[ოთხშაბათის საკითხავი] ვაისმა ნაკრებში თავი ამოწურა... წაგებაცაა და წაგებაც

თანამედროვე ფეხბურთი იმითაა კარგი და მიმზიდველი, რომ ძლიერი ყოველთვის ვეღარ ამარცხებს სუსტს და თუ ძალიან წყალწაღებული არ ხარ, ჟამიდან ჟამამდე სენსაციას მაინც გამოჰკრავ ხელს. ეს უკვე საქმეა ძლიერ ნაკრებებთან მოჭიდავე ჩვენი გუნდისთვის და ვიღაცის გამწარებას სულ ვახერხებდით. ჯერ არც ეს ჩანს...

საქართველოს ნაკრები განადგურდა დანიაში. წაგებაცაა და წაგებაც - რა თქმა უნდა, გულის სიღრმეში ალბათ ყველამ ვიცოდით, რომ დანია მოგვიგებდა, მაგრამ ასეთ თამაშს ნამდვილად არ ველოდით. ისეთი შთაბეჭდილება შეგვექმნა, რომ საქართველოს ნაკრები მინდორზე წაგებას შეგუებული გავიდა.

გასაგებია, რომ ლამის სათადარიგო შემადგენლობით ვითამაშეთ, მაგრამ, როგორიც არ უნდა იყოს ჩვენი თერთმეტეული, ასე აღარასოდეს უნდა ვითამაშოთ. იმ ფეხბურთელებს, ორშაბათს რომ მინდორზე იყვნენ, აქვთ ნაკრებში თამაშის ამბიცია და როცა ეს ამბიცია გაქვს, საკუთარ თავს მეტი უნდა მოსთხოვო.

ვლადიმირ ვაისმა კი მორიგი არადამაჯერებელი მატჩი ჩაატარა საქართველოს ნაკრებში. არ ვიცი, რა იყო ეს - ზედმეტი სიფრთხილე, შიში თუ სხვა რამ, მაგრამ ფაქტია, საქართველოს ნაკრები მინდორზე შეშინებული გავიდა. მწვრთნელი მხოლოდ ტაქტიკური მონახაზითა და მეტოქის გაშიფვრით კი არა, იმითაც ფასობს, თუ რამდენად კარგად შეუძლია გუნდის მოტივირება.

[პრესკონფერენცია] ვლადიმირ ვაისი: დანიას არ სჭირდებოდა მსაჯის დახმარება

ქართულ ფეხბურთში დღეს ათასი პრობლემაა. სულაც არ გვინდა, ყველა მათგანი ეროვნული გუნდის მთავარ მწვრთნელს დავაბრალოთ და აქცენტი მხოლოდ მასზე გადავიტანოთ, მაგრამ ვაისი მთავარი მწვრთნელია და ის თავის წილ პასუხისმგებლობას ვერაფრით გაექცევა.

მაგალითად, რა საჭირო იყო დანიასთან 4 გამოკვეთილი საყრდენით თამაში მაშინ, როცა მეტოქემ მაინც აშკარად მოგვიგო მინდვრის ცენტრი? დანიის ნაკრების უპირატესობა იმხელა იყო “ფიზიკასა” და ორთაბრძოლებში, ვერავინ დამარწმუნებს, რომ ჩვენი გუნდის ძირითადი შემადგენლობა სწორად იყო შერჩეული.

ბოლოს და ბოლოს, რას ერჩის ვაისი გიორგი ხარაიშვილს? სლოვაკი ამბობს, რომ მან ფიზიკურ მომზადებაში უნდა მოუმატოს. იქნებ, ვაისი მართალიც არის, მაგრამ რომელი ჩვენი ფეხბურთელი იყო მზად ფიზიკურად კარგად ვაკო გვილიასა და ჯაბა კანკავას გარდა?

ის კი არა, ზოგიერთი მათგანი იმდენად ცუდ ფიზიკურ ფორმაში შეხვდა ამ სანაკრებო შეხვედრებს, უარესის წარმოდგენა, უბრალოდ, ძალიან რთულია. ისე გამოვიდა, რომ ორი შეხვედრის ჯამში ხარაიშვილს ერთი წუთიც კი არ უთამაშია და ვერ არის ეს კარგი ამბავი: ამ ნაკრებში ბევრი არ არის ისეთი ფეხბურთელი, საკუთარ კლუბში უდავო ლიდერად რომ ითვლება.

ამოწურა თუ არა ვაისმა საკუთარი თავი საქართველოს ნაკრებში? ამაზე ყველას თავისი აზრი შეიძლება ჰქონდეს და, რა თქმა უნდა, მეც მაქვს - ვფიქრობ, ამოწურა.

საქართველოს ნაკრების არსენალში არ აღმოჩნდა ისეთი იარაღი, რომელსაც გუნდი გამოიყენებდა საშუალოევროპული დონის ნაკრებებთან წარმატებით სათამაშოდ. ყაზახეთს, ლატვიასა და ანდორას კი, ალბათ, ყველაზე ცუდი ფორმაციის ნაკრებიც კი გაასწრებდა.

რაც მთავარია, როცა ჩვენი და, ასე თუ ისე, ძლიერი გუნდების გზები გადაიკვეთა, სულ ზედაცვითი ფეხბურთი ვითამაშეთ და საკუთარ საჯარიმოშო გამოვიკეტეთ. ასეთი ფეხბურთი კი ქართველ გულშემატკივარს არ მოსწონს და ვეჭვობთ, იმ ხალხს მოსწონდეს, დღეს რომ ქართული ფეხბურთის სათავეშია. რა-რა და, მათ საფეხბურთო გემოვნებაში ეჭვის შეტანა ძნელია.

ვაისი არ არის ცუდი მწვრთნელი, მაგრამ ჩემი აზრი ასეთია - მან უკვე გააკეთა თავისი შესაძლებლობების მაქსიმუმი საქართველოს ნაკრებისთვის და ჩვენი გუნდი მის ხელში ვეღარ მოუმატებს.

ამ სტრიქონების ავტორი ერთ-ერთი პირველია, ვინც ზოგადად გუნდებსა და ნაკრებებში მწვრთნელების ხშირ ცვლას ეწინააღმდეგება, მაგრამ ჯობია, თუ შესაცვლელია, მანამდე შეცვალოთ, სანამ ერთა ლიგის ნახევარფინალში ბელარუსთან მატჩამდე ჯერ კიდევ გვარიანი დროა დარჩენილი.

დანიასთან მარცხმა კიდევ ერთხელ მისცა დასაბამი ნიჰილისტურ გამოვლინებებს, რომლის მიხედვითაც ჩვენი საქმე არ არის ფეხბურთი, რომ “სახეს გვახევს” ფეხბურთის სახელმწიფო დაფინანსება და ასე შემდეგ.

ასეთები სულ იყვნენ და სულ იქნებიან. ყველაზე ცუდი (ამავდროულად - ადვილიც) ჩასაფრებული კაცის პოზაში ყოფნაა და ის, რომ ვიღაცის ფეხის დაცდენას ელოდები, რათა ის საკუთარი მიზნებისთვის გამოიყენო. დიახ, ასეთები სულ იყვნენ და მომავალშიც იქნებიან, მაგრამ მე იმისაც მჯერა, რომ სანამ საქართველო იარსებებს, ჩვენთან მუდმივად ითამაშებენ ფეხბურთს.

აღარ დავაფინანსოთ კი არა, კიდევ მეტით უნდა დავაფინანსოთ. აქ საქმე ისაა, რამდენად ჭკვიანურად ხდება ამ ფინანსების განკარგვა, რამდენად ჭკვიანურ პირობებს ვუყენებთ კლუბების ხელმძღვანელებს, თორემ ქართულ ფეხბურთს სახელმწიფო მხარდაჭერის გარეშე რომ მომავალი არ აქვს, ამას ბევრი ფიცი-მტკიცი რად უნდა?!

ფეხბურთს დღეს მთელი მსოფლიო თამაშობს. ისეთებიც, მათი ფეხბურთი მართლა რომ არავის გაუგია და რაღა ჩვენ უნდა გავაუქმოთ? ეს დაახლოებით იმას ჰგავს, შეჭირვებულმა, უიმედო კახელმა კაცმა საკუთარ ვენახში ვაზი რომ აჩეხა. საქართველო დღემდე ფეხბურთმაც მოიყვანა და მას გაფრთხილება სჭირდება...

ყოველდღიური სპორტული გაზეთი "ლელო"
5187
მკითხველის კომენტარები / 11 /
ილია
0
წარმატებულ ფეღბურთს წარმათებული ქვეყანა სჭირდება ჩვენ კი მხოლოდ ჩვენი თავი გვიყვარს.გვიყრს კი, როცა ასეთ ქვეყანას ვითმენთ?
ქომაგი
0
ვკითხულობ სტატიას და კომენტარებს და მეცინება, სხვა რა არის ჩასაფრებული კაცის პოზიცია თუ არა ეს კომენტარები და სტატია? მესმის, ყველას გვიყვარს ნაკრები მაგრამ ობიექტურობას ვკარგავთ ან თავს ვიბრმავებთ.

რატომ უნდა მოგვეგო დანიისთვის?
1. რეიტინგის მიხედვით მსოფლიოს მეათე ნაკრებია, ჩვენ 94-ე.
2. დანიის ნაკრების ფეხბურთელები თამაშობენ ტოპ 5 ჩემპიონატებში, ჩვენი ფეხბურთელები დან ერთიც კი არ თამაშობს ტოპ 5-ში.
3. ჩვენი ფეხბურთელები თამაშობენ დაბალი ლიგის გუნდებში და ისიც სეზონის ბოლოს ახალ გუნდებს ეძებენ, ლიგიდან გავარდნის გამო (იშვიათი გამონაკლისის გარდა). მაგალითს მოგიყვანთ: ყაზაიშვილის და კაშიას სან ხოსე ბოლო ადგილზე გავიდა გასულ სეზონში. პოლონეთის ჩემპიონატში მოთამაშე ქართველების გუნდები ზაგლებიე სოსნოვეცი, არკა პლოსკი გავიდნენ ბოლო სამ ადგილზე, გვილიას გურნიკი გადარჩა სირცხვილს და ბოლო ტურებში გაინაღდა ადგილი ლიგაში. გავაგრძელოთ, სერია ა-დან გავარდა მჭედლიძის ემპოლი, სადაც ლევანს მთელი სეზონი არ უთამაშია, რუსეთის პრემიერლიგის გადარჩა გავარდნას ჯანოს კრილია, გიორგი ლორიას მაგდებურგი გავარდა მეორე ბუნდესლიგიდან... ახლა ვნახოთ რა ქნეს დანიელმა ფეხბურთელებმა, ერიკსენი ლიგის ფინალAი იყო, დოლბერგი ლიგის ნახევარფინალში, კრისტენსენმა ევროპა ლიგა მოიგო, შმეიხელი ლესტერის ძირითადი მეკარეა,პოულსენი ლაიპციგის ძირითადის ფორვარდის რომელიც კარგად ხანს იყო ბომბარდირების მოწინავე სიაში.

აბა თქვით, რამე არასწორი და არალოგიკური მიწერია?
მსგავსი ამბები
რუბრიკის სხვა სიახლეები
;