ნუგზარ სხირელი მსოფლიოს ჩემპიონატის წინ: ლადო ხინჩეგაშვილს მარჯვენა ხელის ფალანგები აწუხებდა

20 ოქტომბერს თავისუფალი სტილით მოჭიდავეები ბუდაპეშტში მსოფლიოს ჩემპიონატში ჩაებმებიან. მათ შორის იქნებიან ჩვენი გუნდის გორელი ლიდერები - ოლიმოპიური და მსოფლიოს ჩემპიონი, ევროპის სამგზის ტრიუმფატორი ვლადიმერ ხინჩეგაშვილი (65) და ევროპისა და მსოფლიოს ჩემპიონი, ოლიმპიური პრიზიორი გენო პეტრიაშვილი (125).

როგორც გაირკვა, ორივე მათგანმა ბოლო შეკრება ჯანმრთელობის გარკვეული პრობლემებით გაიარა. ამის შესახებ დუშეთში, საკონტროლო შეხვედრებისას მათმა პირადმა მწვრთნელმა ნუგზარ სხირელმა გვითხრა, რომელსაც შეგირდების მსოფლიოსთვის მზადებაზე კომენტარი ვთხოვეთ:

- ევროპის ჩემპიონატის შემდეგ მსოფლიოსთვის მოსამზადებელი პროცესი ჩვეულებრივად წარიმართა, როგორც ყოველთვის ვემზადებოდით. უბრალოდ, ვლადიმერ ხინჩეგაშვილს მარცხენა ფეხის ტერფი ჰქონდა დაზიანებული და მას მკურნალობდა, თუმცა თაბაშირი არ დასჭირვებია, ახლა კი მარჯვენა ხელის ფალანგები აწუხებს. მთელი შეკრების განმავლობაში ასე გადახვეული ხელით ვარჯიშობდა, მაგრამ ის ისეთი მებრძოლი სპორტსმენია, სადაც საჭიდაოა, მაინც იჭიდავებს. მისთვის მთავარი პრობლემა მაინც წონის გამოცვლაა. ძნელია, ერთ წონას გადაახტე და ევროპის ჩემპიონატზეც ეს იყო მისი ხარვეზი - ჯერ კიდევ ვერ იყო მორგებული ახალი წონის კონდიციებს. თვითონ ყველანაირად არეგულირებს საკუთარ თავს და არა მგონია, ეს პროცესი გაეწელოს. პროგნოზების გაკეთება არ მჩვევია, მაგრამ, ვფიქრობ, ოლიმოიადაზე მედლისთვის იბრძოლებს. მანამდე დიდი დროა და შეეჩვევა ახალ წონას. ყველამ იცის, რომ ის დამოუკიდებელი სპორტსმენია თავისი ჭიდაობით, თავისი სტილით, საქმისადმი დამოკიდებულებით და თავად იცის საკუთარი საქმე. თამამად ვიტყვი, რომ ჭიდაობის სამყაროში მსოფლიოს მასშტაბით ვინც კი ყოფილა, ასეთი სპორტსმენი იშვიათია. მე ყოველთვის თავს ვიკავებ მისთვის რაიმე მკვეთრი რჩევების მიცემისგან. მას სხვისი სასწავლი არაფერი სჭირს და მეცინება, როცა ვიღაც ჭკუის დარიგებას დაუწყებს ხოლმე.

მსოფლიოსთვის თავისუფლების სია ცნობილია

რაც შეეხება გენო პეტრიაშვილს, მას თავისი მაქსიმუმი ჯერ კიდევ გასაკეთებელი აქვს და არა მხოლოდ ამ მსოფლიოს ჩემპიონატზე - ყველაფერი უნდა დაგვირგვინდეს 2020 წელს, ტოკიოს ოლიმპიადაზე.

ამ მსოფლიოს ჩემპიონატისთვის მოსამზადებელ პერიოდს რაც შეეხება, იქ წინა შეკრებიდან ბორჯომიდან გაციებული ჩამოვიდა და დუშეთში ამ შეკრების განმავლობაშიც რამდენიმე გაციებული იყო, თუმცა ექიმებმა ყველაფერი გააკეთეს და დღეს უკვე კარგ ფორმაშია. რასაც ვუყურებ მის მომზადებას, მოემზადა, კმაყოფილი ვარ. ევროპის ჩემპიონატზე თუ უკმაყოფილო ვიყავი მისით, დღეს ეს შეგრძნება აღარ მაქვს.

როგორც ვხედავთ, მთლიანობაში, მწვრთნელი შეგირდების ამჟამინდელი ფორმით კმაყოფილია, თუმცა პეტრიაშვილი საკონტროლო შეხვედრებში თითქოს ადრინდელზე უფრო იღლებოდა. სპარინგებისას ყველა პაექრობა არც ხინჩეგაშვილს მოუგია, მაგრამ ის მართლაც ისეთი ჩამოყალიბებული სპორტსმენია, საჭირო დროს ყოველთვის შეუძლია მაქსიმალური მობილიზება.

1504
მკითხველის კომენტარები / 0 /
მსგავსი ამბები
რუბრიკის სხვა სიახლეები
;