ოლიმპიური კომიტეტის პრეზიდენტი ლერი ხაბელოვი ოლიმპიადის გადადებაზე: გულდასაწყვეტია, მაგრამ დღევანდელ ვითარებაში ამ გადაწყვეტილებას მივესალმები

უკვე ოფიციალურად - ტოკიოს წლევანდელი ოლიმპიური და პარალიმპური თამაშები 2021 წლისთვის გადაიდო. შესაბამისად, ტოკიო-2020 გახდა ტოკიო-2021. ამის შესახებ დღეს, 24 მარტს გახდა ცნობილი საერთაშორისო ოლიმპიური კომიტეტისა და ტოკიო-2020 საორგანიზაციო კომიტეტის ხელმძღვანელთა შეხვედრის შემდეგ, როცა ერთობლივი შეთანხმებით მიიღეს გადაწყვეტილება, მსოფლიოში გავრცელებული ახალი კორონავირუსის პანდემიის გამო თამაშები მომავალი წლისთვის გადაეტანათ. თუმცა ჯერჯერობით არაა ცნობილი კონკრეტული ვადები.

გარკვეულია მხოლოდ ის, რომ თამაშები ზაფხულში გაიმართება, ზუსტი თარიღები კი მოგვიანებით გამოცხადდება. უცვლელი დარჩება თამაშების დასახელება - `ოლიმპიური და პარალიმპური თამაშები - ტოკიო-2020. ბუნებრივია, არც ნუმერაცია შეიცვლება და ტოკიოს ოლიმპიადა XXXII იქნება.

ოლიმპიადის გადატანა სალიცენზიო ტურნირების ცვლილებასაც გამოიწვევს. თავდაპირველი გეგმით, ამ რანგის შეჯიბრებები წლეულს 30 მაისს უნდა დასრულებულიყო, თუმცა მერე კორონავირუსის პანდემიის გამო ეს ვადა 30 ივნისამდე გადასწიეს, ახლა კი თავიდან მოუწევთ ვადების განსაზღვრა, რადგან სპორტის ბევრ სახეობაში ჯერაც არ დასრულებულა ოლიმპიური საგზურების განაწილება.

ტოკიო-2020 ერთი წლით გადავადებასთან დაკავშირებით კომენტარი ეროვნული ოლიმპიური კომიტეტის პრეზიდენტ ლერი ხაბელოვს ვთხოვეთ. რომელმაც შემდეგი განაცხადა:

"თქვენ იცით, რომ ოლიმპიადის ერთი წლით გადადებასთან დაკავშირებით ამერიკის შეერთებული შტატების პრეზიდენტმა დონალდ ტრამპმაც კი გააკეთა განცხადება. ასევე იცით, რომ 18 მარტს ოლიმპიური ცეცხლიც აინთო, რომელიც იაპონიაშიც ჩაიტანეს, რაც იმას ნიშნავდა, რომ ოლიმპიური თამაშები დათქმულ ვადებში უნდა ჩატარებულიყო, მაგრამ მსოფლიოში გავრცელებული ამ პნევმონიის გამო გაურკვეველი ვითარება შეიქმნა, ჩატარდებოდა თუ არა თამაშები. რამდენიმე ქვეყანამ მონაწილეობაზე უარიც კი განაცხადა.

აქედან გამომდინარე, ჯერ იაპონიის პრემიერ-მინისტრმა, მერე კი ოლიმპიადის საორგანიზაციო კომიტეტმა განაცხადეს, რომ უფრთხილდებიან სპორტსმენების ჯანმრთელობას და სურდათ ისეთი თამაშების ჩატარება, რასაც არანაირი ექსცესები არ მოჰყვებოდა. აქედან გამომდინარე, მიიღეს ოლიმპიადის გადავადების გადაწყვეტილება. რა თქმა უნდა, ასეთი შეთანხმება დასანანია, მაგრამ სწორი გადაწყვეტილებაა, რათა ამ ეტაპზე გაურკვევლობა არ ყოფილიყო. იცით, რომ ლიცენზიების განაწილების ბოლო ვადამაც გადაიწია, თუმცა იმ დროისთვისაც რა იქნება, არავინ იცის. ამიტომ აჯობებდა ასეთ ნაბიჯზე წასვლა, თუმცაღა თავად საერთაშორისო ოლიმპიური კომიტეტისთვისაც ძნელი იქნებოდა ამაზე წასვლა და მეც ისეთი შეგრძნება მაქვს, რომ ძნელი გადაწყვეტილებაა.

ოღონდ ამ შექმნილ რეალობაში ეს სწორი გადაწყვეტილებაა და მივესალმებით მას. აჯობებს, ყველაფერი დაწყნარდეს და ისე ჩატარდეს. თანაც, რომელიმემ ქვეყანამ რომ არ მიიღოს მონაწილეობა, ეს დიდი დარტყმა იქნება ოლიმპიადისთვის. კარგად გვახსოვს მოსკოვისა და ლოს ანჟელესის თამაშები, სადაც არ გამოდიოდნენ ძლიერი სპორტსმენები რამდენიმე ქვეყნიდან და ამიტომ არ ჩაითვალა ისეთ სრულფასოვან თამაშებად. მთავარია, ოლიმპიადაში სპორტსმენებმა მიიღონ მონაწილეობა, თორემ მათ გარეშე თამაშების გამართვა არაა სწორი და გამართლებული. ამიტომ გადავადება გულდასაწყვეტია, მაგრამ დღევანდელ ვითარებაში მივესალმები ამას."

271
მკითხველის კომენტარები / 0 /
მსგავსი ამბები
რუბრიკის სხვა სიახლეები
;