ნოემბერის ტესტები: 34 ბორჯღალოსანი მონპელიეში

* მილტონ ჰეიგმა ნოემბრის ტესტებისთვის მოსამზადებლად 34-კაციანი შემადგენლობა გამოაქვეყნა.
* სიაში ორი ახალბედაა - გიორგი კვესელაძე (არმაზი) და მირიან მოდებაძე (აია).
* სიაში ვერ მოხვდნენ "აჟენის" უკანახაზელი თამაზ მჭედლიძე და გიორგი ფრუიძე (კრასნი იარი).
* "ბორჯღალოსნები" სამდღიან შეკრებას მონპელიეში გაივლიან.

საქართველოს ნაკრების მთავარმა მწვრთნელმა მილტონ ჰეიგმა გუნდის გაფართოებული შემადეგნლობა დაასახელა. 34 მორაგბე თვის ბოლოს საფრანგეთში, მონპელიეში სამდღიან საწვრთნელ შეკრებას გაივლის.

"ბორჯღალოსნების" გაფართოებულ შემადგენლობაში ორი ახალბედაა. გარემარბი გიორგი კვესელაძე (არმაზი) და ფულბეკი მირიან მოდებაძე (აია) საქართველოს ახალგაზრდული ნაკრების შემადგენლობაში, ივნისში მსოფლიოს ახალგაზრდულ ჩემპიონატზე ირჯებოდნენ.

ტრავმა მოიშუშა და ნაკრებს დაუბრუნდა შერკინების ბურჯი დავით ქუბრიაშვილი (მონპელიე). დიდი ხანია ნაკრებში არ უთამაშია მეორეხაზელ ვახტანგ მაისურაძეს (ვანი). ის "ბორჯღალოსნების" ღირსებას 2011 წლის მსოფლიოს თასზე იცავდა. თუმცა, მომდევნო მსოფლიოს თასის გათამაშება გამოტოვა. ახლა, მაისურაძე კარგ ფორმაშია და ნაკრების მწვრთნელების ყურადღება ისევ მიიპყრო.

ივნისის ტესტები გამოტოვა მესამეხაზელმა შალვა სუთიაშვილმა (ანგულემი), რომელიც ამჟამად, საფრანგეთის ჩემპიონატის ელიტურ, მეორე დივიზიონში შესანიშნავად ასპარეზობს.

გამოძახებულთა შორის არ არის შერკინების ბურჯი ანტონ ფეიქრიშვილი (კარდიფი), რომელიც ერთი კვირის წინათ, ჩელენჯ კაპის გათამაშების პირველი ტურის მატჩში დაშავდა. ტრავმის შემდეგ რეაბილიტაციის კურსს გადის და ჯერ თამაში არ დაუწყია მესამეხაზელ ბექა გორგაძეს (მონ დე მარსანი).

უცნობია, რატომ არ გამოიძახა ეროვნულ ნაკრებში მილტონ ჰეიგმა უკანახაზელები თამაზ მჭედლიძე (აჟენი) და გიორგი ფრუიძე (კრასნი იარი). ამის გარკვევას დღეს, საქართველოს ნაკრების მთავარ მწვრთნელთან პრესკონფერენციაზე შევეცდებით.

"ბორჯღალოსნები" თავიანთ კლუბებს 2 ნოემბრიდან დაუბრუნდებიან. 6 ნოემბერს კი მილტონ ჰეიგი 34-კაციანი შემადგენლობიდან 31-ს შეარჩევს და გუნდს ტრადიციულად, "შევარდენის სანაკრებო ბაზაზე" შეკრებს.

შეგახსენებთ, რომ პირველ მატჩს ჩვენი გუნდი 11 ნოემბერს ეროვნულ სტადიონზე კანადის ნაკრებთან გამართავს. მერე "ბორჯღალოსნები" უელსში გაემგზავრებიან და ერთი კვირის თავზე "პრინსიპალიტი სტედიუმზე" "წითელ ურჩხულებს" დაუპირისპირდებიან. 25 ნოემბერს კი ვაკის სტადიონზე აშშ-ის ნაკრებს ვუმასპინძლებთ.

საგულისხმოა, რომ უელსის ნაკრები 2019 წლის მსოფლიოს თასის ჯგუფურ ეტაპზე ჩვენი მეტოქეა. გამორიცხული არაა ჩვენსავე ჯგუფში მოხვდეს კანადის ნაკრებიც. ოღონდ, იმ შემთვხევაში, თუ პლეი ოფში ურუგვაის ეროვნულ გუნდს დაამარცხებს.

საქართველოს ნაკრები
პირველი ხაზი: მიხეილ ნარიაშვილი (მონპელიე), ზურაბ ჟვანია (სტად ფრანსე), კარლენ ასეიშვილი (ბრივი), ჯაბა ბრეგვაძე (კრასნი იარი), შალვა მამუკაშვილი (კარკასონი), ბადრი ალხაზაშვილი (ტულონი), ლევან ჩილაჩავა (ტულონი), დავით ქუბრიაშვილი (მონპელიე), სოსო ბეკოშვილი (ბრივი)
მეორე ხაზი: გიორგი ჩხაიძე (დომონი), კონსტანტინე მიქაუტაძე (მონპელიე), გიორგი ნემსაძე (ბრისტოლი), ვახტანგ მაისურაძე (ვანი)
მესამე ხაზი: შალვა სუთიაშვილი (ანგულემი), ვიქტორ კოლელიშვილი (კლერმონი), ლაშა ლომიძე (ლონდონ აირიში), ოთარ გიორგაძე (კლერმონი), ბექა ბიწაძე (ნარბონი), გიორგი თხილაიშვილი (ბათუმი)
#9: ვასილ ლობჟანიძე (ბრივი), გიორგი ბეგაძე (ლოკომოტივი), გელა აფრასიძე (მონპელიე)
#10: ლაშა ხმალაძე (ბათუმი), ლაშა მალაღურაძე (კრასნი იარი), რეზო ჯინჭველაშვილი (არმაზი)
#12-13: დავით კაჭარავა (ენისეი), მერაბ შარიქაძე (ორიაკი), გიორგი კოშაძე (ხარები)
#11-14: ალექსანდრე თოდუა (ლელო), სოსო მათიაშვილი (აკადემია), გიორგი კვესელაძე (არმაზი)
#15: მერაბ კვირიკაშვილი (ლელო), ბექა წიკლაური (ლოკომოტივი), მირიან მოდებაძე (აია)

ნოემბრის ტესტები
11 ნოემბერი
საქართველო-კანადა

18 ნოემბერი
უელსი-საქართველო

25 ნოემბერი
საქართველო-აშშ

ყოველდღიური სპორტული გაზეთი "ლელო"

973
მკითხველის კომენტარები / 0 /
მსგავსი ამბები
რუბრიკის სხვა სიახლეები