ნოემბრის ტესტები. 'ბორჯღალოსნები': ქომაგებთან მაინც ვალში ვართ

საქართველო-სამოა 27:19
საქართველო (15-9): ხმალაძე, ძნელაძე, მჭედლიძე, შარიქაძე, კვესელაძე, აბჟანდაძე, ლობჟანიძე (აფრასიძე 53); (1-8): ნარიაშვილი (გოგიჩაშვილი 58), ბრეგვაძე (მამუკაშვილი 78), ქუბრიაშვილი (გიგაშვილი 48), ჭეიშვილი (სუთიაშვილი 63), ლომიძე, გიორგაძე (ბიწაძე 72), ცუცქირიძე, გორგაძე.
3ლ: ლობჟანიძე, გიორგაძე, აფრასიძე. 3გ, 2ს: აბჟანდაძე
სინბინი: ბრეგვაძე

სამოა (15-9): ტუალა (ალოფა 70), ტაულანგი, ლეიუა, ლილო, ფიდოუ, პისი (ლეიულა 55), პოლატაივაო (კაული 55); (1-8): მულიპოლა (ლეი 52), მატუჰუ (ლეიატაუა 38), ალოემილე, პაულო, ლეაუპეპე, ფაჰასალელე (ლუამანუ 48), ლემი, ტაირელი (ლევავე 60).
3ლ: ტაულანგი, პაულო, ტუალა. 2გ: პისი
სინბინი: ტაულანგი
მსაჯი: კარლ დიქსონი

"ამ გამარჯვების მიუხედავად, მიგვაჩნია, რომ გულშემატკივრების წინაშე ვალში ვართ, რადგან მანამდე ზედიზედ სამ თამაშში დავმარცხდით." - ეს სიტყვები მატჩის შემდეგ საქართველოს ნაკრების კაპიტანმა მერაბ შარიქაძემ თქვა. "ბორჯღალოსნები" ზედიზედ მეოთხე მარცხთან ერთ ნაბიჯში იყვნენ.

პირველი ტაიმის პირწმინდად წაგების შემდეგ, გუნდმა ძალების კონცენტრირება შეძლო, თავის თამაშს მიაგნო და მეორე ტაიმში მატჩის ბედი სასწაულებრივად შემოაბრუნა. საქართველოს ნაკრებმა საკმაოდ ძლიერ სამოას ეროვნულ გუნდს 27:19 მოუგო.

თამაში, თითქოს, კარგად დავიწყეთ. საქართველოს ნაკრების დებიუტანტმა, თედო აბჟანდაძემ, რომელიც ჯერ 20 წლისაც არ არის, მე-3 წუთზე საჯარიმოდან ანგარიში გახსნა - 3:0. აქედან მოყოლებული 30-ე წუთამდე ჩვენი ნაკრები ერთიანად მოიშალა. ვერ ვჯობნიდით მეტოქეს შერკინებაში, რაკსა და დერეფანში თამაშისას. სამოელები უფრო სწრაფად და ლაღად ბურთაობდნენ, შედეგად ჩვენი დაცვა გადაწყობას ვერ ასწრებდა. დაცვის ხაზში ხშირად ჩნდებოდა ღია დერეფანი, რომელსაც მეტოქე შესანიშნავად იყენებდა. ვაგებდით ერთი-ერთზე ბრძოლებსაც.

ყოველივე ამის შედეგად სამოას ნაკრებმა სამი ლელო გაგვიტანა, რომელთაგან მხოლოდ ერთი ვერ გარდასახა და 28-ე წუთისთვის უკვე 19:3-ს იგებდა. ტაიმის ბოლო ათ წუთში, უკან დასახევი გზა რომ აღარ დარჩა, "ბორჯღალოსნები" გააქტიურდნენ და 32-ე წუთზე სამოელთა ჩათვლის მოედანთან პირველად შეუტიეს სახიფათოდ. ლელოდან ხუთ მეტრში დერეფანი მოვიგეთ, მოლი შევკარით, დავძარით, თუმცა სამოელებმა მისი შეჩერება წესის დარღვევით შეძლეს.

მსაჯმა უპირატესობა გვათამაშა. წარმოქმნილი რაკიდან ჯერ გიორგი ცუცქირიძემ შეუტია. მერე ბურთი ოთარ გიორგაძემ აიტაცა და ლელოს ხაზს მიუახლოვდა. ცხრა ნომერმა ვასილ ლობჟანიძემ სწორად შეაფასა მდგომარეობა და რაკიდან გამოტანილი ბურთი კარის ძელის დამცველ შალითას მიადო. არბიტრმა ლელო დააფიქსირა. გარდასახვა ხელსაყრელი პოზიციიდან აბჟანდაძემ მიითვალა - 10:19. ასე დასრულდა პირველი ტაიმი.

შესვენების შემდეგ საქართველოს ნაკრები ერთიანად შეიცვალა. თითქოს, მოედანზე სხვა გუნდი გამოვიდაო. "ბორჯღალოსნები" უპირატესობას იმთავითვე დაეუფლნენ, თუმცა მთელი 20 წუთის განმავლობაში ანგარიშის შემცირებას ვერაფრით ახერხებდნენ. ჩვენი ნაკრების თამაში კიდევ უფრო სწრაფი და სახიფათო მას შემდეგ გახდა, რაც მოედაზე გელა აფრასიძესთან ერთად დებიუტანტები გურამ გოგიჩაშვილი და ბექა გიგაშვილი გამოჩდნენ.

ყველა იმ კომპონენტში, რაშიც პირველ ტაიმში სამოელები გვჯობდნენ, ვითარება რადიკალურად შეიცვალა.

62-ე წუთზე მეტოქის ლელოდან ხუთ მეტრში დანიშნული შერკინებიდან ბურთი გელა აფრასიძემ გამოიტანა და შუამარბ თამაზ მჭედლიძეს დიდ სისწრაფეზე გაატანა. ის ზედ ლელოს ხაზთან შეაჩერეს. რაკიდან ბურთი ჯაბა ბრეგვაძემ აიტაცა. მისი მოკლე დარტყმის შემდეგ ისევ რაკი წარმოიქმნა და ამჯერად ოთარ გიორგაძემ შეუტია. მისი მცდელობა შედეგიანი აღმოჩნდა. აბჟანდაძემ ესეც გარდასახა და ანგარიშში სხვაობა ორ ქულამდე შეამცირა - 17:19.

69-ე წუთზე საქართველოს ნაკრებმა 15-ფაზიანი იერიში განახორციელა. შეტევაში უკლებლივ ყველა მორაგბემ მიიღო მონაწილეობა. ბოლო მომენტში შეცვლაზე შესულმა შალვა სუთიაშვილმა რაკიდან მოკლე დარტყმის ნაცვლად მარჯვნივ, მოკლე ფრთაზე აფრასიძეს გაუტანა ბურთი, რომელიც მეტოქეს ხელიდან დაუსხლტა და ლელო გაიტანა. აბჟანდაძემ ესეც გარდასახა - 24:19. ოთხ წუთში მანვე საჯარიმოდან კიდევ უფრო დააწინაურა "ბორჯღალოსნები" - 27:19.

მატჩის შემდეგ

სტივ ჯექსონი, სამოას ნაკრების მთავარი მწვრთნელი:
"მეორე ტაიმში საქართველოს ნაკრებმა თამაშის ტემპი შეცვალა, ორთაბრძოლებში გვაჯობა და ინიციატივას დაეუფლა. სწორედ ყოველივე ამის გამო დავმარცხდით.. ვიცოდით, რომ საქართველოს ნაკრები ფიზიკურად ძლიერი გუნდია, სტატიკაში უპირატესობის მოპოვებას ეცდებოდა და საბოლოოდ ასეც მოხდა. მოვიკოჭლებდით სათამაშო დისციპლინაშიც, რამდენიმე არასაჭირო ჯარიმა ავიღეთ და ამის გამო დავისაჯეთ".
მილტონ ჰეიგი, საქართველოს ნაკრების მთავარი მწვრთნელი:

"გახარებულები ვართ. აღსანიშნავია, რომ სამი დებიუტანტი გვყავდა. ზოგადად, ახალგაზრდული გუნდით ვითამაშეთ და ასეთ პირობებში მსგავსი თამაშის მოგება ორმაგად სასიხარულოა. ამ ბიჭებმა გამოამჟღავნეს სიმამაცე, ხასიათი და გვანახეს, რომ შეუძლიათ მეორე ტაიმში დაბრუნება და მატჩის მოგება. ძალიან კარგები იყვნენ დებიუტანტები, განსაკუთრებით, თუ მათ ასაკს გავითვალისწინებთ.

მეტოქის გუნდში ძალიან კარგი 15 მორაგბე თამაშობდა, რომლებსაც ჩვენზე არანაკლებ უნდოდათ მოგება. პირველ ტაიმში რამდენიმე ბოჭვა გაგვიცუდდა, მეტოქემ მოახერხა ჩვენი წნეხში მოქცევა, რაც პოლინეზიურ გუნდებს სჩვევიათ. შესვენებაზე სწორედ ამაზე ვისაუბრეთ, შეცდომები გამოვასწორეთ და დაღლილ მეტოქეს შეცდომების დაშვება ვაიძულეთ.

ყოველთვის მნიშვნელოვანია ის 23 მოთამაშე, რომლებიც სამატჩო განაცხადში არიან. შეცვლაზე შესულმა ბიჭებმა თამაშის მსვლელობა შეცვალეს, მაგრამ არ უნდა დაგვავიწყდეს, რომ სასტარტო 15-ში მყოფმა მორაგბეებმა დაღალეს მეტოქე, რასაც ახლების ენთუზიაზმი დაემატა და ამან სასურველ შედეგამდე მიგვიყვანა".

მერაბ შარიქაძე, საქართველოს ნაკრების კაპიტანი:
"ასეთ ძლიერ გუნდთან, რაც ნაკრებში ვარ, ამხელა ჩამორჩენის აღმოფხვრა პირველად მოვახერხეთ. ყოველი გაშვებული ლელოს შემდეგ, როდესაც ბიჭები ვიკრიბებოდით, ვამბობდით, რომ უნდა ვყოფილიყავით მომთმენები, არ უნდა ჩაგვეთვალა თამაში წაგებულად. ვფიქრობ, ამ კუთხით გავიზარდეთ. წარსულში, მსგავს სიტუაციაში შეიძლება ყურები ჩამოგვეყარა, გვეფიქრა, მეტოქეს ვეღარ დავეწევითო, თუმცა ახლა სხვაგვარად იყო და საბედნიეროდ შევძელით სასურველი შედეგის ჩვენება.

როგორც იქნა, გულშემატკივარი გავახარეთ, თავდადებამ გაამართლა და შესაძლოა, დღეს ეს გამარჯვება ავღნიშნოთ, მაგრამ თავში ყველას ტონგასთან მატჩი გვიტრიალებს, რომელიც უფრო დიდ სტადიონზე ჩატარდება და გულშემატკივარს ერთად გამარჯვებისკენ მოვუწოდებ".

გასულ უქმეებზე 2019 წლის მსოფლიოს თასზე საქართველოს ნაკრების ყველა მეტოქემ ითამაშა. ფიჯის ნაკრები ჩვენს თანაჯგუფელ ურუგვაის შეხვდა და დიდი ანგარიშით 68:7 დაამარცხა. ასევე დიდი ანგარიშით მოიგო უელსმაც, რომელმაც ჩვენს მომავალ მეტოქეს ნოემბრის ტესტებზე, ტონგას ნაკრებს 74:24 მოუგო. ავსტრალიელებმა კი სტუმრად სძლიეს იტალიის ეროვნულ გუნდს 26:7.
სხვა მატჩებიდან აღსანიშნავია ირლანდიის ნაკრების გამარჯვება "ავივა სთედიუმზე" ახალი ზელანდიის ნაკრებთან - 16:9.

ტესტები
რუმინეთი-აშშ 5:31
ფიჯი-ურუგვაი 68:7
იტალია-ავსტრალია 7:26
უელსი-ტონგა 74:24
ესპანეთი-ნამიბია 34:13
ინგლისი-იაპონია 35:15
კანადა-გერმანია 29:10
შოტლანდია-ს. აფრია 20:26
ირლანდია-ახ. ზელანდია 16:9
საფრანგეთი-არგენტინა 28:13

ყოველდღიური სპორტული გაზეთი "ლელო"
953
მკითხველის კომენტარები / 0 /
მსგავსი ამბები
რუბრიკის სხვა სიახლეები
;