ექსკლუზივი ზაზა ნადირაძესთან: ოქრო, კოზირი და კათხა ლუდი

ამას წინათ სერბეთის დედაქალაქ ბელგრადში ნიჩბოსანთა (კანოე-კაიაკი) ევროპის ჩემპიონატში შესანიშნავად იასპარეზა მცხეთელმა კანოისტმა, 2016 წლის რიოს ოლიმპიური თამაშების მეხუთეადგილოსანმა,

შარშანდელი მსოფლიოს ჩემპიონატის ვერცხლისა და ევროპის პირველობის ბრინჯაოს პრიზიორმა, 2017-2018 წლების მსოფლიოს თასების ორგზის მეორეადგილოსანმა ზაზა ნადირაძემ,

რომელმაც ერთადგილიანი ნავით 200 მეტრი 39.200 წამში დაფარა და ევროპის ჩემპიონობა პირველად მოიპოვა, ამასთანავე მეორე ევროპული თამაშების საგზურიც დაიმსახურა.

39.224 წამით მეორე ადგილი ლონდონის ოლიმპიადის ბრინჯაოს პრიზიორს, მსოფლიოს 14-გზის და ევროპის ექვსგზის ჩემპიონსა და მსოფლიოს პირველობების ექვსი ვერცხლის მფლობელ ივან შტილს (რუსეთი) ერგო.

2015 და 2017 წლების მსოფლიოს ჩემპიონი, ევროპის ჩემპიონატების ვერცხლისა და ბრინჯაოს მედალოსანი არტსიომ კოზირი (ბელარუსი), რომელთანაც შარშან ზაზამ 200 მეტრზე მსოფლიოს ჩემპიონატის ფინალი წააგო, 39.468 წამით მესამე იყო.

ზაზა ნადირაძე რამდენიმე დღეა, მშობლიურ მცხეთაში ისვენებს ორი მნიშვნელოვანი შეჯიბრების წინ. ევროპის ჩემპიონთან საუბარი ბელგრადში გამართული პაექრობებით დავიწყეთ.

- სერბეთის დედაქალაქში ყველა უძლიერესმა კანოისტმა მოიყარა თავი, - გვითხრა მან. - ბოლო ორი-სამი წელიწადია, ჩვენს სახეობაში კონკურენცია საგრძნობლად გაიზარდა.

მას შემდეგ, რაც 2014 წელს 23-წლამდელთა მსოფლიოს ჩემპიონატზე მესამე ადგილი დავიკავე, ლიდერთა შორის ვარ და ბელგრადის ტურნირზე სერიოზულად მქონდა პირველობის პრეტენზია, თუმცა ის მაშინებდა, რომ მხრების ტრავმა ჯერ კიდევ არ მქონდა ბოლომდე მოშუშებული.

წლეულს თებერვალში ანტალიურ შეკრებაზე მივიღე ეს ტრავმა, რომელიც ბოლო მომენტამდე მახსენებდა თავს. თურქეთის შემდეგ ფოთში გადავწყვიტეთ შეკრების გავლა, მაგრამ იქ ელემენტარული პირობებიც არ არის მაღალ დონეზე მოსამზადებლად, ამიტომ ბელარუსის ქალაქ ბრესტს მივაშურეთ, სადაც შესანიშნავი ბაზა აქვთ. მწვრთნელები - კახა ლომიშვილი, იგორ და ოლეგ რადომსკები ყველაფერს აკეთებდნენ საიმისოდ, რომ წლის ნებისმიერი შეჯიბრებისთვის სათანადო ფორმაში ვყოფილიყავი.

ევროპის ჩემპიონატის საკვალიფიკაციო ეტაპზე 200 მეტრი 39.026 წამში დავფარე და პირდაპირ ფინალში მოვხვდი. გადამწყვეტი პაექრობის წინ მოთელვისას მყესები ამტკივდა.

ავნერვიულდი, ვიფიქრე, ამდენი ხნის წვალება წყალში მეყრება-მეთქი. მწვრთნელმა დამამშვიდა, მასაჟისტმა და ექიმებმა ტკივილი გამიყუჩეს, მეც მოვთოკე ემოციები და სტარტისთვის მოვემზადე. მაინც დავუშვი შეცდომა, მაგრამ 30 მეტრის შემდეგ დავწინაურდი და ფინიშამდე წინ არავინ გამიშვია - სახელოვან რუს სპორტსმენ შტილს ფინიშზე 10 სანტიმეტრით გავუსწარი და ევროპის ჩემპიონობა მოვიპოვე, რამაც, მართალი გითხრათ, ძალიან გამახარა.

- მსოფლიოს თასის ფინალისგან განსხვავებით, ამჯერად მეტოქეებს აკონტროლებდით?

- უნგრულ სეგედში მსოფლიოს თასის ეტაპზე საკვალიფიკაციო გაცურვისას 39.013 წამით პირველი ადგილი დავიკავე და ლიტველ ვადიმ კორობოვს 0.067 წამით ვაჯობე. ფინალშიც, ფაქტობრივად, უკონკურენციოდ დავფარე დისტანციის უდიდესი მონაკვეთი.

ფინიშის სწორზე, უბრალოდ, ვერ შევნიშნე, ლიტველი სპორტსმენი როგორ "გამეპარა. ჩემ გვერდით რომ მდგარიყო, ეს არ მოხდებოდა. ბელგრადში კორობოვი მეზობელ ბილიკზე იდგა. მეხუთე ადგილით დაკმაყოფილდა. სხვებიც არ გამომპარვია მხედველობიდან. სტარტზე დაშვებული შეცდომა ფინიშზე გამოვასწორე.

- კვარცხლბეკზე ბელარუსი არტსიომ კოზირი მოწყენილი ჩანდა. რა გადაულაპარაკეთ ისეთი, რომ გამხიარულდა?

- შარშან მსოფლიოს ჩემპიონატზე მან მაჯობა და დაჯილდოების შემდეგ ლუდზე დამპატიჟა. ბელგრადში კი ვუთხარი, კათხა ლუდი ჩემზეა-მეთქი. უარი არ უთქვამს. მარცხი ვის სიამოვნებს, მაგრამ არტსიომმა მითხრა, კარგია, რომ შენ გახდი ჩემპიონი, დიდი ხანია ამ ტიტულს იმსახურებო.

- მცხეთაში თუ მოგილოცეს ჩემპიონობა?

- აეროპორტში ნათესავები, ახლობლები, მეგობრები, რამდენიმე მწვრთნელი და ფედერაციის წევრები დამხვდნენ. მერე მცხეთაში ვიწრო წრეში აღვნიშნეთ ჩემპიონობა. ტრადიციისამებრ, ჩემს დაყენებულ ღვინოში ვაბანავეთ ოქროს მედალი. მცხეთის მესვეურთაგან დღემდე არავინ შემხმიანებია.

კულტურისა და სპორტის მინისტრს ბატონ მიხეილ გიორგაძეს შევხვდი. მომილოცა ჩემპიონობა და აღგვითქვა, რომ ნიჩბოსნობას მეტ ყურადღებას მივაქცევთო. სამი წელიწადია, ამას გვპირდებიან. მინისტრები იცვლებიან, საქმე კი მკვდარი წერტილიდან არ იძვრის.

არადა, საქართველოს ნიჩბოსნობაში კარგი თაობა მოდის. მის მოსამზადებლად კი ელემენტარული პირობებიც არ არის. უცხოეთში რომ ჩავდივართ შეკრებებზე, მწვრთნელებს უკვირთ - საქართველოში კარგი წყლები გაქვთ და რატომ იქ არ ვარჯიშობთო. ძველი დრო ახსოვთ: ფოთის ბაზები კარგა ხანია, გაპარტახებულია.

თბილისში სანიჩბოსნო ბაზა მოიშალა, მცხეთაში მტკვარზე რამდენიმე წელიწადია, ბაზის მშენებლობის დამთავრებას საშველი არ დაადგა. სხვა ადგილებზე კი აღარაფერს ვამბობ.

ბიუჯეტიც არ არის საკმარისი. როგორც გითხარით, კარგი თაობა მოდის, მაგრამ უსახსრობის გამო ფედერაცია მათ შეკრებებსა და შეჯიბრებებზე ვერ გზავნის. ასეთ პირობებში როგორ გინდა გაზარდო დიდი სპორტსმენი. საკუთარ თავზე მაქვს ყველაფერი გამოცდილი. ერთ დროს ნავი და ნიჩაბიც არ მქონდა.

მართალია, ამ მხრივ ახლა ხელი არ მეშლება, მაგრამ ჩემს კონკურენტებს ბევრად უკეთესი პირობები აქვთ და ამან, შესაძლოა, ხვალ-ზეგ შედეგებზეც იმოქმედოს.

- ზაზა, სამომავლო გეგმებზე რას გვეტყვით?

- 26 ივნისს ისევ ბრესტს მივაშურებ და ახალი შეჯიბრებებისთვის მზადებას დავიწყებ. 20-24 ივლისს პორტუგალია სტუდენტთა ევროპის ჩემპიონატს უმასპინძლებს, ერთი თვის შემდეგ 24-26 აგვისტოს კი აქვე მსოფლიოს ჩემპიონატიცაა დაგეგმილი. ორივე ტურნირზე ერთადგილიანი კანოეთი 200 მეტრზე გამოვალ.

- ჰო, მაგრამ ეს დისტანცია ხომ უკვე აღარ არის ოლიმპიური...

- სამაგიეროდ, მეორე ევროპული თამაშების პროგრამაშია შეტანილი. ამას წინათ გახდა ცნობილი, რომ ვინც მინსკში გაიმარჯვებს, ის 2020 წლის საგზურსაც დაიმსახურებს. ეს მოტივაციას ერთი ორად ზრდის. თანაც მე უკვე ვვარჯიშობ ოლიმპიურ 1000 მეტრზე, ოღონდ შეჯიბრებებში გამოსვლას არ ვჩქარობ - 2019 წლის მიწურულიდან გადავერთვები.

- დაგვიანებული ხომ არ იქნება. მით უმეტეს, რომ თქვენი კონკურენტები სტაიერულ დისტანციებზე უკვე აღწევენ წარმატებას. მაგალითად, ჩეხი მარტინ ფუქსა 500 და 1000 მეტრზე მსოფლიოს ორგზის და ევროპის ექვსგზის ჩემპიონია.

- 2020 წლის ოლიმპიადის საგზურები გაისად მსოფლიოს ჩემპიონატსა და 2020 წელს ევროპის სალიცენზიო ტურნირზე გათამაშდება. ასე რომ, იაპონიის დედაქალაქში გასამგზავრებელი საგზურის მოსაპოვებლად რამდენიმე შესაძლებლობა მეძლევა და მათ აუცილებლად გამოვიყენებ, რომ ტოკიოში ოცნება ავისრულო და ქომაგებიც გავახარო.

ყოველდღიური სპორტული გაზეთი "ლელო"
973
მკითხველის კომენტარები / 0 /
მსგავსი ამბები
რუბრიკის სხვა სიახლეები