[ოთხშაბათის საკითხავი] ითამაშეთ სუფთად! - ანუ ის,რაც მხოლოდ საქართველოს არ აწუხებს

საქართველოს ჩემპიონატის კიდევ ერთ თამაშზე გაჩნდა ეჭვი და ეს უკვე ცუდია. რა და როგორ იყო ამ შეხვედრის მიმდინარეობისას, ყველამ კარგად იცის და, რა თქმა უნდა, ამ ისტორიის თავიდან მოყოლას აზრი აღარ აქვს.

ჩვენ, უბრალოდ, დავწეროთ, რომ თუნდაც ასეთი მითქმა-მოთქმა არ უხდება საქართველოს ჩემპიონატს და კიდევ უფრო დაბლა სცემს მის ისედაც დაბალ ავტორიტეტს. ეს ფაქტია და ამას ბევრი ფიცი-მტკიცი არ სჭირდება...

მთელი მსოფლიოს პრობლემა

ის პრობლემა, რომელზეც ახლა ვწერთ, არ არის მხოლოდ საქართველოს ჩემპიონატის პრობლემა. პირიქით, გარიგებულ ან საეჭვო თამაშებს მთელი მსოფლიო ებრძვის. ეს სენი ზოგან მეტადაა გავრცელებული, ზოგან - ნაკლებად.

ფაქტია, ამ ავადმყოფობას ვერც ქართული ფეხბურთი და საქართველოს პირველობა გადაურჩა. ამ პრობლემას თავი არც დღეს უჩენია და არც გუშინ, მაგრამ ძალიან, ძალიან დიდი ეჭვი მაქვს, რომ თავის დროზე საკადრისი ზომები ვერ მივიღეთ.

მოკლედ განვმარტავთ, რასაც ვგულისხმობთ: დაისაჯნენ მხოლოდ ლიფსიტები და ღლავებს არავინ შეხებია. რა თქმა უნდა, ეს ღლავები არ მოისვენებენ, რადგან ადამიანი ერთხელ რომ შეეჩვევა მრუდე გზით სიარულს და ამ გზით ნაშოვნ ფულს გაუგებს გემოს, თან სასჯელიც ასცდება, მერე ის ამას ვეღარ გადაეჩვევა. ასეთია ადამიანის ბუნება.

რა თქმა უნდა, მსოფლიოს სხვა ქვეყნებში ეს პრობლემა სულ სხვა სიმძაფრითა და მასშტაბით დგას, მაგრამ ვთქვათ, რაც იტალიურმა ფეხბურთმა შეიძლება აიტანოს, მას ქართული ფეხბურთი ვერაფრით აიტანს. პირიქით, რაც გვაქვს დღეს ქართულ ფეხბურთში, ისიც დაგვენგრევა თავზე.

ასე რომ, ამ შემთხვევაში ევროპის წამყვან საფეხბურთო ქვეყნებთან შედარება არ გამოგვადგება. ისინი თუ მაღალ დონეზე "აწყობენ" თამაშებს, მაღალ დონეზეც თამაშობენ, რადგან...

ამასაც ცოდნა უნდა...

რა თქმა უნდა, მედია ამ მეტად ფაქიზ საკითხში ხელფეხშეკრულია. დღეს მილიონი ორგანიზაციაა, რომელიც ადამიანის უფლებებს იცავს. ერთ რამეს დაწერ და საშაროდ გაგიხდება საქმე.

მედია არ არის პოლიცია. ის ვერ მოუსმენს სხვადასხვა საეჭვო პიროვნებას, მათ სატელეფონო საუბრებს. ეს სამართალდამცავთა პრეროგატივაა. ასეთ საქმეში ვარაუდებით და ეჭვებით ლაპარაკს, ფაქტებით მსჯელობა სჯობია.

როცა დაიდება ყველა ფაქტი, მაშინ ვერც ის ღლავები დაუსხლტებიან პასუხისმგებლობას და მიიღებენ იმას, რასაც იმსახურებენ. ამდენ ხანს ქართულ ფეხბურთში ვერ დამკვიდრდა პრეცედენტი, რომლის მიხედვითაც დამნაშავე უმკაცრესად დაისჯება.

ფაქტია, ამ ცხოვრებაში ყველაფერს ცოდნა უნდა. საქართველოში, ჩვენს საფეხბურთო კულუარებში ბევრმა იცის "რაღაც", მაგრამ ამაზე ლაპარაკს ერიდება. არადა, დროც აღარ იცდის.

საზღვარგარეთ სულ სხვა მასშტაბებში გვხვდება "გაკეთებული" თამაშები, მაგრამ მათ ისე მაგრად იციან ეს საქმე, ისე ფუთავენ ამ ყოველივეს, დიდი ალბათობით, ყველაფერი გაუხსნელი რჩება, თუ სკანდალის მონაწილე რომელიმე პირი არ გამოტყდა.

საქართველოში კი ყველაფერი სხვანაირადაა. საკმარისია, სისტემატურად უყურო სხვადასხვა ლიგის მატჩების ოქმებს, ყველაფერი ცხადი ხდება. უმაღლესი ლიგა იქით იყოს და, მეორე საკითხია, რა ხდება დაბალ ლიგებში...

გამოსავალი

ეს ისეთი საკითხია, იმდენად ღრმა პრობლემაა, გამოსავლის პოვნა ძალიან რთულია. ვფიქრობ, შედარებით გააუმჯობესებდა მდგომარეობას ის, რომ თუნდაც ქართულ ტოტალიზატორებში შეწყვეტილიყო ეროვნული ჩემპიონატის სხვადასხვა მატჩებზე ფსონის მიღება.

რა თქმა უნდა, ასეც რომ მოხდეს, ეს არ გამორიცხავს მანიპულირების საშუალებას, მაგრამ მაინც შეღავათი იქნება. ადრე ეს წესი საქართველოში მოქმედებდა. როგორც მახსოვს, ფეხბურთის ფედერაციის მაშინდელ ხელმძღვანელობასა და ქართული ტოტალიზატორების შეფობას შორის მემორანდუმიც კი გაფორმდა, მაგრამ ეს წამოწყება დროთა განმავლობაში დავიწყებას მიეცა.

რაც შეეხება გლობალურ გამოსავალს, ეს ის მდგომარეობაა, სადაც მართლაც ერთადერთი გამოსავალი არსებობს: ქართულ ფეხბურთში მოღვაწე თუ მასთან ახლოს მოტრიალე ყველა ადამიანმა უნდა დაარწმუნოს საკუთარი თავი, რომ ეს არის სირცხვილი და რომ ადრე თუ გვიან ყველას თავისი მოეკითხება.

უმკაცრესი სასჯელი

რა შეიძლება იყოს იმაზე დიდი ნაძირლობა, როცა გულშემატკივარს ატყუებ. ამას რომ ვწერ, არავითარ შემთხვევაში არ მაქვს მხედველობაში მხოლოდ ბოლო დროს განვითარებული მოვლენები.

წლების განმავლობაში ეს ხალხი, ვინც ამას აკეთებს, ისე გაიხრწნა, მათ მორალურ მხარეზე საუბარიც ზედმეტია. მათ მხოლოდ პრეცედენტი თუ შეაკავებთ. უმკაცრესი სასჯელი, რომელიც სამაგალითო უნდა იყოს ყველასთვის.

ვინაიდან ეს ხალხი დაუნდობლად ატყუებს იმ თითოოროლა ქომაგს, რომელიც ამ დროისთვის შემორჩა ქართულ ფეხბურთს და ეს ხალხი კანონის მთელი სიმკაცრით უნდა დაისაჯოს.

აუცილებელია ძველის მოკვლევა

რამდენიმე წლის წინ, მაშინ, როცა საქართველოს წინა ხელისუფლება მართავდა, ჩემს ორ თანამშრომელთან ერთად "სადაც ჯერ არს", იქ დამიბარეს - ქართულ ფეხბურთში ტრიალებთ და რაღაც თქვენც გეცოდინებათო - დაახლოებით ასეთი იყო იმ საუბრის შინაარსი.

რა თქმა უნდა, იქ ეჭვების დონეზე ვერ ვილაპარაკებდით და რაც ვთქვით, ალბათ, იქიდან პრაქტიკულად არაფერი იქნებოდა მნიშვნელოვანი გამოძიებისთვის. სამაგიეროდ, ძალიან ბევრი იცის იმ ხალხმა, ვინც მაშინ ტრიალებდა ქართულ ფეხბურთში, ჩვენს კლუბებში.

მათგან ზოგიერთი თითქოს ბოლომდეა ფეხბურთს ჩამოშორებული, მაგრამ არ გამოვრიცხავთ, ჩრდილები ისევ დასტრიალებენ თავს ჩვენს ფეხბურთს.
საქართველოში არაფერი იმალება და არაერთხელ გამიგია, ძველ სამართალდამცავებს ერთი დიდი ოთახი აქვთ სავსე მასალებით, რომელიც გარიგებულ შეხვედრებს ეხებაო. ამიტომაც, აუცილებელი გვგონია იმ მასალების შესწავლა და იმ ხალხთან თანამშრომლობა, რომელიც მაშინ იძიებდა ამ საქმეს.

მერე რა, რომ აღარ ჩანან...

შესაძლოა, ზოგიერთი საეჭვო ადამიანი დღეს აღარ ჩანდეს ქართულ ფეხბურთში. მათ დამნაშავისთვის დამახასიათებელი ფსიქოლოგია აქვთ და სულაც არ არის გამორიცხული, თუნდაც დროებით "ფსკერზე ჩაყვინთეს".

სამართალდამცავები ძალიან კარგად იცნობენ ამ გამოთქმას. ის გამოიყენება იმ შემთხვევაში, როცა დამნაშავეს უნდა, რომ დროებით ჩრდილში მოექცეს, რათა სამართალდამცავთა ყურადღება მოადუნოს.

სამაგიეროდ, სააშკარაოზე იქნებიან გამოსულები მათი ხელქვეითები. სულაც არ არის აუცილებელი, ვთქვათ, გარიგებული თამაშის შესახებ მთელმა გუნდმა იცოდეს. საკმარისია თუნდაც ორი-სამი კაცი და ეგ არის.

ასე რომ, ჩვენთან არაფერი ხდება ისეთი, რაც სხვაგან გამოირიცხება. აქედან გამომდინარე, განგაშის ზარები უნდა დავარისხოთ, მაგრამ ამის პარალელურად დიდი დაკვირვებით უნდა ვიმოქმედოთ. ბოლომდე ვერ ვერკვევი ამ საკითხში, მაგრამ როგორც მახსოვს, ვისაც საჭიროა, საქართველოში იმას კი უსმენენ.

თუ ეს ხალხი არ გამოიჭირე და მათივე სატელეფონო საუბრები არ დაუდე წინ, ისე მათი სააშკარაოზე გამოყვანა ძალიან რთული იქნება. ვგულისხმობთ ყოველივე ამის ორგანიზატორებს, თორემ შემსრულებელთა დაკავებამ დიდი ვერაფერი შედეგი რომ ვერ გამოიღო, ამას ყველა ერთად ვხედავთ.

ნებისმიერ შემთხვევაში, ეს არის პრობლემა, რომლის მოგვარებით ქართველ ქომაგთან ერთად ძალიან უნდა იყვნენ დაინტერესებული საქართველოს ფეხბურთის ფედერაცია და ჩვენი სამართალდამცავები. ყველაზე ცუდ მდგომარეობაში კი ჩვენი მცირერიცხოვანი ქომაგია, ჯერ კიდევ რომ სწყალობს ქართულ ფეხბურთს - ჯერ რა ხარისხის პროდუქტს იღებენ და იმასაც "ტუფტას"?

ყოველდღიური სპორტული გაზეთი "ლელო"
1329
მკითხველის კომენტარები / 0 /
მსგავსი ამბები
რუბრიკის სხვა სიახლეები
;