ნუ იფურთხებით, სერ ჯეიმ!.. მაინც, რა მოხდა ასეთი?

ძალიან უცნაურ და უსიამოვნო ისტორიაში გაეხვია ჯეიმი კარაგერი - ინგლისური ფეხბურთის ახლო წარსულის ვარსკვლავი, ვინც აქტიური საფეხბურთო კარიერის შემდეგ მაინც ვერ შეეშვა თავისი ცხოვრების აზრს და ექსპერტობა გადაწყვიტა მეტად პოპულარულ "სქაი სპორტზე".

აქამდე, კარაგერს ეს საქმე კარგად გამოსდიოდა, თუმცა მომავლისა რა გითხრათ - კითხვის ნიშნის ქვეშ დადგა საფეხბურთო ექსპერტისა და მთელ ბრიტანეთში დიდად პატივცემული კაცის კარიერა.

მაინც, რა მოხდა ასეთი?..

...მოგეხსენებათ, შაბათს ინგლისში დიდი მატჩი იყო. გრანდთა ომში "მანჩესტერ იუნაიტედმა" შინ 2:1 მოუგო "ლივერპულს". რა თქმა უნდა, ინგლისური ფეხბურთის ბომონდთან ერთად ამ დაპირისპირებას სხვა პატივცემული პირებიც ესწრებოდნენ.

თამაშის დასრულების შემდეგ კარაგერი თავის მანქანაში ჩაჯდა და შინ წავიდა. მან შენიშნა, რომ ახლოს მყოფი მანქანიდან ვიღაც უსიგნალებდა და ხელს უქნევდა. კარაგერმა ჩასწია ფანჯარა და დაინახა "იუნაიტედის" ფანი, რომელიც აგრესიული ჟესტებით ცდილობდა მისი ყურადღების მიქცევას.

რაღა შეხსენება გჭირდებათ, მაგრამ მაინც დავწეროთ: კარაგერი "ლივერპულის" ცოცხალი ლეგენდაა და, რა თქმა უნდა, მას "იუნაიტედის" ფანები ვერ იტანენ, რადგან ამ ორ კლუბს შორის ისტორიულად დაძაბული ურთიერთობაა.

კარაგერმა უყურა, უყურა ამ ფანს და... ვეღარ გაძლო - ფანჯრიდან გადააფურთხა. მოგეხსენებათ, ინგლისში მანქანები მარჯვენასაჭიანებია. ასე რომ, მძღოლი იოლად გადარჩა, მაგრამ ვერ გადარჩა 14 წლის გოგონა, რომელიც მძღოლის გვერდით, ფანჯარასთან იჯდა.

მამამ ეს ყველაფერი ტელეფონზე გადაიღო და ინტერნეტში ატვირთა. "შეხედეთ, ის ხომ ბავშვია, ასე მოქცევა როგორ შეიძლება?! ის ტიროდა. დამნაშავეა ის, ვინც ჩემს გოგონას ასე მოექცა. ჩემს შვილს არაფერი დაუშავებია. ეს არ არის მისაღები საქციელი", - თქვა გოგონას დედამ.

კარაგერმა კი აღიარა, რომ არც მეტი, არც ნაკლები, იმ მომენტში თავი დაკარგა: "შეიძლება, ზოგს მოეჩვენოს, რომ ეს იყო გაღიზიანების მცდელობა, მაგრამ ასე ნამდვილად არ ყოფილა. ეს იყო ბევრად მეტი.

კაცმა რამდენჯერმე გაიმეორა: "გამარჯობა, ჯეიმი, თქვენ 1:2 წააგეთ". ეს არ უნდა გამეკეთებინა, ასე არ უნდა მოვქცეულიყავი, მაგრამ რას აკეთებდა ამ დროს ზრდასრული ადამიანი? როცა გვერდით შვილი გიზის, სხვას არ უნდა მოექცე ისე, როგორც არ გინდა, რომ მოგექცნენ შენ".

მოგვიანებით, კარაგერმა გოგონას დაურეკა და ბოდიში მოუხადა. "კარგი, მადლობა ბოდიშისთვის", - იყო პასუხი.

ჯეიმიმ "ტვიტერის" მეშვეობითაც მოუხადა საზოგადოებას ბოდიში. "გარდიანის" ცნობით კი "სქაი სპორტმა" ერთკვირიანი უქმობა გამოუწერა კარაგერს და ისეც შეიძლება მოხდეს, რომ საერთოდ დაკარგოს სამუშაო..

ყოველდღიური სპორტული გაზეთი "ლელო"
1195
მკითხველის კომენტარები / 0 /
მსგავსი ამბები
რუბრიკის სხვა სიახლეები
;