ოთხი ქართული გოლი ევროპის შუაგულში! [VIDEO]

ვაკო გვილიამ შვეიცარიაში პირველი გოლი გაიტანა, თანაც, ამ გოლით მისმა "ლუცერნმა" ახლახან სტუმრად "მანჩესტერ სიტის" დამმარცხებელი "ბაზელი" გაუშვა შინ უქულოდ.

პოლონეთში თავი გიორგი მერებაშვილმა გამოიჩინა, ესპანეთში გიორგი პაპუნაშვილმა, ესტონეთში ზაქარია ბეგლარიშვილმა...

ესპანეთი

ლა ლიგა 2. ეს უკვე ტრადიციად ექცა ოთარ კაკაბაძის "ჟიმნასტიკს" - გუნდი სტუმრად უკეთ თამაშობს. ახლაც ლიდერთა ჯგუფის "გრანადა" 1:0 დაამარცხა.

ჩვენებურმა შეუცვლელად ითამაშა და ყვითელი ბარათი მიიღო. სტუმრად "კადისთან" განადგურდა გიორგი აბურჯანიას (სათადარიგო) "სევილია ატლეტიკო" - 1:4.

გიორგი პაპუნაშვილმა "ლორკასთან" მატჩის მე-18 წუთზე გახსნა ანგარიში, თამაში "სარაგოსამ" 3:1 მოიგო, პაპუნაშვილმა შეუცვლელად ითამაშა. ეს მისი მეორე გოლია ჩემპიონატში. საინტერესოა, რომ პაპუნაშვილმა პირველიც "ლორკას" გაუტანა.

გერმანია

II ბუნდესლიგა. "ნიურნბერგი" სტუმრად "არმინიასთან" 0:1 დამარცხდა, ლუკას ჰუფნაგელს არ უთამაშია. აკაკი გოგიას (82-ე წუთზე გამოცვალეს) "უნიონი" ბერლინში "აუეს" დაუზავდა - 0:0.

საფრანგეთი

ნასიონალი. ამირან სანაიას (90 წ) "როდეზი" სტუმრად "ლიონ დუშერს" დაუზავდა - 1:1.

იტალია

სერია B. ტრავმირებული ლევან მჭედლიძის "ემპოლი" გამარჯვებული დარჩა "ენტელასთან" მატჩში - 2:1.

სერია C. ირაკლი შეყილაძე "ლუკეზეს" განაცხადში არ ყოფილა, მისი გუნდი შინ "გავორანოს" დაუზავდა - 0:0.

ჰოლანდია

ერედივიზიე. გურამ კაშიას "ვიტესი" სტუმრად "უტრეხტთან" შერცხვა - 1:5. ქართველმა სრულად ითამაშა.

ბელგია

ჟუპილერლიგა. გიორგი ჩაკვეტაძე კვლავ სასტარტოში იყო, მისმა "გენტმა" კი სტუმრად მოუგო "გენკს" - 2:1. ქართველმა 62-ე წუთამდე ითამაშა და ბელგიაში პირველი ყვითელი ბარათი მიიღო.

შვეიცარია

სუპერლიგა. ვაკო გვილიამ "ლუცერნის" შემადგენლობაში პირველი გოლი გაიტანა, რომელიც გამარჯვებისა აღმოჩნდა "ბაზელთან" მატჩში - 1:0. ვაკომ შეუცვლელად ითამაშა.



პორტუგალია

პრიმეირა. კვლავ ველით გიორგი მაკარიძის დებიუტს "რიუ ავეში". შინ "ფეირენშესთან" 2:1 მოგებულ მატჩში მაკარიძე სათადარიგო იყო წინა ტურისგან განსხვავებით (მაშინ განაცხადში ვერ მოხვდა).
სეგუნდა. ავთო ებრალიძის (90 წ) "ვიზეუმ" სტუმრად 1:0 მოუგო "პორტუს" სარეზერვო გუნდს.

ავსტრია

ბუნდესლიგა. გიორგი ქვილითაიას "რაპიდი" სტუმრად 0:0 დაუზავდა "ალტახს". ჩვენებური 72-ე წუთზე გამოცვალეს.
ერსტე ლიგა. ლევან ელოშვილის (სათადარიგო) "კაპფენბერგერი" სტუმრად 1:3 დამარცხდა "ლუშტენაუსთან".

დანია

სუპერლიგა. ქართველთა "სილკებორგი" სტუმრად დაუზავდა "ჰობროს" - 1:1. დავით სხირტლაძემ შეუცვლელად ითამაშა, მათე ვაწაძე კი მხოლოდ 91-ე წუთზე გამოჩნდა. ტრავმირებული საბა ლობჟანიძის გარეშე მოთამაშე "რანდერსი" სტუმრად "ოლბორგთან" შერცხვა, 0:4 დამარცხდა.

I დივიზიონი. ლაშა პარუნაშვილის "ესბიერგი" შინ "ფრედერიციასთან" 2:4 დამარცხდა. პარუნაშვილს არ უთამაშია.

შვედეთი

სვენსკა ოუფენი. თასის მატჩში "მალმიომ" "გეტებორგს" 1:0 მოუგო და შემდეგ ეტაპზე გავიდა. წაგებულთა რიგებში გიორგი ხარაიშვილის დებიუტი შედგა. ის მოედანზე 79-ე წუთზე გამოჩნდა.

პოლონეთი

ექსტრაკლასა. ლაშა დვალი წინა ტურში ერთ-ერთმა გამოცემამ სიმბოლურ ნაკრებშიც შეიყვანა, ახლა კი ლაშამ და მისმა "პოგონმა" ვერაფერი გააწყვეს შინ "კრაკოვიასთან" მატჩში - 0:3. დვალმა 90 წუთი ითამაშა.

გიორგი მერებაშვილმა დუელი მოუგო ნიკა კაჭარავას - მისმა "პლოცკმა" "კორონას" 2:0 აჯობა, ხოლო მერებაშვილმა 88-ე წუთზე გაიტანა (ის 92-ე წუთზე შეცვალეს), კაჭარავამ შეუცვლელად ითამაშა.

ჩეხეთი

I ლიგა. ირაკლი სიხარულიძე გამოჯანმრთელდა, მაგრამ ჯერ "სლოვაცკოს" განაცხადში ვერ მოხვდა. ქართველი ფორვარდის გუნდმა შინ "ბოჰემიანსი" დაამარცხა - 1:0.

სლოვაკეთი

ფორტუნა ლიგა. გიორგი ბერიძე დიდი ხანია, აღარ ჩანს "ტრენჩინის" რიგებში, რომელიც შინ 1:2 დამარცხდა ვახტანგ ჭანტურიშვილის (90 წ) "ტრნავასთან". ჭანტურიშვილის გუნდი ერთპიროვნულად ლიდერობს.

უნგრეთი

OTP Bank ლიგა. ლიდერ ბაჩანა არაბულის გარეშე "ბალმაზივაროში" განწირული იყო "ფერენცვაროშთან" მატჩში, რომელიც ქართველთა გუნდმა 0:5 წააგო. სტუმართა რიგებში შეუცვლელად ითამაშა ლაშა შინდაგორიძემ, ირაკლი მაისურაძე კი 74-ე წუთზე გამოცვალეს.

რუმინეთი

ლიგა 1. აკაკი ხუბუტიას (არ უთამაშია) "პოლი ტიმიშოარა" სტუმრად 0:1 დამარცხდა "ვოლუნტარისთან".

ალბანეთი

სუპერლიგა. ირაკლი ძარია შესანიშნავად მოერგო ახალ გარემოს, მან ისევ სასტარტოში ითამაშა "კუკესის" შემადგენლობაში, რომელმაც დაძაბულ ბრძოლაში "ტეუტა" დაამარცხა - 3:2.

მალტა

პრემიერლიგა. გიორგი გოროზიას (65-ე წუთზე გამოცვალეს) "ჰიბერნიანსი" სტუმრად "ვალეტასთან" დამარცხდა - 1:2. სხვათა შორის ქართველ ახალწვეულს უკვე 4 საგოლე პასი დაუგროვდა.

რუსეთი

პრემიერლიგა. ტულის "არსენალმა" სტუმრად 2:0 მოუგო "ამკარს", მაგრამ გამარჯვებულთა მარცხენა მცველ გია გრიგალავასთვის ეს უიღბლო მატჩი იყო - მან თავიდანვე ბარძაყის ტრავმა მიიღო და მე-7 წუთზე ჩვენებური "ესპანიოლის" ყოფილმა ვარსკვლავმა ვიქტორ ალვარესმა გამოცვალა.

ჯიმი ტაბიძის "უფამ" 3:2 მოუგო გიორგი ლორიას "ანჟის", ორივე ქართველმა შეუცვლელად ითამაშა. ტაბიძე "ჩემპიონატმა" 7 ბალით შეაფასა, ხოლო ლორიას გუნდში უცუდესი შეფასება - 5,5 ბალი დაუწერეს.

თორნიკე ოქრიაშვილი კვლავ ლაზარეთშია, მისი "კრასნოდარი" სტუმრად 0:0 დაუზავდა მოსკოვის "დინამოს". მოსკოვის "სპარტაკმა" 1:0 მოუგო "სკა-ხაბაროვსკს", მასპინძელთა რიგებში ჯანო ანანიძე სათადარიგო იყო, ხოლო სტუმართა შორის არ ყოფილა გიორგი ნავალოვსკი.

უკრაინა

პრემიერლიგა. ლიდერმა "შახტარმა" მესამეადგილოსან "ვორსკლას" 3:0 მოუგო. მეორე ტაიმის პირველ ნახევარში მოედანზე სამი ქართველი იყო - მასპინძლებში სანდრო კობახიძე 67-ე წუთზე შეცვალეს, ანდრო გიორგაძემ მეორე ტაიმი ითამაშა და პენალტი "აიკიდა", ხოლო სტუმრებში შეუცვლელად გაისარჯა დავით ხოჭოლავა (ყვითელი ბარათი). მან ბურთი ერთხელ ხარიხას გაარტყა.

ამ გუნდების 21-წლამდელთა მატჩში (0:0) 82 წუთი ითამაშა გიორგი არაბიძემ. ნიკა სანდოხაძის "კარპატი" გასავარდნ ზონაშია, ეს გუნდი შინ "ოლიმპიკთან" 0:3 დამარცხდა, სანდოხაძემ შეუცვლელად ითამაშა.

ბელარუსი

თასი. გიორგი ქანთარიას "ნემანი" თასზე "კრუმკაჩის" უნდა შეხვედროდა, მაგრამ მეტოქე გათამაშებიდან მოიხსნა და ქართველის გუნდს 3:0 მოგება ჩაეთვალა.
ესტონეთი

პრემიუმ ლიგა. ზაქარია ბეგლარიშვილი ისევე კარგად თამაშობს, როგორც შარშანდელ სეზონში (16 გოლი, 24 პასი). მეორე ტურში "ფლორამ" 6:0 გაანადგურა "პაიდე" და ზაქარიამ გოლი (ტაიმის ბოლო წუთზე) და 3 საგოლე პასი მიითვალა. ბუნებრივია, იგი მატჩის საუკეთესო ფეხბურთელად დაასახელეს.

აზერბაიჯანი

პრემიერლიგა. ქართველთა "საბაილი" შინ "სუმგაითთან" დამარცხდა - 0:1. ნიკა აფაქიძემ შეუცვლელად ითამაშა, თამაზ ცეცხლაძე არ ყოფილა.

ყაზახეთი

პრემიერლიგა. "ყიზილ-ჟარი" ერთ-ერთი ყველაზე "ქართული" გუნდია - პირველ ტურში "ქაირათთან" ერთბაშად სამმა ჩვენებურმა ითამაშა თავიდან ბოლომდე - გოგიტა გოგუამ, გიორგი ფოფხაძემ და შოთა გრიგალაშვილმა.

"ყიზილ-ჟარი" სტუმრად 1:2 დამარცხდა. "ორდაბასიში" ჯაბა ჯიღაურის დებიუტი არ შედგა - ის სათადარიგო იყო შინ ყარაღანდის "შახტართან" 2:1 მოგებულ თამაშში. შედგა პირველი ქართული დაპირისპირებაც - ლაშა კასრაძის "ჟეტისუ" შინ 0:1 დამარცხდა ჯაბა კანკავასა და ნიკა კვეკვესკირის "ტობოლთან". სამივემ შეუცვლელად ითამაშა, კანკავამ და კვეკვესკირმა გაფრთხილებები მიიღეს.

უზბეკეთი

სუპერლიგა. კახა მახარაძის გარეშე მოთამაშე "ლოკომოტივი" შინ "მეტალურგს" დაუზავდა - 1:1. ტაშკენტის დერბიში "ფახთაქორი" სტუმრად "ბუნიოდკორთან" დამარცხდა - 0:1. შეგახსენებთ, რომ "ფახთაქორს" შოთა არველაძე წვრთნის.

დღეს ითამაშებენ
* პოლონეთში ლუკა ზარანდიას "არკა" ნიკა კვანტალიანის "ტერმალიცას" უმასპინძლებს.
* რუსეთში გიორგი ჭანტურიას "ურალი" საბა კვირკველიას "ლოკომოტივს" უმასპინძლებს.

ყოველდღიური სპორტული გაზეთი "ლელო"
2913
მკითხველის კომენტარები / 0 /
მსგავსი ამბები
რუბრიკის სხვა სიახლეები
;