ოლიმპიური კომიტეტი. ახალი იდეები ძველი პრობლემებით

22 დეკემბერს სასტუმრო "Biltmorshi" საქართველოს ეროვნული ოლიმპიური კომიტეტის ყოველწლიური საანგარიშო სესია გაიმართა, რომლის დღის წესრიგშიც 5 საკითხი იყო:

სეოკ-ის აღმასკომის ანგარიში წლეულს გაწეული მუშაობის შესახებ; ზამთრის XXIII თამაშებისთვის მზადება, რომელსაც გაისად, 9-25 თებერვალს კორეული პიონჩანგი უმასპინძლებს; საქართველოს ახალგაზრდული ოლიმპიური ფესტივალი; აუდიტის მოხსენება და სხვადასხვა.

მისასალმებელი სიტყვის, ნელი სალაძის, ელგუჯა ბერიშვილისთვის დაბადების დღეების მილოცვის და სხვა აუცილებელი საკითხების ჩამთავრების შემდეგ, მოხსენებით სეოკ-ის პრეზიდენტი ლერი ხაბელოვი გამოვიდა, რომელმაც უარი თქვა ბოლო დროს დამკვიდრებულ წესზე - მოხსენებითი სიტყვა ბროშურებად დაერიგებინა დელეგატებისთვის და ისურვა, პირადად გამოსულიყო მათ წინაშე.

მან მიმდინარე სეზონის მთავარ მოვლენად სპორტის ოლიმპიურ სახეობებში მსოფლიოს 4 ჩემპიონი მიიჩნია (ანასტასია გოტფრიდი, ლაშა ტალახაძე, გენო პეტრიაშვილი, ზურაბ იაკობიშვილი), რაც ქართული სპორტისთვის უპრეცედენტო ფაქტია.

ამას ემატება ასაკობრივ ნაკრებებში ევროპისა და მსოფლიოს ჩემპიონატებზე მოპოვებული 150-ზე მეტი მედალი, 9 ჯილდო და გუნდური XI ადგილი ევროპის ზაფხულის ახალგაზრდულ თამაშებზე, ხოლო ზამთრისაზე - 20 წლის შემდეგ პირველად მოპოვებული მედალი.

"მსოფლიოს 4 ჩემპიონი 5 ოლიმპიურ დისციპლინაში! ასეთი რამ პირველად ხდება საქართველოს დამოუკიდებლობის პერიოდში. ასეთი რამ ძალზე იშვიათად თუ მომხდარა შორეულ საბჭოთა ეპოქაშიც. წლები ისე გადიოდა, ერთი ოქროც სანატრელი გვქონდა, დღეს კი 4 ჩემპიონი გვყავს. ამას დაუმატეთ ლაშა ტალახაძის მსოფლიოს რეკორდები...

მოკლედ, მართლაც რომ წარმატებული წელიწადი გამოვიდა მრავალი თვალსაზრისით" - აღნიშნა ხაბელოვმა, თუმცა იქვე ისიც დაამატა, რომ ეს სულაც არაა ქართული სპორტის მაქსიმუმი და პროცესის სწორად დაგეგმვის შემთხვევაში ბევრად მეტის მიღწევაც შეგვიძლია.

ბუნებრივია, ხაბელოვი და სესია ვერც ისეთ უმნიშვნელოვანეს საკითხს ასცდნენ, როგორიც სპორტის სამინისტროს კულტურის შესაბამის უწყებასთან გაერთიანებაა.

მან ეს მთავრობის ადრევე გამოცხადებული გრძელვადიანი სტრატეგიის ნაწილად მიიჩნია და დასავლურ მოდელზე გადასვლით ახსნა, რეფორმის წარმატებით განსახორციელებლად კი აუცილებლად მიიჩნია, ამ პირველ ნაბიჯს უნდა მოჰყვეს შესაბამისი გადაჯგუფებები ქვედა რგოლებში.

მართვის მოდელზე საუბრისას ოლიმპიურმა ჩემპიონმა აღნიშნა, რომ ველოსიპედის გამოგონება საჭირო არაა, რადგან არსებობს სპორტში წამყვანი დასავლური ქვეყნების გამოცდილება, სოკ-ისა და პარტნიორი ორგანიზაციების რეკომენდაციები იმასთან დაკავშირებით, რომ მაღალი მიღწევების სპორტის მართვაში ლომის წილი ოლიმპიურ კომიტეტზე უნდა მოდიოდეს.

"რასაკვირველია, ამ როლის შესასრულებლად ოლიმპიურ კომიტეტს უნდა გადაეცეს სპორტში მისი სტატუსისა და ფუნქციის შესაბამისი უფლებამოსილება. თავის მხრივ, ოლიმპიურმა კომიტეტმა, სპორტულ ფედერაციებთან ერთად, უნდა აიღოს შესაბამისი პასუხისმგებლობა.

ოლიმპიური კომიტეტი და ოლიმპიური სპორტი - ეს არის სრულიად ბუნებრივი და ლოგიკური კავშირი" - აღნიშნა ხაბელოვმა და ეს ყველაფერი ისევ და ისევ დასავლურ რეკომენდაციებს დაუკავშირა. სეოკ-ის სახელით, მან გამოთქვა მზადყოფნა, აქტიური მონაწილეობა მიიღონ რეფორმის განხორციელების პროცესში.

პრობლემების ნაწილი

სესიაზე პრობლემებზეც მრავლად ისაუბრეს. ხელბურთის ფედერაციის პრეზიდენტმა ზურაბ კაკაბაძემ ახალი სპორტული ბაზების მშენებლობა-დაპროექტებაში სპეციალისტების ჩართვა ითხოვა, რათა ახალი ბაზები სტანდარტების შესაბამისად აშენდეს.

მისმა კოლეგა მაკა გიორგობიანმა ინფრასტრუქტურის და ინვენტარის პრობლემის მოგვარება მოითხოვა, უპირველესად კი - ყინულის სასახლის მშენებლობა. ითქვა, რომ მსოფლიოში არც ერთი დიდი ქვეყნის დედაქალაქი არ არსებობს ყინულის დარბაზის გარეშე.

კოტე ლაშხმა ტანვარჯიშიდან პეტრიაშვილის ქუჩაზე მდებარე ტანვარჯიშის აწ უკვე გასხვისებული დარბაზის დაბრუნება ითხოვა, თუმცა სხვა ინიციატივებითაც გამოვიდა.

კერძოდ, ისაუბრა სპორტული ბაზების მაღალ გადასახადებზე და საკანონმდებლო დონეზე შეღავათების დაწესება მოითხოვა. აგრეთვე - აქციზური პროდუქციიდან მიღებული შემოსავლის ნაწილის სპორტისკენ მიმართვა.

კახი კახიაშვილმა უფრო მიღწევებზე ისაუბრა და განაცხადა, რომ ქართული ძალოსნობის ბოლოდროინდელი წარმატებების ფონზე (50 მედალი აქტივში) 6-ჯერ გაიზარდა მოვარჯიშეთა რაოდენობა, აშენდა სხვადასხვა სიმძლავრის 24 დარბაზი.

სხვადასხვა გამომსვლელთა მიერ ასევე ბევრი ითქვა, რომ ქვეყანაში არაა სპორტული მედიცინისა და რეაბილიტაციის ცენტრი, სპორტული დისპანსერი, რომლებიც აუცილებელია სპორტის ნორმალური ფუნქციონირებისთვის.

პრობლემათა მოგვარებაზე ყველამ მიიღო შესაბამისი დაპირება და ვნახოთ, რამდენად შეასრულებენ.

მზადება პიონჩანგისთვის

ზამთრის ოლიმპიადისთვის მზადებაზე სეოკ-ის ვიცე-პრეზიდენტმა, პიონჩანგში ოლიმპიური მისიის ხელმძღვანელმა მამუკა ხაბარელმა გააკეთა განცხადება. კორეულ ოლიმპიადაზე კვარტეტი გვეყოლება სამ დისციპლინაში:

ნინო წიკლაური, იასონ აბრამაშვილი (ორივე - სამთო თხილამურობა), მორის ყვითელაშვილი (ფიგურული ციგურაობა) და მოციგავე გიორგი სოღოიანი, ვინც თურმე ლამის მთელი მსოფლიო შემოიარა ლიცენზიის ძებნაში და ჩვენებში ყველაზე ბოლოს, მაგრამ მაინც უწია მიზანს.

ხაბარელმა ძირითადად იმაზე ისაუბრა, რომ ქვეყანაში, განსაკუთრებით კი მაღალმთიან რეგიონებში უამრავი პროექტი იგეგმება ზამთრის სპორტისთვის, უპირველესად კი - ბაკურიანში.

სესიის დასასრულს სიტყვით გამოვიდა კულტურისა და სპორტის მინისტრი მიხეილ გიორგაძე, რომელმაც ვრცლად ისაუბრა სპორტის მნიშვნელობაზე და ყველას შეჰპირდა დახმარებას.

ყოველდღიური სპორტული გაზეთი "ლელო"
385
მკითხველის კომენტარები / 0 /
მსგავსი ამბები
რუბრიკის სხვა სიახლეები