[ოთხშაბათის საკითხავი] ვაისმა გადაწყვიტა: ისა სჯობს, რაც ძველია

ვლადიმირ ვაისმა საქართველოს ეროვნული ნაკრების შემადგენლობა დაასახელა.

26 ფეხბურთელი შეირჩა ანდორასა და ლატვიასთან მატჩებისთვის. ზოგადად, როცა სანაკრებო სია გამოდის დღის სინათლეზე, მას თან გვარიანი მსჯელობაც უნდა ახლდეს. ტრადიციას ნურც ამჯერად ვუღალატებთ და გავარჩიოთ სლოვაკი მწვრთნელის არჩევანი...

რას ველით ზარანდიასაგან?

საქართველოს ნაკრებში ერთადერთი ახალწვეულია - პოლონური "არკას" გარემარბი ლუკა ზარანდია. ბოლო დროს ქართული საფეხბურთო თემი ეროვნულ გუნდში მის გამოძახებას ემხრობოდა და მედიამაც მოუწოდა ამისკენ ვლადიმირ ვაისს.

საქართველოს ნაკრებს შეტევაში არ აკლია გამოკვეთილი ინდივიდუალისტები, მაგრამ ამ ბოლო დროს ზარანდია ისე კარგად თამაშობს, ისეთი გოლები გააქვს, მისი უგულებელყოფა ნამდვილად არ შეიძლებოდა. ძალიან კარგია, რომ ვაისმა ეს არჩევანი გააკეთა.

თითქმის 100-პროცენტიანი ალბათობით შეიძლება იმის ვარაუდი, რომ ლატვია და, მეტადრე, ანდორა ჩვენთან "მეორე ნომრად" ითამაშებენ. ასეთ შემთხვევაში კი ზარანდიას "მკვლელი" დრიბლინგები პირდაპირ მისწრება უნდა იყოს საქართველოს ნაკრებისთვის.

პრაქტიკა, როგორც სასიცოცხლოდ აუცილებელი...

ვაისმა სამ მეკარეს უხმო - ისევ იმათ, ვინც ყაზახეთ-ლატვიასთან ჰყავდა. გიორგი მაკარიძის ტრავმის პირობებში უცნაური და მოულოდნელი არც არაფერი ყოფილა.

მოდი, შევთანხმდეთ - ანდორასა და ლატვიასთან საქართველოს ნაკრების კარს გიორგი ლორია დაიცავს, თუ რამ გაუთვალისწინებელი არ მოხდა. ლორია ამჟამად უკლუბოდაა და თბილისის "დინამოში" ვარჯიშობს. მართლაც დასანანია, ასეთი მონაცემებისა და კლასის მეკარე უგუნდოდ რომ დაგვირჩა, მაგრამ ეს დროებითი მოვლენა გვგონია...

საკითხავია, რამდენად შეძლებს ლორია მხოლოდ ვარჯიშით სასურველი ფორმის შენარჩუნებას. რა თქმა უნდა, ეს ძალიან რთულია. აქსიომაა - მეკარისთვის სათამაშო პრაქტიკა სასიცოცხლოდ აუცილებელია, იმაზე მეტადაც კი, ვიდრე სხვა ამპლუის მოთამაშეებისთვის.

საერთო ჯამში, ლორიამ დამაჯერებლად ითამაშა ყაზახეთსა და ლატვიასთან, თუ არ ჩათვლით ასტანაში დაშვებულ ერთ შეცდომას, როცა ბედმა გაგვიღიმა.

რატომ არა მჭედლიშვილი?

დაცვა ნებისმიერი გუნდისთვის ყველაზე ფაქიზი სათამაშო რგოლია. ამდენად, ნაკრების ამ უბანზე ვაისისგან დიდ ცვლილებებს ნამდვილად არ ველოდით. იმაზეც უნდა შევთანხმდეთ, რომ უკანა ხაზი საქართველოს ნაკრების ერთ-ერთი გამორჩეული სათამაშო რგოლია.

და მაინც ჩნდება ერთი კითხვა: უპრიანი ხომ არ იქნებოდა, საქართველოს ნაკრებში ხორვატული "გორიცას" მარჯვენა მცველის, გიორგი მჭედლიშვილის გამოძახება?

მას სისტემატური სათამაშო პრაქტიკა აქვს ხორვატიის ჩემპიონატში. გარდა ამისა, მჭედლიშვილის ნაკრებში ყოფნა აუცილებლად გაზრდიდა კონკურენციას ამ სათამაშო რგოლში, კონკრეტულად კი მარჯვენა ფლანგზე, სადაც ახლა ოთარ კაკაბაძეს გვყავს.

ის, რაც გვაფიქრებს...

ორი აზრი არ არის, საქართველოს ნაკრების საუკეთესო შემსრულებლები ნახევარდაცვაში არიან თავმოყრილნი. ჯანო ანანიძის დაბრუნების შემდეგ ისიც თამამად შეიძლება ითქვას, რომ შემადგენლობა, ფაქტობრივად, უკვე ოპტიმალურია.

ჩვენ სხვა რამ გვაშფოთებს: ახალტრავმამოშუშებულ ანანიძეს სათამაშო პრაქტიკა აკლია. იგივე მდგომარეობაა თორნიკე ოქრიაშვილთან დაკავშირებითაც. ეს ორი ფეხბურთელი კი ჩვენი გუნდის აშკარა ლიდერია კაპიტან ჯაბა კანკავასა და ცენტრალურ მცველ გურამ კაშიასთან ერთად.

რატომ მხოლოდ ორი?

საქართველოს ეროვნული ნაკრების ძირითად შემადგენლობაში მხოლოდ ორი ფორვარდია. ვფიქრობ, ორი - ცოტაა. უნდა ვივარაუდოთ, რომ ძირითადი დატვირთვა ლევან მჭედლიძეზე გადაივლის, რადგან ნიკა კაჭარავა ახლა ვერ არის ოპტიმალურ ფორმაში.

მე მგონი, თავისუფლად შეიძლებოდა გაფართოებულ შემადგენლობაში მყოფი ბაჩანა არაბული ძირითად სიაში ყოფილიყო, მაგრამ... ვაისმა ასე გადაწყვიტა...

საქართველო

მეკარეები - გიორგი ლორია (უგუნდოდ), როინ კვასხვაძე (ტორპედო ქ), ლაზარე კუპატაძე (საბურთალო);
მცველები - ოთარ კაკაბაძე (ლუცერნი, შვეიცარია), საბა კვერკველია (ლოკომოტივი, რუსეთი), დავით ხოჭოლავა (შახტარი, უკრაინა), გურამ კაშია (სან ხოსე, აშშ), ლაშა დვალი (პოგონი, პოლონეთი), გიორგი ნავალოვსკი (დინამო მნ, ბელარუსი), ჯიმი ტაბიძე (უფა, რუსეთი);
ნახევარმცველები - ჯაბა კანკავა, ნიკა კვეკვესკირი (ორივე - ტობოლი, ყაზახეთი), გიორგი აბურჯანია (ლუგო, ესპანეთი), ვაკო გვილია (ლუცერნი, შვეიცარია), ოთარ კიტეიშვილი (შტურმი, ავსტრია), გიორგი პაპუნაშვილი (სარაგოსა, ესპანეთი), ჯანო ანანიძე (სპარტაკი, მოსკოვი), გიორგი მერებაშვილი (ვისლა, პლოცკი, პოლონეთი), გიორგი ჩაკვეტაძე (გენტი, ბელგია), თორნიკე ოქრიაშვილი (კრასნოდარი, რუსეთი), ვაკო ყაზაიშვილი (სან ხოსე, აშშ), ჯაბა ჯიღაური (გრენობლი, საფრანგეთი), ლუკა ზარანდია (არკა, პოლონეთი), ვახტანგ ჭანტურიშვილი (ტრნავა, სლოვაკეთი);
თავდამსხმელები - ლევან მჭედლიძე (ემპოლი, იტალია), ნიკა კაჭარავა (ანორთოსისი, კვიპროსი).

რეზერვი: ლევან გეგეჭკორი, (ტორპედო ქ), ლაშა შერგელაშვილი, (რიგას ფს, ლატვია), ბუდუ ზივზივაძე, (დინამო თბ), ბაჩანა არაბული, (პუშკაშ აკადემია, უნგრეთი).

ყოველდღიური სპორტული გაზეთი "ლელო"
1966
მკითხველის კომენტარები / 0 /
მსგავსი ამბები
რუბრიკის სხვა სიახლეები
;