ნოემბრის ტესტები: იაპონიის პროგრესი, კანადის რეგრესი

2017 წლის ნოემბრის ტესტები უკვე ისტორიის საკუთრებაა. გასამართი დარჩა ერთადერთი მატჩი. 2 დეკემბერს უელსის ნაკრების "პრინსიპალიტი სთედიუმზე" სამხრეთ აფრიკის ეროვნულ გუნდს უმასპინძლებს.

ნოემბრის ტესტების ბოლო დღეს ორი მოულოდნელი შედეგი დაფიქსირდა. ყველაზე უცნაური საფრანგეთისა და იაპონიის ნაკრებების ფრე იყო - 23:23. "ამომავალი მზის" ქვეყნის შვილებმა, რომელთა შემადგენლობაშიც, სამართლიანობა მოითხოვს აღინიშნოს, რომ რამდენიმე ნატურალიზებული მორაგბეა, "ლე ბლოს" "სიცოცხლე გაუმწარეს". თამამად შეიძლება ითქვას, რომ ფრანგები ამ მატჩში წაგებას გადაურჩნენ.

იაპონელები, როგორც სჩვევიათ, სწრაფად და აგრესიულად თამაშობდნენ. ამას დაუმატეთ შერკინებაში საგრძნობლად გამოსწორებული თამაში და ფრანგები თითქმის უშანსოდ იყვნენ.

მეორე, ჩვენთვის გაცილებით საყურადღებო მატჩი ედინბურგში გაიმართა. შოტლანდიის ნაკრებმა დიდი ანგარიშით დაამარცხა 2019 წლის მსოფლიოს თასზე საქართველოს ნაკრების მეტოქე ავსტრალია - 53:34.

ვფიქრობთ, გადამწყვეტი როლი ამ მატჩში მაინც მატჩის არბიტრის სიმკაცრემ ითამაშა. მან განზრახ ბინძური თამაშისთვის ავსტრალიელთა პირველხაზელ სეკოპე კეპუს 39-ე წუთზე წითელი ბარათი უჩვენა და "ვოლაბები" მეორე ტაიმში მატჩის ბოლომდე კაცნაკლული დარჩნენ. იმ დროისთვის სტუმრები 12:10 იგებდნენ. რომ არა ეს ფაქტი, როგორ განვითარდებოდა მოვლენები, იოლი გამოსაცნობი არ არის.

ერთი სიტყვით, 40 წუთის განმავლობაში კაცნაკლულმა ავსტრალიამ შესანიშნავ ფორმაში მყოფ "ნარშავებს" ვერაფერი დაუპირისპირა და 29 ქულის სხვაობით წააგო.

ჩვენი ნაკრების კიდევ ერთმა მეტოქემ, უელსის ეროვნულმა გუნდმა შინ წააგო ახალი ზელანდიის ნაკრებთან - 18:33. "ოლ ბლექსმა" მეტოქეს ხუთი ლელო გაუტანა და საპასუხოდ მხოლოდ ორი მიიღო.

ფიჯის ნაკრები, რომელიც ასევე "ბორჯღალოსნების" მეტოქეა, 2019 წელს გასამართ მსოფლიოს თასის გათამაშებაში, საფრანგეთში კანადის ეროვნულ გუნდს დაუპირისპირდა და დიდი ანგარიშით 57:17 დაამარცხა.

ფიჯელებმა მეტოქეს ცხრა ლელო გაუტანეს და კანადელებს მხოლოდ ორის გატანის საშუალება მისცეს. შეიძლება ითქვას, რომ კანადელებმა დროზე უნდა მოიცილონ თავიდან უელსელი მწვრთნელი კინგსლი ჯოუნზი, წინააღმდეგ შემთხვევაში, გამორიცხული არ არის, მსოფლიოს თასის შესარჩევ მატჩში ურუგვაის ნაკრებთანაც დამარცხდნენ. ასეთი ცუდი სტატისტიკა "ნეკერჩხლის ფოთლებს" არასდროს ჰქონიათ. სამ მატჩში მათ 138 ქულა მიიღეს.

შეგახსენებთ, რომ კინგსლი ჯოუნზი ერთი ხანობა რუსეთის ნაკრების მთავარი მწვრთნელი იყო. სწორედ მისი თავკაცობის დროს დაამარცხა საქართველოს ნაკრებმა რუსთა გუნდი ისტორიაში ყველაზე დიდი ანგარიშით - 46:0.

ერთა თასის გათამაშებაში ჩვენი გუნდის მთავარმა მეტოქემ, რუმინეთის ეროვნულმა ნაკრებმა ტონგას უმასპინძლა და 20:25 დამარცხდა. რუმინელებს ამ მატჩში საფრანგეთში მოთამაშე წამყვანი მორაგბეები აკლდათ.

ყოველდღიური სპორტული გაზეთი "ლელო"
1921
მკითხველის კომენტარები / 0 /
მსგავსი ამბები
რუბრიკის სხვა სიახლეები
;