ოთარ კიტეიშვილი: იმედი გვაქვს, გულშემატკივარიც დაგვეხმარება...

საქართველოს ნაკრები ერთა ლიგის მესამე ტურისთვის მზადებას აგრძელებს. თამაშამდე ორი დღით ადრე, ეროვნულ გუნდში გამოძახებული 24 ფეხბურთელი სრული დატვირთვით ემზადება.

შეკრების მეოთხე დღეს, "ზესტაფონის" თბილისის ზღვის ბაზაზე, ვარჯიში ერთი საათი გაგრძელდა. ამ დროისთვის, შეკრებაზე მყოფი თითოეული ფეხბურთელი ჯანმრთელადაა.

სამახსოვრო პრიზი ზარანდიას

ტრადიცია გრძელდება - საქართველოს ნაკრების წევრების ახალწვეულ ლუკა ზარანდიას დებიუტანტის სამახსოვრო პრიზი გადასცეს. ტრადიციის მიხედვით, ახალწვეულს სამახსოვრო პრიზი ნაკრების გამოცდილმა მოთამაშეებმა - ჯაბა კანკავამ, თორნიკე ოქრიაშვილმა და გურამ კაშიამ გადასცეს.

ვლადიმირ ვაისმა ანდორასთან და ლატვიასთან ერთა ლიგის მატჩებისთვის საქართველოს ეროვნულ საფეხბურთო ნაკრებში დებიუტანტებიდან მხოლოდ პოლონური გდინიას "არკას" ფლანგის თავდამსხმელი გამოიძახა.

ლუკა ზარანდია საქართველოს ახალგაზრდული ნაკრების 22 წლის კაპიტანია. ვაისმა ის ზაფხულშიც გამოიძახა, მაგრამ ზარანდია ტრავმის გამო ვერ ჩამოვიდა. ის ჩინებულად ატარებს პოლონური ექსტრაკლასას (უმაღლესი ლიგა) მიმდინარე სეზონს. ზარანდია უკვე სამჯერ მოხვდა სწორედ ექსტრაკლასას ოფიციალური ვებგვერდის მიერ შედგენილ ტურის სიმბოლურ ნაკრებში.

მოდუნების უფლება არ გვაქვს

მოახლოებულ სანაკრებო თამაშებზე კომენტარი ოთარ კიტეიშვილმა გააკეთა. ბოლო ერთი წელია, 22 წლის ნახევარმცველს ვლადიმირ ვაისი შეკრებაზე მუდმივად იწვევს. ავსტრიული გრაცის "შტურმის" ქართველი ლეგიონერი მომავალ შეხვედრებზე ლაპარაკობს და იმედოვნებს, რომ გუნდი წარმატებულ სერიას გააგრძელებს.

"რა თქმა უნდა, პირველ ორ მატჩში წარმატების მიღწევა მნიშვნელოვანი იყო. ეს მოვახერხეთ და ორ შეხვედრაში 6 ქულა დავაგროვეთ. მაგრამ ახლა არავითარ შემთხვევაში მოდუნება არ შეიძლება. ორი მნიშვნელოვანი მატჩი გველის და აუცილებელია კარგად მომზადება და სწორი ტაქტიკის შერჩევა - უკვე ოთხი დღეა, რაც ნაკრები შეიკრიბა და ამაზე ვმუშაობთ. თითქმის ყველა ფეხბურთელი მწყობრშია, ფაქტობრივად, ოპტიმალური შემადგენლობაა და მიმაჩნია, რომ კარგი გუნდი შეიკრიბა. დიდი იმედი გვაქვს, რომ წარმატებებს მივაღწევთ, რაშიც ქართველი გულშემატკივარი დაგვეხმარება, სტადიონზე მოვა - ყველა ერთად გამარჯვებას მოვახერხებთ", - ამბობს კიტეიშვილი.

რა იქნება დღეს?

მატჩამდე ერთი დღით ადრე, ერთა ლიგის შეხვედრაში მონაწილე გუნდების მთავარი მწვრთნელების პრესკონფერენცია "დინამო არენაზე" ჩატარდება. საქართველოს მომავალი მეტოქე, ანდორის ნაკრები, მთავარ ქართულ სტადიონზე დღეს ივარჯიშებს. საქართველოს ნაკრები კი შეხვედრამდეც ბოლო ვარჯიშს კვლავ "ზესტაფონის" თბილისის ზღვის ბაზაზე გამართავს.

დღევანდელი დღის გრაფიკი ასეთია: 17:00 - ვლადიმირ ვაისის პრესკონფერენცია ("დინამო არენა"), 18:15 - კოლდო ალვარესის პრესკონფერენცია ("დინამო არენა"), 19:00 - ანდორის ნაკრების ვარჯიში ("დინამო არენა", ღიაა საწყისი 15 წუთი), 20:15 - საქართველოს ნაკრების ვარჯიში ("ზესტაფონის" ბაზა თბილისის ზღვაზე, ღიაა საწყისი 15 წუთი).

ყოველდღიური სპორტული გაზეთი "ლელო"
294
მკითხველის კომენტარები / 0 /
მსგავსი ამბები
რუბრიკის სხვა სიახლეები