ოთარ გაბელია: ყაზახებს ილუზია გაუჩნდათ, თითქოს, ნიჭითაც გვაჯობეს

ლეგენდარული მეკარე ნაკრებს ლატვიასთან ბოლომდე კონცენტრაციას ურჩევს

ოთარ გაბელია ერთა ლიგაში გამარჯვებით გახარებულია. თბილისი "დინამოს" ლეგენდარული მეკარე ამბობს, რომ მისთვის ასტანაში საქართველოს ნაკრების გამარჯვება მოულოდნელი არ ყოფილა:

- ადრევე ვთქვი, რომ ერთა ლიგაში ფავორიტები ვიქნებოდით და რომ ყაზახეთთან მოვიგებდით. წინასწარ ანგარიშიც ვთქვი - 2:0-ს ან 2:1 მოვიგებთ-მეთქი. 2:0 მოვიგეთ. ფეხბურთში გავჭაღარავდი და წინასწარმეტყველის ნიჭი არ არის საჭირო იმის სათქმელად, რომ ყაზახეთთან ჩვენ მეტი შანსი გვქონდა. ამას ტრაბახით არ ვამბობ - ასეთი რამ არ მჩვევია.

- არადა, დასამალი რა არის - ამ თამაშს შიშით ველოდით. ყაზახებს ამბიციები გაეზარდათ, ჩვენ ვეღარ ვიგებდით და...

- ეს მესმის, მაგრამ ყაზახები გაიზარდნენ საკლუბო დონეზე და არა - სანაკრებოზე. მათი დარი ფინანსებით საქართველოს კლუბები ევროპისა და ჩემპიონთა ლიგის ჯგუფურ ეტაპებზე მუდმივად ითამაშებდნენ. ამ ყველაფერში კარგი ისაა, რომ ყაზახებს ილუზია გაუჩნდათ, თითქოს, ნიჭითაც გვაჯობეს. მაგრამ ნიჭი ფულზე არ არის დამოკიდებული და ამ მატჩმა კარგად აჩვენა, რეალურად ვინ რა დონისა და პოტენციალისაა. საერთოდ, ასეთი მატჩების ბედს ინდივიდუალისტები წყვეტენ და იმედიანად ამიტომაც ვიყავი.

   სტანიმირ სტოილოვი: დინამიკა დაგვაკლდა, ვერ ვიმოძრავეთ კარგად...

- ამხანაგურ შეხვედრებში ყაზახები საკმაოდ ძლიერ მეტოქეებთან სწრაფ და აგრესიულ ფეხბურთს აჩვენებდნენ. ამის ფონზე მათთან 2:0 გამარჯვება მშვენიერი შედეგია. თქვენი აზრით, წარმატებას რის ხარჯზე მივაღწიეთ?

- ჩვენი წარმატება მათი პლუსების განეიტრალებაზე იყო დამოკიდებული. მათი პლუსი კი ათლეტიზმი და სისწრაფეა. მაგრამ ჩვენებმა თამაშის სწორად ორგანიზება მოახერხეს და არც ათლეტიზმში ჩამორჩნენ მეტოქეს და არც სისწრაფეში.

მერე ყაზახებს ბურთის ფლობა შევუზღუდეთ, მეორე ნახევარში კი მასპინძლებს დაღლა შეეტყოთ. ამაზე დაიბნენ, ჩვენებმა კი საკუთარი პლუსები გამოავლინეს - უნაკლოდ არ გამოვიყურებოდით, მაგრამ საქართველო უფრო აზრიანად თამაშობდა, ბურთს უკეთ იჭერდა და შეხვედრის ბედი ინდივიდუალურმა ოსტატობამ გადაწყვიტა. ამაში კი ყაზახები ჩვენს დონეზე არც ადრე იყვნენ და არც - ახლა არიან. საერთოდ, ასეთ გუნდებს ტექნიკის ხარჯზე უნდა მოვუგოთ.

- ყველაფერი ჩაკვეტაძის ინდივიდუალური ოსტატობის ხარჯზე გატანილი გოლით დაიწყო. მერე ყაზახები შოკიდან ვეღარ გამოვიდნენ...

- ჩაკვეტაძე მართლა ძალიან დამაიმედებელი ბიჭი გვეზრდება და მინდა წარმატება და კიდევ უფრო მეტი წინსვლა ვუსურვო. მასთან ერთად მეორე გოლი ყაზაიშვილის ინდივიდუალიზმმაც მოგვიტანა. დიდი ხანია ასე გახარებული არ ვყოფილვარ. ვულოცავ ნაკრებს, მწვრთნელს, ბიჭებს... მთელ საქართველოს!..

- ახლა თბილისში ლატვიას ვეთამაშებით. თქვენი აზრით, სტადიონი შეივსება?

- უნდა შეივსოს! ბიჭებს ხალხის მხარდაჭერა სჭირდებათ. მაგრამ აქვე ვიტყვი - ერთა ლიგის გათამაშება დღეს დაიწყო, საქართველოს ნაკრებმა ჯერ პირველი თამაში მოიგო და წინ კიდევ 5 მატჩია. იმის თქმა მსურს, რომ ეიფორიაში ჩავარდნა დაუშვებელია.

ჩემი აზრით, გადამწყვეტი სწორედ ეს მეორე მატჩი იქნება და ლატვიასთანაც ისეთივე მობილიზებულები უნდა ვიყოთ, როგორც ასტანაში ვიყავით. ლატვიასთან კონცენტრაცია ბოლო წამამდე დაგვჭირდება. თუმცა, ისიც უნდა უნდა გვახსოვდეს, რომ ქართულ ფეხბურთს მეტი პოტენციალი გააჩნია.

ყოველდღიური სპორტული გაზეთი "ლელო"
3881
მკითხველის კომენტარები / 0 /
მსგავსი ამბები
რუბრიკის სხვა სიახლეები