"ნონამ" ევროტიტული დაიბრუნა - ევროპის საკლუბო თასი ერთი წლით ბათუმში დარჩება

* ბათუმის "ნონა" ევროპის საკლუბო თასის მფლობელია.
* ქართულმა გუნდმა 11 ქულა მოაგროვა და აზერბაიჯანულ "ოდლარ იურდუს" დამატებითი მაჩვენებლის წყალობით აჯობა.
* "ნონას" ევროპის საკლუბო თასი აქამდე 2014 და 2015 წლებში ჰქონდა მოპოვებული.

მოჭადრაკეთა ევროპის საკლუბო თასზე ბათუმის "ნონამ" ქალთა შორის 2014-2015 წლებში პირველი ადგილები დაიკავა, შარშან ვერცხლს ("მონტე კარლომ" გაუსწრო) დასჯერდა. ახლა კი თასის 22-ე გათამაშებაში ზღვისპირელებმა 14 შესაძლებლობიდან 11 გუნდური ქულა მოაგროვეს და ტიტული დაიბრუნეს.


გასულ უქმეებზე შვეიცარიული სისტემით შეჯიბრების ბოლო ორი ტურის პაექრობები გაიმართა. მეექვსე ტურში "ნონამ" რუსულ "ლეჯესის" 3:1 აჯობა: ნანა ძაგნიძემ პირველ დაფაზე შავი ფიგურებით ალინა კაშლინსკაიას მოუგო, ნინო ბაციაშვილმა, ასევე, შავებით მესამე დაფაზე დარია ვოიტს სძლია, ხოლო ჰარიკა დრონავალი და ბელა ხოტენაშვილი, შესაბამისად, ეკატერინა კოვალევსკაიას და ანასტასია სავინას დაუზავდნენ.

ტურის დანარჩენი შეხვედრები ასე დასრულდა: "იუგრა" (რუსეთი) -"ოდლარ იურდუ" (აზერბაიჯანი) 2:2, "ბოსა ნოვა" (ბელარუსი)-"ანატოლია" (თურქეთი) 3:1, "სტუდენტეს მედიცინა" (რუმინეთი) -"აეგენი" (თურქეთი) 4:0, "ფილიდორი" (საფრანგეთი) -"ბეერ შევა" (ისრაელი) 2:2, "მარმარა" (თურქეთი) -"მედიტერანიანი" (თურქეთი) 4:0.


ბოლო მე-7 ტურში ბათუმელები რუმინელებს დაუზავდნენ: "ნონა"-"სტუდენტეს მედიცინა" 2:2 (ნანა ძაგნიძე-ელიზაბეტ პეტცი 0.5:0.5, ჰარიკა დრონავალი-მიხაელა სანდუ 0.5:0.5, ნინო ბაციაშვილი-ელენა კოსმა 0:1, ბელა ხოტენაშვილი-ანჟელა დრაგომირესკუ 1:0); მართალია, აზერბაიჯანის "ოდლარ იურდუმ" ბოლო ტურში მასპინძელთა "მარმარა" დაამარცხა 2.5:1.5 და, "ნონას" მსგავსად, 11 გუნდურ ქულას მოუყარა თავი, მაგრამ აზერბაიჯანელები ზღვისპირელებს დამატებითი მაჩვენებლებით ჩამორჩნენ და ვერცხლის მედალს დაყაბულდნენ. "ბოსა ნოვამ" და "იუგრამ" ფინიშზე, შესაბამისად, "ფილიდორი" და "მედიტერანიანი" დაჯაბნეს (4:0, 4:0) და 10-10 ქულა მოაგროვეს. უკეთესი კოეფიციენტით ბრინჯაოს მედალი ბელარუსებს ერგოთ. დანარჩენი ორი შეხვედრის შედეგები: "ბეერ შევა"-"ლეჯესი" 1:3, "აეგენი"-"ანატოლია" 1:3.


საბოლოო მდგომარეობა: "ნონა" (ბათუმი) - 11, "ოდლარ იურდუ" (აზერბაიჯანი) - 11, "ბოსა ნოვა" (ბელარუსი) - 10, "იუგრა" (რუსეთი) - 10, "ლეჯესი" (რუსეთი) - 8, "სტუდენტეს მედიცინა" (რუმინეთი) - 8, "ანატოლია" (თურქეთი) - 8, "მარმარა" (თურქეთი) - 6, "ბეერ შევა" (ისრაელი) - 5, "ფილიდორი" (საფრანგეთი) - 5, "აეგენი" (თურქეთი) - 2, "მედიტერანიანი" (თურქეთი) - 0 ქულა.


ევროპის თასის მოპოვებაში დაფების მიხედვით "ნონას" (დელეგაციის ხელმძღვანელი გიორგი ჭანტურია, კაპიტანი მარიკა ჯაფარიძე, მწვრთნელები - დავით ჯოჯუა და ხვიჩა სუპატაშვილი) წევრთა პირადი წვლილი ასეთია: ნანა ძაგნიძე - 5 (7 პარტიიდან), ჰარიკა დრონავალი - 3 (6), ნინო ბაციაშვილი - 4.5 (6), ბელა ხოტენაშვილი - 4 (6), სალომე მელია - 1 (3). პირველ და მესამე დაფებზე ნანა ძაგნიძემ და ნინო ბაციაშვილმა ოქროს მედლები დაიმსახურეს, მე-4 დაფაზე ბელა ხოტენაშვილს ბრინჯაო ხვდა.

ვაჟთა თასის 33-ე გათამაშებაში პირველი ადგილი "ოდლარ იურდუმ" (აზერბაიჯანი) მოუგო.

ანტალიაში 7-დან 15 ოქტომბრის ჩათვლით, ევროპის თასის პარალელურად, ფიდეს 88-ე კონგრესიც გაიმართა, რომელმაც ნინო ბაციაშვილს ვაჟებში დიდოსტატის წოდება, ხოლო საჭადრაკო კლუბ "ნონას" მენეჯერსა და კაპიტან მარიკა ჯაფარიძეს საერთაშორისო არბიტრის უმაღლესი (A) კატეგორია მიენიჭა. საგულისხმოა, რომ მარიკა მსოფლიოში ყველაზე ახალგაზრდა A კატეგორიის მსაჯია.

 ყოველდღიური სპორტული გაზეთი "ლელო"

1238
მკითხველის კომენტარები / 0 /
მსგავსი ამბები
რუბრიკის სხვა სიახლეები
;