ნუგზარ წურწუმიას წარმატება ბუნდესლიგაში

ტრადიციულად,  გერმანიის საჭიდაო ბუნდესლიგის სხვადასხვა ლიგაში წლეულსაც გამოდიან ქართველები და საკმაოდ წარმატებითაც, თუმცა ამ პერიოდში ჩვენები იქ შედარებით ნაკლებად ჭიდაობენ. მიზეზი ისაა, რომ, მართალია, სეზონის მთავარი შეჯიბრებები უკვე ჩამთავრდა, მაგრამ ორივე ნაკრებს მაინც სადაგი დღეები აქვს - მსოფლიოს თასი, მსოფლიოს საკლუბო ჩემპიონატი და ყველაზე მთავარი: საქართველოს თასი, რომელიც 8-13 დეკემბერს ბათუმში ჩატარდება. ის მთავარი შესარჩევი შეჯიბრებაა ჩვენი გუნდებისთვის და ამიტომ იქ გამოსვლას ყველა ლიდერი გეგმავს. უფრო სწორად, ფედერაციაც ამას მოითხოვს და გასაგებია, რომ მთავარ მწვრთნელებს წამყვანი ფალავნები შეკრებებზე ჰყავთ.

თუმცა ბოლო დღეებში ჩვენმა რამდენიმე წამყვანმა მოჭიდავემ მაინც იჭიდავა გერმანიაში. მაგალითად, სამხრეთ-აღმოსავლეთის ლიგაში „იოჰანის ნიურნბერგის“ შემადგენლობაში წარმატებით იჭიდავა ბერძნულ-რომაულ ჭიდაობაში ჩვენმა მსოფლიოს ჩემპიონმა ნუგზარ წურწუმიამ, ვინც იქ 57 კილოგრამში გამოვიდა - ბუნდესლიგაში გასნხვავებული წესებია, რაც წონით კატეგორიებსაც ეხება. თუმცა ამას ხელი არ შეუშლია 55 კილოგრამის მოჭიდავე წურწუმიასთვის, ბრწყინვალედ დაემარცხებინა გერმანელი ფაბიან შმიტი - 11:5. სამწუხაროდ, ამან ნიურნბერგელებს ვერ უშველა - ეს კლუბი საკუთარ კედლებში 9:23 დამარცხდა „ბურგჰაუზენთან“. იმედია, ნიურნბერგელები 23 ნოემბერს ასევე შინ გაცილებით უფრო წარმატებით იჭიდავებენ „შორნდორფთან“.

სამაგიეროდ, ჩრდილო-დასავლეთის ბუნდესლიგაში თავის კლუბს - „მაინც 88“ გამარჯვებაში მნიშვნელოვნად დაეხმარა ქვიშის ჭიდაობაში მსოფლიოს პირველი თამაშების გამარჯვებული ლევან ქელეხსაშვილი (75): მან პირად შეხვედრაში 15:9 დაამარცხა ლუკას დიელი, მისმა კლუბმა კი 20:9 სძლია „კლაინოშტაიმს“. 23 ნოემბერს მაინცელები „ვიტენს“ ესტუმრებიან.

რეგიონალლიგაში წარმატებით იასპარეზა „გერმანიან სულგენის“ ქართველმა მძიმეწონოსანმა ომარ გუსოშვილმა - 6:2 მოუგო საკმაოდ ძლიერ ბულგარელ დიმიტარ კუმჩევს. თუმცა თავად კლუბი სტუმრად მაინც დამარცხდა „ტენენბრონთან“: 4:31. „ამჯერად გერმანიან სულგენს“ ჩვენი სხვა ლეგიონერები - დიმიტრი ბასილაშვილი (75) და ვასილ იმერლიშვილი (130) დაემატნენ. ვნახოთ, დაიხმარს თუ არა კლუბი მათ 22 ნოემბერს შინ „ჰოფშტეტენთან“.

სამწუხაროდ, ბრანდებურგლიგაში დიდი ანგარიშით - 0:18 დამარცხდა „ლიუბტეენის“ საბა ტყებუჩავა (52) ლენი მანტაუსთან.

ჰესენის მიწის ობერლიგაში თავის „რიმბახს“ წარმატებაში დაეხმარა გიორგი ბალიაშვილი (75) - ჩვენებურმა 0:12 მოუგო თურქ ალი ჩან ჩაკიჩს, კლუბმა კი გასვლაზე 17:14 მოუგო „ნიომბრის-კიონიგშოფენს“.

731
მკითხველის კომენტარები / 0 /
მსგავსი ამბები
რუბრიკის სხვა სიახლეები
;