ოთარ კიტეიშვილთან დაკავშირებით შტურმმა ავსტრიის ქართული საელჩოდან წერილი მიიღო... ისინი აღტაცებულები დარჩნენ ამ შოუთი...

საქართველოს ელჩმა ავსტრიაში დავიდ დონდუამ (ცენტრში) ოთარ კიტეიშვილი გაიცნო


ავსტრიული ბუნდესლიგის IX ტურში გრაცის "შტურმისა" და ვენის "ადმირას" მატჩს "მერკური არენაზე" ავსტრიაში საქართველოს ელჩი დავით დონდუა დაესწრო, - ამ ინფორმაციას "შტურმის" ოფიციალური გვერდი ავრცელებს.

წერილიდან ირკვევა, რომ ელჩი მატჩზე ოთარ კიტეიშვილის სანახავად მივიდა. საქართველოს ნაკრების ნახევარმცველმა "ადმირასთან" გამორჩეული მატჩი ჩაატარა და მე-18 წუთზე გატანილი ეფექტური გოლის გარდა, 48-ე წუთზე საგოლე გადაცემაც მიითვალა, "შტურმმა" კი 4:1 მოიგო.

კარგი თამაში კიტეიშვილს საერთაშორისო სტატისტიკურმა გვერდმა "სოფასკორმაც" დაუფასა - ქართველის გარჯას 10-ბალიან სისტემაში 8,3 დაუწერა და ტურის სიმბოლურ ნაკრებშიც შეიყვანა.

საქართველოს ელჩი, როგორც მოტივატორი

"შტურმის" შრომისმოყვარე ნახევარმცველმა ოთარ კიტეიშვილმა "ადმირასთან" შესანიშნავი მატჩი ჩაატარა - ბრწყინვალე გოლი გაიტანა და გუნდს მოგებაში (4:1) ეხმარა. შესაძლოა, ქართველმა დამატებითი მოტივაცია ტრიბუნებიდან მიიღო: ავსტრიაში საქართველოს ელჩი დავით დონდუა გრაცში იმ მიზნით ჩავიდა, რომ თავის თანამემამულეს და საქართველოს ეროვნული ნაკრების ფეხბურთელს შეხვედროდა.

ამ დღეებში "შტურმის" მენეჯერის ასისტენტმა სილვია ჰალვაქსმა ელექტრონული ფოსტით უჩვეულო წერილი მიიღო. ეს იყო ავსტრიაში საქართველოს საელჩოდან გამოგზავნილი წერილი, რომელშიც დესპანი გიორგი ტაბატაძე ითხოვდა, რომ საქართველოს ელჩს, დავით დონდუას, "ადმირასთან" თამაშზე დასწრების უფლება მიეცათ, რათა გრაცელთა ნახევარმცველი ოთარ კიტეიშვილი გაეცნო.

ამაზე მარტივი არაფერი იყო, ელჩი შეხვედრაზე საპატიო სტუმრის სტატუსით მიიწვიეს. ელჩი დონდუა და მისი წარმომადგენელი ტაბატაძე ვენიდან ჩამოვიდნენ და აღტაცებულები დარჩნენ იმ შოუთი (განსაკუთრებით, კიტეიშვილის მიერ გატანილი გოლით), რომელიც მათმა თანამემამულემ დადგა. მატჩის შემდეგ ქართველები ერთმანეთს შეხვდნენ. ელჩმა ფეხბურთელს შესანიშნავი თამაში მიულოცა და გარკვეული პერიოდის განმავლობაში ელაპარაკებოდა", - წერს "შტურმის" ოფიციალური ვებგვერდი.

1708
მკითხველის კომენტარები / 0 /
მსგავსი ამბები
რუბრიკის სხვა სიახლეები
;