ოლიმპიური ჩემპიონი, რომელსაც ყოფილი და ახალი შეყვარებულების გაშველებამ მოუწია

ფედერიკა პელეგრინი თავისი მიღწევებით არა მხოლოდ ცურვაში, სპორტში გამორჩეული ადამიანია.

ის გახლავთ ოლიმპიური ჩემპიონი და ვიცე-ჩემპიონი, მსოფლიოს და ევროპის შვიდ-შვიდ გზის ჩემპიონი (ვერცხლის და ბრინჯაოს მედლების თვლით არ დაგღლით).

გარდა ტიტულებისა, ფედერიკამ დიდი ხანია მყარად დაიმკვიდრა ადგილი თანამედროვე სპორტის სექს სიმბოლოებს შორის. პოპულარობა სპორტის მიღმა იტალიელ სპორტსმენ ქალბატონს სულაც არ უშლის ხელს პროფესიული წარმატებების მოპოვებაში. ფედერიკა არის პიროვნება, რომელმაც მსოფლიოს და ოლიმპიური თამაშების ოქროს მედლებს, პარალელურად საკმაოდ ლაღი პირადი ცხოვრება შეუწყვილა და საკუთარ გულშემატკივარს ორივე ფრონტზე მოღვაწეობით თვალყურის დევნების ინტერესს უღვივებს.

თავისუფლება წყალში
,,სულ პატარა ვიყავი, როდესაც დედამ წყალში ჩამიშვა ცურვის შესასწავლად. ეს იყო ერთი ნახვით შეყვარება. ცურვა გახდა ჩემი ბედნიერება. მხოლოდ წყალში ვგრძნობ თავს თავისუფლად" - ამბობს ფედერიკა პელეგრინი.
გოგონა სპორტმა ბავშვობის ასაკიდან გაიტაცა. მისი წვრთნა ნაყოფიერად მიმდინარეობდა, მწვრთნელები უქებდნენ შრომისმოყვარეობას და მეტად მონდომებული პატარა, მალე ჩამოყალიბდა იმედისმომცემ სპორტსმენად.

უმცროსი ასაკიდანვე წარმატებებს მიჩვეული პელეგრინი იტალიის ნაკრებსაც მალე გაუშინაურდა. ოღონდ იქვე მის ცხოვრებაში რთული ეტაპიც დადგა. ,,ყველაზე სერიოზული კრიზისი ჩემს ცხოვრებაში მქონდა 15 წლის ასაკში, როდესაც მილანში გადავედით. მაშინ დაიწყო დეპრესია. ამასთან გარეგნულადაც შევიცვალე, რაც სულაც არ მომწონდა და ყველაფერს საკმაოდ განვიცდიდი" - იხსენებს იგი.

16 წლის ასაკში ფედერიკა აღიარებული სპორტსმენი გახდა. ისაა ყველაზე ახალგაზრდა იტალიელი, რომელმაც მოიპოვა ოლიმპიური მედალი (2004 წ. ათენში) ცურვაში, აგრეთვე ერთდერთი იტალელი მოცურავეა, რომელიც ოლიმპიური ჩემპიონი გახდა (პეკინი 2008). გარდა ამისა, ის პირველი ქალია, რომელმაც გაცურა 400 მეტრი თავისუფალი ყაიდით ცურვაში 4 წუთზე ნაკლებ დროში.

ცვლილებები
ათენის ოლიმპიური თამაშების შემდეგ, სადაც როგორც აღვნიშნეთ ერთი ნაბიჯი დააკლდა ოქროს მედლამდე, პელეგრინიმ რადიკალური ცვლილებები განახორციელა, როგორც პირად ცხოვრებაში, ისე პროფესიულ კარიერაში.
გოგონამ ირგვლივმყოფ ადამიანებზე გული აიყარა. ამიტომაც დაშორდა ჯერ ბოიფრენდს, მერე მენეჯერს და გადავიდა ვერონაში საცხოვრებლად. მისი ყოფილი მეგობარი ბიჭი ლუკა მარინი, იტალიის მოცურავე ვაჟთა ნაკრების წევრი იყო. ახალი შეყვარებულის მოსაძებნად ჩემპიონი შორს არ წასულა, იმავე ნაკრებში კიდევ ერთ წევრ ფილიპო მანინისთან გააბა ურთიერთობა.

საინტერესოა, რომ ფედერიკას დათმობა არც მარინის გაუიოლდა და არც მანინის ერგო ლამაზმანი უპრობლემოდ. მაშინ იტალიურ პრესაში გახმაურდა ინციდენტი, რომელსაც ცურვის დარბაზში ჰქონდა ადგილი და ცხადია პაპარაცებს ეს არც გამორჩენიათ მხედველობიდან - ფედერიკას ყოფილ და ახალ რჩეულს შორის ხელჩართული ჩხუბი მოხდა. ყოფილი და ახალი მეგობარი ბიჭების გაშველება ფედერიკას მოუწია.
პელეგრინის ცვლილებებს პეკინის (2008 წ) ოლიმპიადის ოქრო მოჰყვა და მართალია შემდგომ ლონდონის (2012) და რიო დე ჟანიეროს (2016) ოლიმპიადებზე ფედერიკას ხელი მოეცარა, მაგრამ მაგალითად მსოფლიოს ჩემპიონატები უკანასკნელ 5 წელიწადში კიდევ ხუთჯერ მოიგო.

წინააღმდეგობრივი
ფედერიკა პერიოდულად მოდების ჩვენებებში იღებს მონაწილეობას და სხვადასხვა ჟურნალებისთვის ყდაზე გამოსაქვეყნებლად საკუთარი სხეულის დემონსტრირებასაც არ იზარებს.

,,ადრე ცელქი გოგო ვიყავი, მაგრამ ვერასოდეს ვიფიქრებდი, რომ ეროტიკულ ფოტოსესიაში მივიღებდი მონაწილეობას. ამ ფოტოსესიის შემდეგ პირველ რიგში ქალად ვგრძნობ თავს და მერე სპორტსმენად. ვერ ვიტან კეკლუცობას, ვარ პირდაპირი. სიყვარულში კი რთული და არაერთგვაროვანი. ბევრი მიმიჩნევს რკინის ლედიდ, თუმცა ეს არაა ასე. უბრალოდ ვმალავ საკუთარ პრობლმებს. მე ერთნაირად ვარ მამაცი და მხდალი, მშვიდი და სკანდალური, შემრიგებლური და ამაყი. ბუნებრით მელანქოლიური ვარ და ადვილად შემიძლია თავი ვიგრძნო მარტოსულად. მწამს ღმერთის და რა თქმა უნდა ცხოვრების ყველაზე მძიმე წუთებში მეც ვთხოვ მას მფარველობას" - პელეგრინის ეს სიტყვები საკუთარ თავზე საკმაოდ საინტერესო შტრიხებს გვაწვდის მისი პიროვნების, ხასიათის გასაცნობად.

და კიდევ მეტად საინტერესო და ამავე დროს საყურადღებო დეტალი - ესოდენ ტიტულოვანი მოცურავე ცურვას ამჯობინებს მხოლოდ აუზში. გაუმჭვირვალ, უკიდეგანოდ ღრმა ზღვაში ცურვისას მას შიში იპყრობს. ზღვაში ყოფნა მხოლოდ სხვასთან ერთად შეუძლია (?!)

17393
მკითხველის კომენტარები / 0 /
მსგავსი ამბები
რუბრიკის სხვა სიახლეები
;