ომარ მიგინეიშვილი: იმ დროიდან მახსოვდა, რომ ბურთს ხშირად მეკარისგან მარცხენა კუთხეში გზავნიდა

ეროვნული ლიგის 31-ე ტურში "სამტრედიამ" თბილისში "დინამო" ანრი ნდონგის გოლით 1:0 დაამარცხა, მასთან ჩამორჩენა 4 ქულამდე შეამცირა და ჩემპიონატის დასრულებამდე 5 ტურით ადრე საჩემპიონო ტიტულის შენარჩუნების იმედი შეინარჩუნა.

დინამო (თბ)-სამტრედია 0:1 - სამტრედიამ სიტუაცია დაძაბა [VIDEO]

გუნდს ვერც 30-ე ტურში ბათუმის "დინამოსთან" დაეხმარა და ვერც - თბილისის "დინამოსთან". აღმოჩნდა, რომ სამტრედიელთა ცენტრალური მცველი ნიკა სანდოხაძე ტრავმირებულია, თუმცა, ტრავმა მძიმე არ არის, მკურნალობას ოქტომბრის ბოლომდე დაასრულებს და მოედანს დაუბრუნდება.

უჩა სოსიაშვილის გუნდმა მეორე ტაიმში მეტოქეს ჯერ ხელიდან თამაშის სადავეები გამოჰგლიჯა, მერე კი - 3 ქულაც და ყველაზე ტიტულოვანი ქართული გუნდი "დინამო-არენაზე" 21-წლიანი პაუზის შემდეგ დაამწუხრა.

"ეს გამარჯვება ჩვენი გუნდის გულშემატკივრებისთვის, ხელმძღვანელებისა და ფეხბურთელებისთვის ბევრს ნიშნავდა. ძალიან სასიამოვნოა, თბილისის "დინამოსთან" მისსავე სტადიონზე რომ გაიმარჯვებ.

გამარჯვების შანსი ორივე გუნდს ჰქონდა. ძალიან მძიმედ დავიწყეთ თამაში, ჩვენს კარში პირველივე წუთზე პენალტი დაინიშნა, რომელიც მოვიგერიეთ. შეხვედრა ამის შემდეგაც ჩვენთვის არასასურველი სცენარით წარიმართა - პირველ ტაიმში თამაში ვერ დავალაგეთ. თუმცა მეორე ნახევარი ბევრად უფრო საინტერესო და გახსნილი იყო და თამაშის ხარისხიც გამოვასწორეთ.

იქიდან გამომდინთრე, რომ მეორე ტაიმში მეტი საგოლე მომენტი შევქმენით, მიმაჩნია, უკეთესი თამაშის ხარისხი ვაჩვენეთ და გოლიც გავიტანეთ. ამ შეხვედრაში ჩვენ გაგვიმართლა. თუმცა გამართლება დიდ შრომას მოაქვს", - ამბობს სოსიაშვილი.

გია მანჯგალაძე, "სამტრედიას" ნახევარმცველი: "ეს მოგება ყველანაირად მნიშვნელოვანი იყო. ჯერ იმიტომ, რომ თბილისში "დინამოს" დამარცხება ბევრს ნიშნავს და მეორე იმიტომ, რომ საჩემპიონო ბრძოლას დავუბრუნდით. ასე რომ, ლიგაში საჩემპიონო ბრძოლის ინტრიგა შევინარჩუნეთ. ახლა ყველაფერი ჩვენზე იქნება დამოკიდებული, მოვახერხებთ თუ არა ამ შანსი გამოყენებას. მიმაჩნია, რომ დამსახურებულად მოვიგეთ".

თამაშის გმირი კი უდავოდ ომარ მიგინეიშვილი იყო - სამტრედიელთა მეკარემ პირველივე წუთზე ლაშა თოთაძის დარტყმული პენალტი მოიგერია და მერეც რამდენჯერმე აშკარა გოლისგან იხსნა გუნდი.

მიგინეიშვილი "ლელოს" განვლილ შეხვედრასა და საჩემპიონო ბრძოლაზე ელაპარაკა:

- ეს ძალიან კარგი და მაღალი დონის თამაში გამოვიდა. არა მხოლოდ იმიტომ, რომ მოვიგეთ - ძალიან დიდი იყო შეხვედრის მნიშვნელობა.

- სხვათა შორის, პირველ წრეში "დინამოსთან" 2:3 კი წააგეთ, მაგრამ მაშინაც კარგი თამაში ჩაატარე - "დინამოზე" გაქვს ეს სტიმული თუ ეროვნულ სტადიონზე?
- ორივე დიდი სტიმულია. საერთოდ, ფეხბურთელი არ მეგულება, რომელიც "დინამო არენაზე" ფეხს შედგამს და იქ განსაკუთრებულად არ მოინდომებს. სხვათა შორის, იმასაც ვერ ვიტყვი, რომ ხალხი არ დადის, 2500-3000 გულშემატკივარი მაინც იქნებოდა. მაგრამ ეს იმხელა სტადიონია, რომ ასეთი რაოდენობა არ ჩანს. პატარა სტადიონზე, მაგალითად, სამტრედიასა და ბათუმში 2 ათასი ადამიანიც ძალიან კარგ საფეხბურთო ატმოსფეროს ქმნის.

- ადვილი გასაგებია, პირველივე წუთზე დანიშნული პენალტი და მიღებული ყვითელი ბარათი რა ხასიათზე დაგაყენებდა.
- სხვათა შორის, შესაძლოა, ბევრმა იფიქრა, რომ პენალტი დასანიშნი იყო, მაგრამ სინამდვილეში ასე არ ყოფილა.

- ქავთარაძე წააქციე და რატომ არ იყო?
- მე ნამდვილად არ წამიქცევია, ბურთის მოსაგერიებლად გავვარდი და თავად გამომედო. ახლა ამ ყვითელი ბარათის გამო შემდეგი ტურის შეხვედრას ვტოვებ და ეს ძალიან არ მესიამოვნა.

- თოთაძის პენალტი როგორ აუღე? ჩანდა, რომ კუთხე არ გამოგიცნია, წინასწარ გადახტი.
- ასე იყო, მართლა წინასწარ გადავხტი.

- იცოდი, რომელ კუთხეში დაარტყამდა?
- მე და ლაშა ხომ "დინამოში" ერთად ვთამაშობდით? პენალტებსა და ჯარიმებს რომ ურტყამდა, კარში ხშირად მე ვუდგებოდი. იმ დროიდან მახსოვდა, რომ ბურთს ხშირად მეკარისგან მარცხენა კუთხეში გზავნიდა.

- მოკლედ, კაცმა ხეზე ასვლა არავის არ უნდა ასწავლოს, რა...
- (იცინის) ეს ცოდნა ახლა ძალიან გამოგვადგა, გუნდმაც ძალიან კარგად ითამაშა და ძალიან მნიშვნელოვანი 3 ქულა მოვიპოვეთ. ამით ჩემპიონატში ვითარება ძალიან დავძაბეთ. ამისთვისაც ღირდა თავის დადება, რომ ბოლო 5 ტური მაყურებლისთვის საინტერესო და დამაინტრიგებელი გამხდარიყო. თორემ, რომ წაგვეგო, პირველობისთვის მხოლოდ "დინამო" და "ტორპედო" იბრძოლებდნენ. ახლა ამის შანსი ჩვენც გაგვიჩნდა. კიდევ ბევრი სხვა რამისთვისაც. მეტოქეს "დინამო არენაზე" 21-წლიანი პაუზის შემდეგ მოვუგეთ.

საერთოდ, ჩვენი გუნდი "სამტრედიას" ისტორიას ხელახლა წერს. 22 წლის შემდეგ გუნდი ევროთასებზე პირველად გავიდა, პირველად გავხდით ჩემპიონები და თასის მფლობელები.

- კალენდრიდან გამომდინარე, წლეულს ჩემპიონობისთვის ბრძოლა რეალურად მიგაჩნიათ?
- პირველი ნახევრის შემდეგ ეს უფრო არარეალური იყო, ვიდრე ახლა. ნებისმიერ შემთხვევაში, ბოლო ტურამდე უნდა ვიბრძოლოთ და დარჩენილ ხუთივე შეხვედრაში მოსაგებად ვიბრძოლოთ.

სხვათა შორის, დარჩენილ ტურებში ლიდერთა ჯგუფიდან "საბურთალოს", "ტორპედოს" და "ლოკომოტივს" ვხვდებით, აუტსაიდერებიდან კი - "კოლხეთს" და "დილას", ქულები კი ყველას სჭირდება და გასეირნება არსად გველის. ბოლო დროს პრინციპულ შეხვედრებს ვიგებთ და ამის იმედი მაქვს.

- "სამტრედიას" ლეგიონერებზე რას იტყვი?
- თავიდან ფორმაში არ იყვნენ, რადგან სათამაშო პრაქტიკა აკლდათ. რაც უნდა იყოს, უცხო ქვეყანაში ადაპტაცია ძნელია და დრო სჭირდება. მაგრამ ახლა ნელ-ნელა კონდიციებში შედიან და ათამაშდნენ. ბურთიც იციან და კარგადაც გარბიან. ჩვენთან კი სირბილის გარეშე არავინ გაჩერდება. "პოლარისის" მონაცემები რომ ვნახე, არ გამკვირვებია, მინიმუმი 10 კილომეტრი იყო.

ყოველდღიური სპორტული გაზეთი "ლელო"
1584
მკითხველის კომენტარები / 0 /
მსგავსი ამბები
რუბრიკის სხვა სიახლეები
;