ნოემბრის ტესტები: ნოემბრის ციებ-ცხელება იწყება - ფიჯის უშველეს, რიგში სამოაა

ნოემბრის ტესტები გასულ უქმეებზე დაიწყო. თუმცა, ჯერ მხოლოდ ორი მატჩი გაიმართა. სრულყოფილად, მსოფლიოს საუკეთესო გუნდები ერთმანეთთან ბრძოლაში მომავალ უქმეებზე ჩაებმებიან.

ცხადია, საქართველოს ნაკრების მატჩების გარდა, საინტერესოა სამხრეთ ნახევარსფეროს, ანუ ოთხი ერის და ევროპის ექვსი ერის ქვეყნების დაპირისპირებები. ამას დაუმატეთ კუნძულელები და თვის ბოლომდე რაგბის გურმანებს ძალიან დაძაბული, ლამაზი ბრძოლები ელით.

დღეს ღია ვარჯიშია

სანამ სხვა დაპირისპირებაზე გადავალთ, ვიტყვით, რომ საქართველოს ეროვნული ნაკრები უკვე ინტენსიურად ვარჯიშობს კანადასთან მატჩისთვის, რომელიც 11 ნოემბერს გაიმართება. დღეს მილტონ ჰეიგის გუნდი "შევარდენზე" ღია ვარჯიშს გამართავს, რომელიც 16 საათზე დაიწყება. გულშემატკივართა დასწრება კი თავისუფალი იქნება.

ჩვენთვის ყველაზე საინტერესო, ცხადია, 2019 წლის მსოფლიოს თასზე ჩვენი მეტოქეების, ავსტრალიის, უელსისა და ფიჯის ნაკრებების მატჩებია. პირველი ორი შაბათს, "პრინსიპალიტი სთედიუმზე" (ყოფილი "მილენიუმი") დაუპირისპირდება ერთმანეთს.

"ვოლაბებს" შემადგენლობაში ფაქტობრივად პრობლემა არ აქვს. აი, "წითელ ურჩხულებს" კი, ტრავმიანობამ დარია ხელი. ნოემბრის ტესტებზე საქართველოს ნაკრების წინააღმდეგაც ვერ ითამაშებენ მორკინალები, გუნდის კაპიტანი სემ ვერბარტონი და ჯასტინ ტიპურიკი, უკანახაზელი ჯორჯ ნორსი.

ფიჯელები კი შაბათს იტალიის ნაკრებს დაუპირისპირდებიან. ეს შეხვედრა ორმაგად საინტერესოა. ამ მატჩში გამოჩნდება, რეალურად რას წარმოადგენს ჩვენი მომავალი მეტოქე მსოფლიოს თასზე და რამდენად ძლიერია იტალიის ეროვნული გუნდი, რომელიც ჩვენს კონკურენტად მოიაზრება ექვსი ერის გაფართოებასთან დაკავშირებულ კამპანიაში. ამასთან ერთად, შეგახსენებთ, რომ "ბორჯღალოსნები" იტალიას, მომავალი წლის ნოემბრის ტესტებზე ესტუმრებიან.

ფიჯის ნაკრების მთავარმა მწვრთნელმა ჯონ მაკკიმ ნოემბრის ტესტებისთვის გაფართოებული რაზმი ჯერ კიდევ ოქტომბრის შუა რიცხვებში დაასახელა. თითქმის ყველა უძლიერესი ფიჯელი მწყობრშია: ტიმოსი ნაგუსა, ჯოშუა ტუისოვა, პატრიკ ოსბორნი, ნემანი ნაგუსა, ვერენიკი გონევა, ნემანი ნადოლო, ლევანი ბოტია, ლეონე ნაკარავა და სხვები.

ინგლისი ორი მგეზავით

2019 წლის მსოფლიოს თასზე პლანეტის საუკეთესო გუნდის, ახალი ზელანდიის ნაკრების კონკურენტად ინგლისის ეროვნულ გუნდს მოიაზრებენ. ცხადია, ამ გუნდში ავსტრალიელი მწვრთნელის, ედი ჯონსის მისვლის შემდეგ ყველაფერი დადებითისკენ შეიცვალა. ცხადია, საინტერესოა, როგორ ჩაატარებენ "პომები" ნოემებრის ტესტებს. მათი მეტოქე პირველ მატჩში ჩვენთვის კარგად ნაცნობი არგენტინის ნაკრები იქნება.

ედი ჯონსმა, გუშინ, 26-კაციანი შემადგენლობა დაასახელა, რომელთაგან საბრძოლო გუნდს შეარჩევს. სავარაუდოდ, ავსტრალიელი გუნდს ორი მგეზავით ათამაშებს. ჯორჯ ფორდი და ოუენ ფარელი - ეს წყვილი წლეულს ექვსი ერის გათამაშებაში ხშირად ერთად იდგა მოედანზე. აღსანიშნავია, რომ ამასვე დანამდვილებით აპირებს ჩვენი მომავალი მეტოქის, უელსის ნაკრების ახალზელანდიელი თავკაცი უორენ გეთლენდი.

ინგლისი
შერკინება: ტომ კარი (სეილ შარქსი), ნათან ჰოგი (ვოსფსი), მარო იტოჯე (სარასენზი), ჯორჯ კრუსი (სარასენზი), ჯო ლანჩბერი (ვოსფსი), კორტნი ლოუ (ნორსჰემპთონი), კრის რობშო (ჰარლიქვინზი), სემ ანდერჰილი (ბასი), დენ კოლი (ლესტერ ტაიგერსი), ელის გენგე (ლესტერ ტაიგერსი), ჯიმი ჯორჯი (სარასენზი), დილან ჰარტლი (ნორსჰემპთონი), მაკო ვუნიპოლა (სარასენზი), ჰარი უილიამსი (ექსტერი);
უკანა ხაზი: მაიკ ბრაუნი (ჰარლიქვინზი), ელიოტ დეილი (ვოსფსი), ჯონი მეი (ლესტერ ტაიგერსი), სემესა როკოდუგუნი (ბასი), ენტონი უოტსონი (ბასი), დენი კერი (ჰარლიქვინზი), ოუენ ფარელი (სარასენზი), ჯორჯ ფორდი (ლესტერ ტაიგერსი), ჯონათან ჯოზეფი (ბასი), ალექს ლოზოვსკი (სარასენზი), ჰენრი სლედი (ექსეტერი), ბენ იანგზი (ლესტერ ტაიგერრსი).

სამოა გაკოტრდა

ამასობაში ცუდი ამბები მოვიდა სამოადან. ამ ქვეყნის პრემიერ-მინისტრმა საილელე მაილელაგოიმ, რომელიც იმავდროულად სამოას რაგბის კავშირის პრეზიდენტიცაა, განაცხადა:

"ჩვენ გავკოტრდით. ერთი სიტყვით, სამოას რაგბის კავშირი გადახდისუუნაროა. ეს ნიშნავს, რომ ბანკებს ვალს ვერ გადავუხდით. ასევე მორაგბეებისთვის გვჭირდება ფული, რათა მათ თამაშის გაგრძელება შეძლონ".

ინგლისის რაგბის კავშირმა გადაწყვიტა, სამოას ნაკრებს დაეხმაროს. 25 ნოემბერს, "პომები" სამოას შინ, "თვიქნემზე" მიიღებენ. აღსანიშნავია, რომ ინგლისელები შარშან ფიჯის ნაკრებსაც დაეხმარნენ. მაშინ ფიჯელების ვიზიტი ინგლისელებს 75 ათასი გირვანქა სტერლინგი დაუჯდათ. დაახლოებით ამდენივე თანხის გაღება მოუწევთ ამჯერადაც.

სამოა შაბათს, ედინბურგში "მერიფილდზე" შოტლანდიის ნაკრებს დაუპირისპირდება.

შავების უხერხული მეტოქე

არანაკლებ საინტერესო იქნება კიდევ ორი წყვილის - საფრანგეთი-ახალი ზელანდიისა და ირლანდია-სამხრეთი აფრიკის - დაპირისპირებები. პირველ წყვილში ბუქმეიკერები "ოლ ბლექსს" აბსოლუტურ ფავორიტად მიიჩნევენ. თუმცა ფრანგები ახალზელანდიელებისთვის ტრადიციულად უხერხულ მეტოქეებად მიიჩნევიან.

აი, "სამყურებსა" და "ბოკეს" შორის გამარჯვებულის წინასწარ გამოცნობა ფაქტობრივად, შეუძლებელია. არადა, ირლანდიელები შესანიშნავ ფორმაში არიან და შინ ძნელად თუ რამეს დათმობენ. მით უფრო, რომ "ბოკეს" მწვრთნელმა ალისტერ კუციამ ირლანდიის ნაკრებს ევროპის "ოლ ბლექსი" უწოდა.

ნოემბრის ტესტები
10 ნოემბერი
ბარბაროსები-ტონგა

11 ნოემბერი
საქართველო-კანადა
გერმანია-ბრაზილია
იტალია-ფიჯი
შოტლანდია-სამოა
ინგლისი-არგენტინა
უელსი-ავსტრალია
ირლანდია-სამ. აფრიკა
საფრანგეთი-ახ. ზელანდია

18 ნოემბერი
იტალია-არგენტინა
ნამიბია-ურუგვაი
უელსი-საქართველო
ინგლისი-ავსტრალია
ესპანეთი-კანადა
გერმანია-აშშ
რუმინეთი-სამოა
იაპონია-ტონგა
შოტლანდია-ახ. ზელანდია
ირლანდია-ფიჯი
საფრანგეთი-ს. აფრიკა

25 ნოემბერი
საქართველო-აშშ
გერმანია-ჩილე
იტალია-სამ. აფრიკა
ნამიბია-ურუგვაი
შოტლანდია-ავსტრალია
ესპანეთი-ბრაზილია
ინგლისი-სამოა
რუმინეთი-ტონგა
ფიჯი-კანადა
უელსი-ახ. ზელანდია
ირლანდია-არგენტინა
საფრანგეთი-იაპონია

2 დეკემბერი
უელსი-ს.აფრიკა.

ყოველდღიური სპორტული გაზეთი "ლელო"
1261
მკითხველის კომენტარები / 0 /
მსგავსი ამბები
რუბრიკის სხვა სიახლეები
;