას გაზრდის. თანაც ისეთებიც გამოვლენ, რომლებსაც მსოფლიოს და ევროპის ჩემპიონატების მედლები აქვთ მოპოვებული.

განსაკუთრებით მინდა გამოვყო ოლიმპიური თამაშების სამგზის გამარჯვებული, მსოფლიოს და ევროპის ჩემპიონი გერმანელი სებასტიან ბრენდელი, ჩეხი მარტინ ფუქსა, არტიომ კოზირი, ასევე, ესპანელი ალონსო ბენავიდესი,

ყაზახი ტიმურ ხაიდაროვი, უნგრელი ჯონათან ჰაიდუ, რუსი ალექსეი კოროვაშკოვი, ირანელი ადელ მოჯალალიმოჩადამი, ლიტველი ჰენრიკას ჟუსტაუტასი და პოლონელი მარეკ მიხალ ლუბნიევსკი... ერთი სიტყვით, დიდი კონკურენცია იქნება.

- წლეულს რამდენ შეჯიბრებაში იასპარეზებ?

- ალბათ, ოთხ მნიშვნელოვან ტურნირში მოვსინჯავ ძალებს - მსოფლიოს და ევროპის ჩემპიონატებში, მსოფლიოს თასსა და უნივერსიადაზე. პირველი შეჯიბრება, ვფიქრობ, მსოფლიოს თასი იქნება.

თუმცა საბოლოოდ ჯერ არ გადამიწყვეტია. როდესაც ნავით ვარჯიშს დავიწყებ, დისტანციურ სვლას შევეჩვევი და შედეგს გავითვალისწინებ, შეჯიბრებასაც მერე დავგეგმავთ. ჯერჯერობით, მომზადება კარგად მიდის. დანარჩენს დრო გვიჩვენებს.

- 200 მეტრზე თუ გამოხვალ ტურნირებზე?

- ვფიქრობ, ნიჩბოსნობის საერთაშორისო ფედრაციამ სრულიად უმართებულო ნაბიჯი გადადგა, 200 მეტრი ოლიმპიური თამაშების პროგრამიდან რომ ამოიღო. ეს იყო ვაჟებისთვის გამორჩეული დისტანცია, სანახაობრივადაც ბევრად საინტერესო, დაძაბულობით გამორჩეული.

მედალოსნების გამოსავლენად არცთუ იშვიათად ფოტოფინიში სჭირდებოდა. ცხადია, 1000 მეტრზე, ალბათ, ამას ვერ იტყვი. იმის მიუხედევად, რომ სპრინტერული დისტანცია ოლიმპიური სახეობა აღარ არის, მსოფლიოს და ევროპის ჩემპიონატებზე აუცილებლად გამოვალ და უმაღლესი შედეგებისთვის ვიბრძოლებ.

- ბრესტში ახლაც შენთან ერთად ემზადება ორგზის მსოფლიოს ჩემპიონი არტიომ კოზირი?

- არა, ბელარუსის ნაკრებთან ერთად იგი ახლა სხვაგან ვარჯიშობს. მართალია, ბაზაზე შეხების წერტილები არ გვაქვს, მაგრამ ტელეფონით ვეხმიანებით ერთმანეთს - ჩვენ ხომ დიდი ხანია ვმეგობრობთ. შარშან მსოფლიოს ჩემპიონატის შემდეგ ერთად თითო კათხა ჩეხური ლუდიც გადავკარით.

- დალევა გიყვარს?

- არა, რას ამბობთ. ისე, 2017-ში მსოფლიოს ჩემპიონატიდან რომ დავბრუნდი, ვერცხლის მედალი მცხეთაში ჩემს დაყენებულ ქარვისფერ ღვინოში "ვაბანავე" - იქნებ, 2018 წელს ოქროს ფერი მიიღოს-მეთქი. წლეულს ყველა ტურნირში მაღალი შედეგებისთვის ვიბრძოლებ, რომ მიზანი რეალობად ვაქციო.

ყოველდღიური სპორტული გაზეთი "ლელო"
2210
მკითხველის კომენტარები / 1 /
ნუგზარი
0
წამატებებს გისურვებ!!!
მსგავსი ამბები
რუბრიკის სხვა სიახლეები
;