ოლიმპიურმა კომიტეტმა აირჩია: 2018 წლის საუკეთესო ლაშა ტალახაძეა!

21 დეკემბერს "ივენთ ჰოლში" გაიმართა საქართველოს ეროვნული ოლიმპიური კომიტეტის საანგარიშო სესია, რომელიც მისმა პრეზიდენტმა ლერი ხაბელოვმა გახსნა და მიმოიხილა 2018 წლის სპორტული სეზონი.

ეს სეზონი მართლაც უჩვეულოდ წარმატებული აღმოჩნდა ქართული სპორტისთვის: 18 მედალი ევროპისა და მსოფლიოს ჩემპიონატებში; მსოფლიოს 3 ჩემპიონი და, სხვათა შორის, სამივე მძიმე წონაში: ლაშა ტალახაძე ძალოსნობაში, გენო პეტრიაშვილი თავისუფალ ჭიდაობაში და გურამ თუშიშვილი ძიუდოში; წარმატებები არა მხოლოდ ზაფხულის, არამედ ზამთრის სახეობებში, რამაც ქვემოთ ჩამოთვლილ ნომინაციებში ახალი ნომნაციის შემოღების საჭიროება გააჩინა; უჩვეულო წარმატება და პირველი ოქროს მედალი მსოფლიოს ახალგაზრდულ ოლიმპიურ თამაშებში; უჩვეულო მიღწევები და გამოცოცხლება ისეთ სახეობებში, როგორიცაა ჩოგბურთი და სუმო... ერთი სიტყვით, ხაბელოვს სალაპარაკო მართლაც ბევრი ჰქონდა.

სესიაზე დაასახელეს სხვადასხვა ნომინაციებში გამარჯვებულები, თუმცა მთავარი მოვლენა წლის საუკეთესო სპორტსმენის გამოვლენა იყო, რომელიც დელეგატებმა გამოავლინეს ფარული კენჭისყრით. ნომინანტთა სიაში შედიოდნენ ნიკოლოზ ბასილაშვილი (ჩოგბურთი), გურამ თუშიშვილი (ძიუდო), გენო პეტრიაშვილი (თავისუფალი ჭიდაობა) და ლაშა ტალახაძე (ძალოსნობა). საბოლოოდ ხმათა უმრავლესობით 2018 წლის საუკეთესო სპორტსმენი გახდა ძალოსნობაში მსოფლიოსა და ევროპის ჩემპიონი, მსოფლიოს შვიდგზის რეკორდსმენი ლაშა ტალახაძე. სხვა ნომინაციებში გამარჯვებულები გახდნენ:

წლის საუკეთესო ახალგაზრდა სპორტსმენი: გიორგი ჩხიკვაძე (ბერძნულ-რომაული ჭიდაობა) - მსოფლიოს ახალგაზრდული ოლიმპიური

თამაშების მესამე პრიზიორი. "საქართველოს ბანკისგან" მას გადაეცა ჯილდო - 10 000 ლარი

წლის აღმოჩენა: ნუგზარ წურწუმია (ბერძნულ-რომაული ჭიდაობა) - ევროპისა და მსოფლიოს მესამე პრიზიორი

საუკეთესო ზამთრის სახეობებში: გიორგი რევია-მარია კაზაკოვა (ფიგურული ციგურაობა) - მსოფლიოს თასის ფინალისტები

საუკეთესო მწვრთნელი: ნუგზარ სხირელი (თავისუფალი ჭიდაობა)

რეგიონული აქტივობა: იმერეთის რეგიონი (სეოკ-ის რეგიონული ორგანიზაციის პრეზიდენტი რევაზ რობაქიძე)

წლის საუკეთესო სპორტსმენი ქალი: ანასტასია გოტფრიდი (ძალოსნობა) - ევროპის მესამე პრიზიორი 23-წლიანებში

მედია-მხარდამჭერი: ტელეკომპანია "იმედი". "იმედს" გადაეცა კოტე მახარაძის სახელობის თასი

ოლიმპიური მოძრაობის მხარდამჭერი: "საქართველოს ბანკი" - სეოკ-ის გენერალური სპონსორი

სესიაზე დაანონსეს, რომ გაისად ამათ დაემატება რამდენიმე ახალი ნომინაცია: ოლიმპიურ სახეობებში წლის საუკეთესო ფედერაცია, საუკეთესო გუნდი, საუკეთესო ახალგაზრდა გოგო და ბიჭი სპორტსმენი.

ყოველდღიური სპორტული გაზეთი "ლელო"
1418
მკითხველის კომენტარები / 2 /
gogka
0
ალალია ამ კაცზე ყველაფერი კაი!!!
soxumeli veterani
0
100% !!! Vulocav Lashas!!!
მსგავსი ამბები
რუბრიკის სხვა სიახლეები
;