ნუგზარ სხირელი: იმედი მაქვს, უსაფრთხოების მაქსიმალური დაცვით, ვარჯიშის უფლებას მალე მოგვცემენ


კორონავირუსის გავრცელების პრევენციის მიზნით განხორციელებული ღონისძიებები ცხადია სპორტსაც შეეხო. უკვე თვეზე მეტია სპორტსმენები დარბაზებში ვეღარ ვარჯიშობენ, შეჩერდა სხვადასხვა რანგის და მასშტაბის სპორტული ღონიძიებებიც.
რა თქმა უნდა, საინტერესოა, რა მეთოდებს მიმართავენ სპორტსმენები ფორმის შესანარჩუნებლად, ან რას ფიქრობენ შექმნილ ვითარებაზე მწვრთნელები.
ამის თაობაზე ვესაუბრეთ ცნობილ გორელ სპეციალისტს ნუგზარ სხირელს.


– რა თქმა უნდა, შექმნილი ვითარება ნეგატიურად მოქმედებს სპორტსმენთა ფორმაზე. მათ ფაქტობრივად, მთელი წლის ნაშრომი წყალში ეყრებათ. განსაკუთრებით სპორტის გარეშე პატარების დარჩენა მაშფოთებს. დიდები კიდევ რაღაცას ახერხებენ – კროსზე სხვადასხვა მიმართულებით დარბიან. მოჭიდავეებზე, რომლებსაც უნდა ეასპარეზათ კადეტებში, ახალგაზრდებში და ა.შ. ასეთი გათიშვა სპორტიდან ნეგატიურად იმოქმედებს. ვშიშობ, განახლების შემდეგ გარკვეული ნაწილი სპორტს არ ჩამოშორდეს. მე მაგალითად მომხრე არა ვარ სრული იზოლაციის. ვფიქრობ, ნება უნდა დაგვრთონ, რომ დარბაზში შემოვიდნენ ბავშვები და კონტაქტის გარეშე, ფიზიკურ ძალაზე ივარჯიშონ. იქნებ ასეთი გამოსავალიც მოიძებნოს: ჩვენს დარბაზში მაგალითად არის 15 ტრენაჟორი, რამდენიმე დღეში ერთხელ რომ ჩატარდეს სრული დეზინფექცია, შემოვიდნენ მოჭიდავეები შეზღუდული რაოდენობით (პირობითად ათამდე ბავშვი), ხელთათმანებით და ტრენაჟორებზე, რომლებიც ერთმანეთისგან 2 მეტრითაა დაშორებული ივარჯიშონ. ისინი როცა დაასრულებენ ვარჯიშს და გავლენ, სპეციალური ხსნარით ისევ დაიმუშავებენ ხელებს და დატოვებენ შენობას. მომდევნო საათში კიდევ სხვა ჯგუფი შემოვა და ასე…

- ალბათ ხშირად ეკონტაქტებით ლადო ხინჩეგაშვილს, გენო პეტრიაშვილს, როგორ ვარჯიშობენ ისინი?
- კი, რა თქმა უნდა, ხშირად ვეხმაურები მათაც და სხვებსაც. ისინი ვარჯიშობენ სახლის პირობებში, ზოგჯერ გარეთაც, მაგრამ აბა ასე როგორ მოხდება სპორტული ფორმის შენარჩუნება? სამწუხაროდ, ამ იძულებითმა პაუზამ ზოგ სპორტსმენს შესაძლოა უარყოფითი კვალი დაამჩნიოს.

- ბატონო ნუგზარ, წლეულს, როგორც ოლიმპიურ წელს, მსოფლიოს ჩემპიონატი ჭიდაობაში დაგეგმილი იყო მხოლოდ არაოლიმპიურ წონებში. ახლა, როდესაც ოლიმპიადა გადაიდო, ალბათ უკეთესია, შემოდგომით დაგეგმილი ეს მსოფლიოს ჩემპიონატი უკვე ყველა წონაში ჩატარდეს. ამის თაობაზე ხომ არაფერი ინიციატივა ჰქონდა ჭიდაობის მსოფლიო ორგანიზაციას?

- ჯერჯერობით მე არ მსმენია, მაგრამ ძალიან კარგი იქნება თუ ასე მოხდება. მე სულაც ინიციატივით გამოვდივარ, რომ შემოდგომით ეს მსოფლიოს ჩემპიონატი საქართველოში და თანაც ყველა წონაში ჩატარდეს. ჩვენ, როგორც ვირუსით ნაკლებად დაზარალებული ქვეყანა, საამისოდ უფრო მზად ვიქნებით. რასაკვირველია, ასეთ შეჯიბრების ჩასატარებლად ყველა შესაბამისი უსაფრთხოების ნორმის დაცვა იქნება საჭირო, აგრეთვე სხვა ნიუანსები, რომლებიც ცალკე დეტალურად სამსჯელო თემაა. მოკლედ, თუ შემოდგომისთვის ვითარება სათანადოდ განმუხტული იქნება, მსოფლიოს ჩემპიონატის სრულყოფილად ჩატარება, უსაფრთხოების წესების მაქსიმალური დაცვით, საქართველოს სხვა ბევრ ქვეყანაზე უკეთ შეეძლება. ამასთან, ყველა ვხედავთ, რომ ნელ-ნელა ისეთმა განვითარებულმა ქვეყნებმა, რომელთაც მოსახლეობის ძალიან დიდი ნაწილი ჰყავთ დაინფიცირებული მაინც დაიწყეს გარკვეული შეზღუდვების მოხსნა. იქნებ ჩვენთანაც მალე გადაიდგას ეს ნაბიჯი. როცა სახელმწიფო შეზღუდვებს მოხსნის, სასურველი იქნება, რომ შიდა შეჯიბრებების ჩატარების უფლებებიც მალე მოგვცენ. თავდაპირველად უმაყურებლოდ, მაგრამ მთავარია დაიძრას ეს ყინული.

1183
მკითხველის კომენტარები / 0 /
მსგავსი ამბები
რუბრიკის სხვა სიახლეები
;