ოთარ გაბელია: უზომოდ მტკივა გული... უპატიოსნესი, უწესიერესი ადამიანი იყო, უდიდესი ფეხბურთელი...

საქართველოს ნაკრები 15 ნოემბერს შვეიცარიის უპირველეს გუნდს დაუპირისპირდება. მეტოქეს საკადრო პრობლემები აქვს, არადა, დარჩენილ ორ თამაშს ვლადიმირ პეტკოვიჩის გუნდისთვის ოქროს ფასი ადევს...

შვეიცარიასთან მატჩის შემდეგ საქართველოს ნაკრები გადაინაცვლებს ხორვატიაში, სადაც ქალაქ პულაში მსოფლიოს ვიცე-ჩემპიონს ამხანაგურ მატჩში შეხვდება.

სანაკრებო მატჩის წინ და მათ შემდეგ "ლელო" ტრადიციულად ტრიბუნას უთმობს ქართული ფეხბურთის ავტორიტეტულ პერსონებს. ერთ-ერთი მათგანი ოთარ გაბელიაა - თბილისის "დინამოს" ლეგენდარული მეკარე, რომელიც მუდამ სიამოვნებით გვიზიარებს მოსაზრებებს...

თუმცა ბატონმა ოთარმა ჯერ რამდენიმე დღის წინ გარდაცვლილი ფირუზ კანთელაძე გაიხსენა...

- ფირუზ კანთელაძე ჩემი მეგობარი იყო... ჯერ კიდევ მიშასთან და სლავასთან ერთად ითამაშა... უზომოდ მტკივა გული... უპატიოსნესი, უწესიერესი ადამიანი იყო, უდიდესი ფეხბურთელი... ჯერ ტიტულები რომ ვნახოთ მარტო... ასეთი სუფთა ადამიანი იშვიათად მინახავს. ყველა მოვიდა, ყველამ დააფასა.... კახა კალაძემ, ლევან კობიაშვილმა, დათო მუჯირმა... სხვადასხვა თაობის ფეხბურთელებმა... აქ მუდმივად ვერავინ დავრჩებით, როცა წავალთ, ვალმოხდილები უნდა წავიდეთ. ფირუზმა ეს შეძლო... 

- სამწუხაროა... ახლა რაც შეეცხება შვეიცარიასთან მატჩს...

- რა თქმა უნდა, შვეიცარიის ნაკრები ძალიან ძლიერი გუნდია. ამას ადასტურებს ბევრი რამ, თუნდაც შვეიცარიელთა შემადგენლობა და ის გზა, რომელიც ვლადიმირ პეტკოვიჩის მიერ გაწვრთნილმა გუნდმა შესარჩევ ჯგუფში გაიარა. ამის მიუხედავად, ჩემი აზრით, საქართველოს ნაკრებმა შვეიცარიაში მხოლოდ მოსაგებად უნდა ითამაშოს. ჩვენი მეტოქისთვის ეს შეხვედრა ძალიან ბევრს ნიშნავს და შესაბამისად, წნეხის ქვეშაა. ეს საჩვენო ფაქტორია და უნდა გამოვიყენოთ, რადგან საქართველო ყოველგვარი ფსიქოლოგიური ზეწოლისგან თავისუფალია. შვეიცარიის სიძლიერეზე ლაპარაკი ჩემგან ზედმეტი იქნება. მე ვნახე ამ გუნდის თამაში გასვლაზე, დანიის ნაკრებთან და იმ მატჩში შვეიცარიელებმა მეტოქეზე უკეთესად ითამაშეს. ჩემი აზრით, ასევე ძალიან სასარგებლო იქნება ამხანაგური შეხვედრის გამართვა ისეთ ძლიერ გუნდთან, როგორიც არის ხორვატიის ეროვნული ნაკრები. შვეიცარიასა და ხორვატიასთან შეხვედრებში კიდევ არის ერთი ფაქტორი, რომელიც ჩვენმა სამწვრთნელო შტაბმა უნდა გაითვალისწინოს და მჯერა, ზუსტად ასეც იქნება...

- გულისხმობთ იმას, რომ ეს შეხვედრები ერთა ლიგის პლეი ოფისთვის უკეთ მოსამზადებლად უნდა გამოვიყენოთ?

- რა თქმა უნდა! ჩვენმა ნაკრებმა უნდა დახვეწოს ის სქემა და ტაქტიკური მონახაზი, რომელიც უნდა გამოვიყენოთ ერთა ლიგის ნახევარფინალში. გულშემატკივარს დააკმაყოფილებს მხოლოდ ნახევარფინალში გასვლა, უნდა მოვიგოთ ერთა ლიგა! უნდა ვითამაშოთ ევროპის ჩემპიონატზე! ასეთი შანსი ჩვენ აღარ გვექნება და ეს შანსი აუცილებლად უნდა გამოვიყენოთ.

- რამდენად აისახება საქართველოს ნაკრებზე ჯანო ანანიძისა და ჯიმი ტაბიძის არყოფნა?

- სამწუხაროა, რომ უახლოეს შეხვედრაში ეს ფეხბურთელები დაგვაკლდებიან. მეორე მხრივ, ნაკრების სამწვრთნელო შტაბი მზად უნდა იყოს, და დარწმუნებული ვარ, მზად იქნება საიმისოდ, რომ ეს დანაკლისი შეავსოს. ყველა გუნდსა და ნაკრებს აქვს "ხერხემალი", ძირითადი ბირთვი, მაგრამ არის მთლიანი სიაც და იმ სიაში არიან ისეთი ფეხბურთელები, რომელთაც შეუძლიათ, ეს დანაკლისი შეავსონ. შეავსონ ისე მაინც, რომ თუ ბევრს ვერაფერს გააკეთებენ, ბევრი მაინც არ გააფუჭონ. თანამედროვე ფეხბურთში ტრავმები და დისკვალიფიკაციები ჩვეულებრივი ამბავია. დღევანდელი ფეხბურთი ისეთ რიტმში ზის, რომ...

- თქვენ კარგად იცნობთ შვეიცარიის ნაკრების ამ თაობას...

- ცოტა შორიდან დავიწყებ. შვეიცარიის ნაკრებთან ჯერ კიდევ მაშინ მქონდა შეხება, როცა ეროვნული ნაკრების სამწვრთნელო შტაბში ვმუშაობდი. მაშინაც ძალიან კარგი გუნდი ჰყავდა შვეიცარიას. მართლა შემიძლია ვთქვა, რომ ამ თაობას კარგად ვიცნობ. სეფეროვიჩი, გავრანოვიჩი და სხვები ჩვენს წინააღმდეგ თამაშობდნენ, როცა მე ვიყავი საქართველოს ახალგაზრდული ნაკრების მწვრთნელი.

- თქვენი აზრით, რა კომპონენტი შეიძლება აღმოჩნდეს გადამწყვეტი შვეიცარიასთან შეხვედრაში?

- მიმაჩნია, რომ ჩვენი ნაკრებისთვის მთავარი იქნება ის, რომ ერთი წამითაც არ დაკარგოს კონცენტრაცია. კონცენტრაციის დაკარგვა არ შეიძლება არათუ შვეიცარიის დონის ძლიერ, არამედ სუსტ გუნდთანაც კი. ნათქვამია, ერთხელ ცოცხიც კი გაისვრისო. ყველამ ვნახეთ, რა მოხდა გიბრალტართან შეხვედრაში. ამასთან ერთად მაქსიმალურად უნდა მოვერიდოთ ტრავმებს. ერთა ლიგის ნახევარფინალისთვის ჯანმრთელი ფეხბურთელები გვჭირდება.

12765
მკითხველის კომენტარები / 0 /
მსგავსი ამბები
რუბრიკის სხვა სიახლეები
;