[ოთხშაბათის საკითხავი] ფეხბურთი, ხალხის ფული და ცარიელი მაცივარი

საქართველოს ჩემპიონატი თავისი გზით მიდის და ეს სეზონიც მალე ისტორიას ჩაბარდება. საქმეს ისეთი პირი უჩანს, კონკურენცია ბოლომდე გაგრძელდება და ეს ძალიან კარგია - დაძაბულობა მაინც არ მოგვაწყენს, მაგრამ დაძაბულობა სხვაა და ხარისხი კიდევ სხვა. მათ ერთმანეთთან კავშირი თითქმის არ აქვთ...

უკვე კარგა ხანია, მოქმედებს ფეხბურთის განვითარების სახელმწიფო პროგრამა და შედეგი? შედეგზე უკაცრავად: არა მგონია, ვინმემ ჩასაფრებულ კაცად ჩამთვალოს. რა შედეგზეა ლაპარაკი, როცა ევროთასების ჯგუფურ ეტაპზე ქართულ კლუბს სანთლითაც კი ვერ იპოვი?! და ეს მაშინ, როცა იქ სისტემატურად თამაშობენ აზერბაიჯანული, ყაზახური, ლუქსემბურგული... კლუბები.

ამხელა ფული იხარჯება ჩვენს ფეხბურთში და შედეგი არ ჩანს. ალბათ, მავანი შეგვეპასუხება - აზერბაიჯანს და ყაზახეთს, ან თუნდაც ლუქსემბურგს რად ეტოლებითო. აბა, ვიღას უნდა დავეტოლოთ, ამათ ქვევით სან მარინო და ლიხტენშტაინია და...

კარგი, ბატონებო! დავეტოლოთ სომხურ საკლუბო ფეხბურთს. ბოლო მნიშვნელოვან მატჩს, ლაკმუსის ქაღალდად რომ გამოდგება, აღარ მივუბრუნდებით და სხვა მხრიდან შევხედავთ საკითხს: უნდა დაგვიჯეროთ, რომ თუ საშუალო მაჩვენებლებს ავიღებთ, სომხურ საკლუბო ფეხბურთში გაცილებით მაღალი ხელფასებია, ვიდრე საქართველოში.

ჰოდა, კიდევ არაერთხელ გვაჯობებენ, რაოდენ სამწუხაროც უნდა იყოს, რადგან შედარებით უკეთესი ლეგიონერი მიდის იქ, სადაც უფრო კარგი პირობებია. და ამ "შედარებით კარგ" ლეგიონერებს რა შეუძლიათ, კი ვნახეთ ამასწინათ იმ ავადმოსაგონარ მატჩში...

არადა, ასეთი მოცემულობა არანაირად არ უნდა იყოს, რადგან სახელმწიფო იხდის ფულს და საკმაოდ სოლიდურსაც. სამწუხაროა, მაგრამ ფაქტია: კლუბის ხელმძღვანელობის მეტი წილი ჩვენს გუნდებში ფულის მოტანით აღარ არის დაკავებული, რადგან იცის, რომ მაინც ჩაამთავრებს სეზონს სახელმწიფოს ფულით.

ყველაზე დიდი ნონსენსი კი ის მგონია, რომ სახელმწიფოს დახმარების პირობებშიც კი, პირველი და უმაღლესი ლიგის არაერთ კლუბში ფინანსური კრიზისია. კიდევ ერთი დადასტურება იმისა, რომ ამ მოდელმა კლუბების დაფინანსებისა არ გაამართლა.

ერთია "არ გაამართლა" და მეორეა ის, რომ ფული აღარ არის, არადა, უნდა იყოს. მაგალითად, ყველა კარგად ვხედავთ, რა დღეშია ქუთაისის "ტორპედო". არავის პირადი უბედურება არ მიხარია, მაგრამ ეს კითხვა აუცილებლად უნდა დავსვა: დაიწყო გამოძიება დამნაშავის გამოსავლენად და მის დასასჯელად? თუ "ტორპედოს" გასაჭირი ჰაერიდან მოვიდა და ამ ისტორიას დამნაშავე არ ჰყავს?

ეს უნდა ვიცოდეთ - თუ დამნაშავე არ დაისაჯა, ისე არაფერი გამოსწორდება და ხვალაც იგივე მოხდება, რაც ხდება დღეს. ჩვენი საზოგადოება, მეტადრე ფეხბურთში ჩართული, მისი მეტი წილი ისეთია, რომ რაღაცით უნდა დააშინო. წინააღმდეგ შემთხვევაში, მანკიერს ვერ მოეშვება. დაახლოებით ასეთი პრინციპია: თუ გაუვიდა იმას, გამივა მეც!..

ვინ ოხერი ამოიღებდა ხმას, ქართული ფეხბურთი ჩვენი, ხალხის ფულით რომ არ ფინანსდებოდეს?! ჰოდა, რადგან ფული ჩემია, უფლება ხომ მაქვს, ვიკითხო - სად მიდის ეს ფული? ჩვენი მოქალაქეების მოზრდილ ნაწილს კი კონკრეტული, ჩამოყალიბებული პოზიცია აქვს - არ სურთ, რომ მათი ფული ამ მდარე ხარისხის ფეხბურთში იხარჯებოდეს და ვერც გაამტყუნებ!..

მაშინ, არცერთ სფეროში დღეს საკმარისი ფული არ არის საქართველოში და დავხარჯოთ ყველგან ხალხის ფული?! ფული, რომელიც შემდგარია ჩემი, თქვენი და სხვისი გადასახადებისგან!..

რაც უნდა კარგად შეფუთო ეს პროდუქტი, მაინც არ ვარგა. ჩვენი სტადიონების ტრიბუნები ცარიელია, ერთის გარდა. ძალიან კარგია, რაც ბათუმში ხდება, მაგრამ ეს გამონაკლისი შემთხვევაა და ხალხი ტრიბუნებზე საყვარელი გუნდის დიდი წარმატების მოლოდინს მიჰყავს - ბათუმის "დინამო" აქამდე არასოდეს გამხდარა საქართველოს ჩემპიონი...

საქმე მილიონებთან გვაქვს და დიდი სიფრთხილეა საჭირო. ყველაფერს რომ თავი დავანებოთ, არავინ იცის, რა ვითარება იქნება ხვალ და ვის როგორ მოეკითხება. მოკლედ, როცა რაღაც არ ვარგა, უნდა შეცვალო.

დაახლოებით რა და როგორ უნდა შეიცვალოს, ეს უკვე გვეწერა - მეტი კარტ-ბლანში კერძო ინვესტორებს, ფონდის ფული წავიდეს არა ფეხბურთელების ხელფასებში, არამედ ინფრასტრუქტურის გამართვაზე და უარი სახელმწიფო ფულზე ჩამოკიდებულებს! კეთილი ინებონ და, ხელფასისთვის ფული იმ ხალხმა მოიტანოს, "მეპატრონეები", "პრეზიდენტები" და "დირექტორები" რომ დაირქვეს.

თუ ფეხბურთელების ხელფასს სახელმწიფო გაისტუმრებს, იქით ბალახს ფეხბურთის ფედერაცია დაგიგებს, ასე კლუბის "მართვას" რა დიდი მენეჯერობა უნდა?!

არჩევნები მოდის და გვესმის, დიდი რისკია - ასეთი მიდგომა ვერ გამოდგეს. ბოლოს და ბოლოს, ფეხბურთის ფედერაციის ეს ხელმძღვანელობა მუდმივად ვერ იქნება იქ, სადაც დღეს არის და მას ხალხისთვის უნდა ჰქონდეს სათქმელი...

არ არსებობს მუდმივი თანამდებობა და აქედანვე ჯობია ფიქრი იმაზე, რა უნდა უთხრას ფეხბურთის ფედერაციამ ხალხს მისი მმართველობის ამოწურვის შემდეგ. ადამიანებს, რომელთა უმრავლესობასაც ცარიელი აქვს მაცივარი და ამ დროს მათი ფულით ვინახავთ ჩვენს საკლუბო ფეხბურთს, რომელსაც, ჯერჯერობით, წარმატების ნიშან-წყალი არ ეტყობა...

829
მკითხველის კომენტარები / 1 /
ზუზუ
1
საერთოდ არ ვფიქრობ, რომ რაიმე ცუდს აკეთებს ეს ფედერაცია. პირიქით! ..და მართლა დაემსგავსა ჩემპიონატი ჩემპიონატს. ძალიან მიხარია ახლად დაგებული ბალახები, სტადიონები, სფფ უფასო საფეხბურთო აკადემია. ამხელა ფული იხარჯებაო რომ ამბობთ, "ამხელა" სულაც არაა, თანაც 4 ლიგაზე იხარჯება, არამხოლოდ ეროვნულ ლიგა 1-ზე. ტრანსლაციები დაიწყო და ამან კიდევ უფრო გაზარდა მაყურებელთა რიცხვი.. ჯერ-ჯერობით საუკეთესო ფედერაციაა ვინც კი ყოფილა აქამდე იმათ შორის.
მსგავსი ამბები
რუბრიკის სხვა სიახლეები
;