ოთარ გაბელია: ჩაკვეტაძეს არ უნდა ეგონოს, რომ უკვე შემდგარი ვარსკვლავია...

საქართველოს ეროვნული ნაკრების თაობაზე ვესაუბრეთ ოთარ გაბელიას, თბილისის "დინამოს" "ოქროს თაობის" მეკარეს, რომელსაც ნამდვილად მოეკითხება აზრი ჩვენი ფეხბურთის ავან-ჩავანზე...

- ყაზახეთთან თამაშს სტადიონის ტრიბუნიდან ვუყურე. უზომოდ ბედნიერი ვარ! მინდა, მთელ საქართველოს მივულოცო ეს წარმატება - ფეხბურთელებს, ფეხბურთის ფედერაციის ხელმძღვანელობას, თითოეულ ქართველ გულშემატკივარს!..

ჩვენ ძალიან ახლოს ვართ ევროპის ჩემპიონატზე გასვლასთან და მჯერა, ამ მიზანს მივაღწევთ კიდეც. გვაქვს ამის რეალური ძალა და თან ეს მხოლოდ დასაწყისია. კარგად დაწყებული საქმე ასევე უნდა დავამთავროთ და ევროპის ჩემპიონატზე გავიდეთ.

- კონკრეტულად ყაზახეთთან მატჩზე რას იტყვით?

- ყველამ ვნახეთ, რთული თამაში იყო. ყაზახეთის ნაკრები იმ გუნდებს მიეკუთვნება, რომელიც თითქმის სულ დაცვიდან თამაშობს. ფრთხილი თამაში აირჩია ჩვენმა მოწინააღმდეგემ და თავის შანსს დაელოდა. საქართველოს ნაკრებმა მოგების წყურვილითა და დიდი კონცენტრაციით ითამაშა. გახსოვთ, ალბათ, ყაზახეთთან პირველი თამაშის წინაც ვთქვი თქვენს გაზეთთან, რომ ასეთ მეტოქესთან თამაშის ბედს ძალიან ხშირად წყვეტენ ინდივიდუალისტები.

გიორგი ჩაკვეტაძემ გადაწყვიტა ძალიან ბევრი! რომ არა ის, შეიძლება უფრო გაგვჭირვებოდა. დღევანდელი ფეხბურთი ისეთია, რომ იოლად ვერავის მოუგებ. ნებისმიერი გუნდისა და მწვრთნელისთვის ძალიან რთულია ისეთ გუნდთან თამაში, რომელიც დაცვიდან გეთამაშება. ყაზახებს სულ ორი მომენტი ჰქონდათ. სიმართლე გითხრათ, როცა გაგვიტანეს, ცოტა შევშინდი. მაინც ბოლო წუთები იყო და ბოლო წუთამდე კონცენტრაცია გვჭირდებოდა, მაგრამ მეტოქეს არაფრის გაკეთების საშუალება აღარ მივეცით.

- თქვენი აზრი ვლადიმირ ვაისზე...

- მან კოლექტივი ბოლომდე შეკრა. ეს ძალიან კარგია. კარგია ისიც, რომ არავის არაფერს უკარგავს. ჩვენ ვნახეთ, რომ ნაკრების კარი ყველასთვის ღიაა.

- გიორგი ჩაკვეტაძეზე კიდევ ვთქვათ. ალბათ, განსაკუთრებული მოვლენაა, როცა 19 წლის ასაკში მთელი სტადიონი შენს სახელს სკანდირებს...

- მან მართლაც კარგად ითამაშა არა მხოლოდ ყაზახეთთან, არამედ ერთა ლიგის მთელი ჯგუფური ეტაპი უმაღლეს დონეზე ჩაატარა. და მაინც, მე ვიტყვი პირდაპირ - მას ჯერ კიდევ ბევრი მუშაობა სჭირდება საიმისოდ, რომ დიდი ვარსკვლავი გახდეს. ამის პოტენციალი კი ნამდვილად აქვს. არ უნდა ეგონოს, და მჯერა ასეცაა, ის უკვე შემდგარი დიდი ვარსკვლავია.

სიმბოლურია, რომ წარმოშობით აფხაზეთიდან არის - იმ კუთხიდან, რომელმაც ქართულ ფეხბურთს არაერთი დიდებული ოსტატი აჩუქა. ზოგადად, საქართველოს ნაკრებმა დიდი სიხარული მიანიჭა ხალხს. ჩვენ ვნახეთ, რომ ფეხბურთს შეუძლია, არნახულად გაახაროს მთელი საქართველო და ეს ფაქტია.

- მართლაც, ფეხბურთი განსაკუთრებული რამაა ჩვენი ქვეყნისთვის...

- აი, ეს შეუძლია ფეხბურთს. კიდევ მეტი სტადიონი გვინდა, კიდევ უფრო კარგი ინფრასტრუქტურა... და ნახავთ, კიდევ წამოვლენ ჩაკვეტაძის დონის ტალანტები. საქართველოში ფეხბურთის ნიჭი არასოდეს გამოილევა.

- გიორგი ლორიამ ანდორაში შეცდომა დაუშვა. ვაისი მას ყაზახეთთან შეხვედრაში ენდო და მანაც კარგად ითამაშა...

- შეცდომა ყველა ფეხბურთელს მოსდის, მათ შორის - მეკარესაც. კარგად ვიცით, ხშირად ცდებიან ტოპგუნდების მეკარეებიც. უბრალოდ, მეკარის შეცდომა უფრო მკვეთრად ჩანს, რადგან მინდვრის მოთამაშის ლაფსუსს ხშირად პარტნიორი ასწორებს. გიორგი ლორია მაღალი დონის მეკარეა. ეს მან დაამტკიცა ყაზახეთთან შეხვედრაში. მთავარია, დროულად იპოვოს კლუბი. ყველა ფეხბურთელისთვის ძალიან მნიშვნელოვანია სათამაშო პრაქტიკა, მაგრამ მეკარისთვის - განსაკუთრებით.

ყოველდღიური სპორტული გაზეთი "ლელო"
1879
მკითხველის კომენტარები / 0 /
მსგავსი ამბები
რუბრიკის სხვა სიახლეები
;