ოთარ გაბელია: ლივერპულის დამარცხებისთვის 150 მანეთი მოგვცეს, იმდენი, რამდენიც...

1979 წლის 3 ოქტომბერი ქართული ფეხბურთის ქომაგს არასოდეს დაავიწყდება. ჩემპიონთა ლიგის მეთექვსმეტედფინალის საპასუხო შეხვედრაში თბილისის "დინამომ" საშინაო მატჩში 3:0 მოუგო ვარსკვლავებით გაჭედილ "ლივერპულს". კოკისპირულ წვიმაში მთელმა საქართველომ უზომოდ გაიხარა. 

დინამო
3
ლივერპული
0

1979 წლის 3 ოქტომბერი. თბილისი. "დინამოს" სტადიონი
90000 მაყურებელი.
გოლები: 1:0 გუცაევი (55), 2:0 შენგელია (75) 3:0 ჩივაძე (პენ. 81)
დინამო: გაბელია, გ.მაჩაიძე, ჩივაძე, ხინჩაგაშვილი, ჭილაია, დარასელია, მ. მაჩაიძე, ქორიძე, გუცაევი, ყიფიანი, შენგელია
მწვრთნელი: ნოდარ ახალკაცი
ლივერპული: კლემენსი, ნილი, ირვინი, ტომპსონი, კენედი, ჰანსენი, დალგლიში, კეისი (ფეირკლო, 78), ჯონსონი, მაკდერმოტი, სუნესი
მწვრთნელი: რობერტ პეისლი
მსაჯი: ჰაინც ალდინგერი (გერმანია)

პირველი, ინგლისური შეხვედრა "ლივერპულმა" 2:1 მოიგო. ინგლისელები კოშმარულ სიზმარშიც კი ვერ წარმოიდგენდნენ იმას, რაც მაშინ საბჭოთა საქართველოს დედაქალაქში მოხდა.

იმ შეხვედრაზე თხრობა ლეგენდარული "დინამოს" მეკარეს, ოთარ გაბელიას ვთხოვეთ.

"დავიწყებ პირველი, ინგლისური მატჩით. მოგეხსენებათ, ის შეხვედრა 1:2 წავაგეთ. იმ თამაშზე ტრადიციულად მოსკოვიდან გავფრინდით. გაფრენის წინ რუსები გვეუბნებოდნენ, თქვენი მთავარი ამოცანა ისაა, როგორმე დიდი ანგარიშით არ წააგოთო. "ლივერპული" მაშინ დიდებული ფეხბურთელებით იყო დაკომპლექტებული. თამამად შეიძლება ითქვას, რომ ეს იყო მთელი ბრიტანეთის ნაკრები.

   გიორგი ნემსაძე: ასე დავამარცხეთ ბულგარეთი... [VIDEO]

მინიმალური ანგარიშით წავაგეთ. თავიდან მაგრად კი მოგვაწვნენ, მაგრამ გავძელით. ამ თამაშში მოხდა ერთი საინტერესო ეპიზოდი: ინგლისელი ქომაგების ნაღდი კერპი იყო კენი დალგლიში. მაღალი ბურთი დაიკიდა ჩემს საჯარიმოში. იმანაც ჩამარტყა და მეც ჩავარტყი ბურთზე ბრძოლისას.

თითქოს, არაფერი იყო განსაკუთრებული, მაგრამ გაგიჟდა ინგლისელი ქომაგი. ინგლისში როგორცაა, იცით – არაა სარბენი ბილიკები და დამაყარეს "კოკა-კოლას" და "ფანტას" ქილები, შეწყდა რამდენიმე წუთით თამაში.

...თბილისური მატჩის დღეს კოკისპირულად წვიმდა. წვიმა ძალიან უყვართ ბრიტანელებს, მაგრამ ისე გამოვიდა, რომ ჩვენი დიდი გამარჯვება სწორედ ამ დღეს გამოიჭედა. მერე ხშირად ვამბობდით ბიჭები, წვიმა ინგლისური კი არა, ქართული ამინდიაო.

რა გვითხრა თამაშის წინ ნოდარ ახალკაცმა? ერთადერთი, რაზეც ამახვილებდა ის ყურადღებას, ეს იყო ის, რომ მთელი შეხვედრის განმავლობაში, როგორიც არ უნდა ყოფილიყო ანგარიში, ყურადღება არ უნდა მოგვედუნებინა, წამითაც არ უნდა დაგვეკარგა კონცენტრაცია.

რამ განაპირობა ეს მოგება? რა თქმა უნდა, ჩვენ სწორად ვითამაშეთ და დავჯაბნეთ ეს მართლაც დიდი გუნდი, მაგრამ ალბათ ძალიან გაგვიჭირდებოდა, რომ არა გულშემატკივარი. ასეთი ქომაგობა მე არ მინახავს, ამდენი გულშემატკივარი კი ალბათ ერთხელ ვნახე "დინამოს" სტადიონზე, როცა საქართველოში გერმანიის ეროვნული ნაკრები ჩამოვიდა.

"ლივერპული" რაღაც მომენტში დაიბნა. მათ კონცენტრაცია აღარ ეყოთ მეორე ტაიმზე. ჯერ ვოვა გუცაევმა გახსნა ანგარიში, მერე რამაზ შენგელიამ დაამატა, წერტილი კი საშა ჩივაძემ დასვა თერთმეტმეტრიანით. წარმოიდგინეთ, ხალხი სტადიონის კიბეებზე იჯდა და აბა, რა უფლება გვქონდა, წაგვეგო?!

გოლების გარდა ალბათ ყველას ახსოვს გიორგი ჭილაიას შესანიშნავი გარღვევა, რომელიც ასევე დარჩება ფეხბურთის ისტორიას.

ჩვენ ვხედავდით ინგლისელების თვალებს. მათ დიდ გაოცებას – თითქოს, ვერც კი წარმოედგინათ, რა მოხდა, მაგრამ ეს იყო უკვე მომხდარი ფაქტი. ჩვენ უძლიერეს გუნდს მოვუგეთ, რომელსაც მაშინ თვით ძალიან მრისხანე "ჰამბურგი" ჰყავდა დამარცხებული.

ჩემი თაობის ფეხბურთელების დარად, მეც იმას ვიტყვი, რომ მაშინ ფული ჩვენთვის მეორეხარისხოვანი იყო. პრემიად, თუ არ ვცდები, 150 მანეთი მოგვცეს "ლივერპულთან" გამარჯვების შემდეგ. ზუსტად იმდენი, რამდენსაც საბჭოთა კავშირის ჩემპიონატში გამარჯვების შემთხვევაში ვიღებდით."

14768
მკითხველის კომენტარები / 0 /
მსგავსი ამბები
რუბრიკის სხვა სიახლეები