[ოთხშაბათის საკითხავი] სულ ძილი - ძილი როზღა გვეღირსოს ჩვენ გაღვიძება?!

დასრულდა საქართველოს ეროვნული ჩემპიონატი. შეფასებისთვის, სეზონის შუქჩრდილების განსახილველად დრო საკმარისად გვექნება.

წინ მთელი ზამთარია. ზამთარს უხდება ფიქრი და ცხელი ჩაი. ჩვენ ბევრი უნდა ვიფიქროთ, მაგრამ დღეს ერთ ელემენტარულ ჭეშმარიტებაზე დავწეროთ, რომელსაც, თითქოს, არ სჭირდება შეხსენება, მაგრამ ჩვენ ხომ საქმე ქართულ საკლუბო ფეხბურთთან გვაქვს.

აქ ყველაფერი მოსულა. არაერთხელ გვინახავს, ჩვენი საკლუბო ფეხბურთის ზოგიერთი მესვეური ჩაიძინებს ხოლმე და მხოლოდ მაშინ გამოიღვიძებს, როცა ევროთასების შეხვედრამდე აღარაფერია დარჩენილი და როცა კლუბის ხელმძღვანელობამ მხოლოდ იმისთვის უნდა გაიღვიძოს, რომ თვითმფრინავში ჩაჯდეს და კლუბის თამაშზე გაემგზავროს...

"საბურთალო", "დინამო", "ტორპედო" და "ჩიხურა" - მომავალ ევროთასებზე საქართველოს ეს ოთხეული წარადგენს. რა თქმა უნდა, ყველა კლუბს აქვს თავისი პოლიტიკა და მიდგომები. რა თქმა უნდა, ყველა გუნდი თავად წყვეტს, როდის და როგორ უნდა მოიქცეს, მაგრამ სადაც ეს ასეა, უეჭველია ისიც, რომ დაუწერელი საფეხბურთო კანონის მიხედვით ნებისმიერი კლუბის ნებისმიერი ხელმძღვანელი ანგარიშვალდებულია გულშემატკივართან.

ჰოდა, ძალიან მინდა, მჯეროდეს, რომ ისინი არ დაიძინებენ ახლა და ევროთასების დაწყებამდე რამდენიმე დღით ადრე არ გაიღვიძებენ. გაძლიერება რომ საჭიროა, ამას ბევრი ფიცი-მტკიცი რად უნდა. ის რესურსი, რომელიც საკმარისია საქართველოს ჩემპიონატში, არ არის საკმარისი ევროთასებზე. ეს საკუთარ თავზე გამოსცადა ქუთაისის "ტორპედომ", რომელიც საქართველოში საუკეთესო შემადგენლობის მიუხედავად, ეგრეც ვერ დაუდგა "ლუდოგორეცს".

მარცხი არასდროს არის ტრაგედია. ის არ უნდა იყოს ტრაგედია არც ქართული კლუბებისთვის. უბრალოდ, მე ვფიქრობ, წარმატების გასაღები მარტივია.

პირობითად რომ ვთქვათ, თუ ქართულ კლუბებში გაიზრდება ლეგიონერების რაოდენობა, ოღონდ, კლასიანი უცხოელების ხარჯზე, ეს თითქმის 100 პროცენტით იქნება წარმატების გარანტია.

რა თქმა უნდა, ჩვენც კარგად ვიცით, რომ აქ უმაღლესი რანგის ვარსკვლავები არ ჩამოვლენ სათამაშოდ, მაგრამ ის ხომ შეიძლება, რომ ევროთასებზე გასულ ჩვენს კლუბებში იყვნენ თუნდაც ოლექსანდრ აზაცკისა და ვაგნერ გონსალვეშის დონის ლეგიონერები. რა თქმა უნდა, განსაზღვრული რაოდენობით.

თავისთავად ცხადია ისიც, რომ რამდენიმე ასეთი ფეხბურთელის გუნდში ყოლა ცოტა იმაზე მეტის ხარჯვას მოითხოვს, ვიდრე დღეს იხარჯება ზოგადად ჩვენს საკლუბო ფეხბურთში, მაგრამ ერთხელ და სამუდამოდ უნდა მივეჩვიოთ იმას, რომ ევროპული მასშტაბით ეს ზღვაში წვეთია და თუ კონტინენტის საკლუბო ტურნირებზე მწვრთნელს არ ჰყავს ასე თუ ისე კონკურენტუნარიანი შემადგენლობა, ის ნებისმიერ შემთხვევაში განწირულია წარუმატებლობისთვის.

ძალიან მინდა, რომ ევროთასებზე გასულმა თითოეულმა ჩვენმა კლუბმა ამ ტურნირისთვის მზადება დაიწყოს საქართველოს ჩემპიონატის დასრულებიდან მეორე დღესვე. კახა ჩხეტიანის სიტყვები წავიკითხე - ფეხბურთელები კი ისვენებენ, მაგრამ მწვრთნელებისთვის ახალი სეზონი უკვე დაიწყოო. ეს უკვე კარგია. კარგი კი არა, ძალიან კარგია!

კარგია, რომ თუნდაც ერთი მწვრთნელი ასე აზროვნებს, მაგრამ ორიც რომ იყოს ასეთი "მერცხალი", ისინი გაზაფხულს ვერ მოიყვანენ. გვესმის, არც ხელის ერთი მოსმით გაკეთებულა სადმე საქმე და არც ერთ დღეში აშენებულა ბირთვის-სამშვილდის ციხენი, მაგრამ გვესმის ისიც, რომ თუ ჩვენი საკლუბო ფეხბურთი ფეხზე არ დავაყენეთ, მხოლოდ სანაკრებო სიხარულების იმედად ვერ ვიქნებით.

ბოლოს და ბოლოს, რომელიმე ევროტურნირის ჯგუფში შესვლა პრინციპისა და თავმოყვარეობის ამბავი უნდა იყოს. სადაც ეს მოახერხა ლუქსემბურგულმა კლუბმა, ქართულმა როგორ და რატომ ვერ უნდა შეძლოს?!

"დუდელანჟი" ჩვენთვის რიგითი კლუბი ნამდვილად არ არის. იქ ლევან ყენია თამაშობს. ჩვენ ვქომაგობთ ამ გუნდს, მაგრამ გული კი გვწყდება: როგორ და რითი უნდა გაჯობოს ციდა ლუქსემბურგის კლუბმა, სადაც ფეხბურთი დიდწილად ჯერაც სამოყვარულოა.

პირობები და ინფრასტრუქტურა - თავისთავად. ლუქსემბურგი შუა ევროპაა და ჩვენ მას ამაში ვერ შევეცილებით, მაგრამ ევროპა არ იყო წინა წლებშიც? აქ მთავარი გონივრულად წარმართული საკადრო პოლიტიკაა.

"დუდელანჟის" შემადგენლობაზე თვალის ერთი გადავლებაც კი საკმარისია იმაში დასარწმუნებლად, რომ გუნდში მრავლად არიან პირველ და მეორე ბუნდესლიგაში გამობრძმედილი ფეხბურთელები, რომლებიც ტრავმებისა თუ სხვა მიზეზების გამო ბოლო დროს ბევრს არავის ახსოვდა.

ვერ ვიტყვი, რომ იდეალური, მაგრამ მაინც პროგრამაა, ერთგვარი სვლაგეზია. ფაქტია, ამან ევროპალიგის ჯგუფში მოსახვედრად იკმარა...

ყოველდღიური სპორტული გაზეთი "ლელო"
1463
მკითხველის კომენტარები / 0 /
მსგავსი ამბები
რუბრიკის სხვა სიახლეები
;