[ოთხშაბათის საკითხავი] ესეც გაივლის! - გიორგი ქვილითაია ერთხელაც წააქცია მძიმე ტრავმამ

გიორგი ქვილითაია ერთხელაც წააქცია მძიმე ტრავმამ. არადა, სულ ცოტა ხნის წინ სძლია მორიგ გამოწვევას, დადგა ფეხზე და ისევე განაგრძო გოლების გატანა, როგორც ადრე გაჰქონდა...

საერთოდ, ყველა ფეხბურთელს თან დაჰყვება ხოლმე თავისი კონკრეტული სვე. ზოგის კარიერა პირდაპირ ია-ვარდით არის მოფენილი და მისი ბამბაც ჩხრიალებს, ზოგისთვის კი ძალიან იშვიათად იმეტებს წყალობას საფეხბურთო არსთა გამრიგე.

სხვისი არ ვიცი და, მე უფრო ის ფეხბურთელები მიყვარს და მესიმპათიურება, ბედისწერის შემთხვევითი წყალობის იმედად რომ არ არიან, მუდმივად ებრძვიან უიღბლობას და ყველანაირად ცდილობენ, არ დანებდნენ.

გიორგი ქვილითაია სწორედ ასეთთა კატეგორიას მიეკუთვნება. მას დიდი ხანია ვიცნობ. ვიცნობ და, ნამდვილად არ მეგონა, თუ ხასიათის ამხელა სიმტკიცე ჰქონდა, ამდენი ბრძოლა შეეძლო.

ქვილითაია სულ ცოტა ხნის მისულია "გენტში", მაგრამ უკვე მოასწრო გოლების გატანა. საქართველოს ნაკრებს ლატვიასთან შეხვედრაში ძალიან ეტყობოდა ქვილითაიას არყოფნა. ახალ თაობაში კარგი და შედეგიანი ფეხბურთელი თუ ვინმეს ეთქმის, ამათ შორის უდავოდ არის ქვილითაიაც.

იქნებ, ადრე ეს სიტყვები ცოტა ყოყმანით დამეწერა, მაგრამ ახლა ზუსტად ვიცი, რომ არ შევცდები - გიორგი აუცილებლად დაძლევს ამ სატკივარსაც, ესეც გაივლის და კვლავ წამოგვახტუნებს მისი ლამაზი და საჭირო გოლები.

ზოგადად, ქვილითაია თანდათან ყალიბდება საქართველოს ნაკრების უპირველეს ფორვარდად და ეს ხდება არა სპონტანურად, არამედ მისი შრომისმოყვარეობისა და ნიჭის გამო.

ქვილითაიას კარიერა ძალიან საინტერესოა და, იქნებ, ახალგაზრდა ქართველ ფეხბურთელებს ჭკუის სასწავლებლადაც გამოადგეთ. ის სულ პატარა წავიდა უცხოეთში, იყო აბსოლუტურად გამოუცდელი და რა გასაკვირია, რომ გაუჭირდა. სამაგიეროდ, მას ხელი არ ჩაუქნევია, დაბრუნდა საქართველოში და თავიდან შეუყვა საფეხბურთო პირამიდას.

...და მაგრადაც შეუყვა: დღეს ის გიორგი ჩაკვეტაძესთან ერთად ბელგიის ერთ-ერთ საუკეთესო კლუბში თამაშობს. ეს გუნდი კი ნაღდი ტრამპლინია რომელიმე ევროპულ გრანდში თუ არა, საშუალოზე მაღალ გუნდში მოსახვედრად მაინც.

ქვილითაიას ძალიან უყვარს ფეხბურთი. ის არის კარგი გაგებით ამბიციური და ისეთი პროფესიონალი, რომლის მსგავსიც სანთლითაა საძებარი ქართულ ფეხბურთში. ვფიქრობ, მას ეს დიდი სიყვარული ამარჯვებინებს ბევრ ტრავმასა და დიდ ტკივილებზე.

სოლომონ მეფის ბეჭედს ტყუილად როდი ეწერა "ესეც გაივლის". რაც არ გვკლავს, ყველაფერი გვაძლიერებს. ეს უკვე კარგად იცის გიორგი ქვილითაიამ. მე კი ძალიან მიყვარს მისი ყაიდის ფეხბურთელები, გამუდმებით რომ ებრძვიან ფეხმსუბუქ საფეხბურთო ფორტუნას!

ყოველდღიური სპორტული გაზეთი "ლელო"
483
მკითხველის კომენტარები / 0 /
მსგავსი ამბები
რუბრიკის სხვა სიახლეები