ორი ბრძოლა იტალიაში - თბილისის 'ლოკომოტივი' კონტინენტის ფარზე ითამაშებს

საქართველოს ჩემპიონი თბილისის "ლოკომოტივი" დღეს იტალიაში გაემგზავრა, სადაც 10 დღეს დარჩება და კონტინენტის ფარის გათამაშების ორ შეხვედრას გამართავს.

ყველაზე ტიტულოვანმა ქართულმა კლუბმა ევროთასებზე პირველი მატჩი 13 ოქტომბერს, "ავჭალის სარაგბო სტადიონზე" გამართა, "კალვიზანოს" უმასპინძლა და 6:17 წააგო.

მეორე ტურში "ლოკომოტივი" ისვენებდა. "კალვიზანომ" კი, რომის "ფიამე ოროს" 35:20 მოუგო. 4 ლელოს გატანისთვის საპრემიო ქულაც აიღო და ჯგუფს 9 ქულით ლიდერობს.

მე-3 ტურში, 8 დეკემბერს, საქართველოს ჩემპიონი "ფიამე ოროს" რომში შეხვდება და ამ მატჩის მოგებული სამგუნდა ჯგუფში პირველი ადგილის დაკავების შანსს შეინარჩუნებს. თამაში თბილისის დროით 18 საათზე დაიწყება.

"ლოკომოტივი" მატჩის შემდეგ რომში დარჩება და მომავალ ხუთშაბათს კალვიზანოში გადაინაცვლებს. 15 დეკემბერს კი, ჯგუფის ლიდერ "კალვიზანოს" შეხვდება. ეს მატჩიც 18 საათზე იწყება.

"რთული ამოცანის წინაშე ვდგავართ. თუმცა, მოტივაცია არ გვაკლია. იმისათვის, რომ ჯგუფიდან გასვლა მოვახერხოთ, "ფიამე ოროსთან" საპრემიო ქულა უნდა ავიღოთ. ხოლო "კალვიზანოს" 11-ზე მეტი ქულის სხვაობით ვაჯობოთ. "ფიამე ორო" შედარებით სუსტი გუნდია, უპირატესობას შერკინებით თამაშს ანიჭებს და, ვფიქრობ, მათთან მიზნის მიღწევა სრულებით შესაძლებელია. "კალვიზანოსთან" კი, უფრო რთული თამაში გვექნება". - თქვა "ლოკომოტივის" მთავარი მწვრთნელის ასისტენტმა სიმონ მაისურაძემ.

ლოკომოტივის შემადგენლობა
შერკინება: ვახტანგ ქვათაძე, ირაკლი ქვათაძე, გიორგი ქართველიშვილი, ლევან ჭავჭავაძე, გაგა გორგასლიძე, თევდორე მაჭარაშვილი, გაგა არაბული, დაჩი კოპაძე, გიორგი გეგია, თორნიკე ტურაშვილი, ფარნა გასვიანი, ლევან დარასელია, ვასილ ყველაიძე, ზვიად მაისურაძე, ვახტანგ ამირანაშვილი.
უკანა ხაზი: გიორგი ბეგაძე, ვახტანგ კავთიძე, გიორგი ტალახაძე, ლაშა გედეხაური, ზურაბ ძნელაძე, გიგა გაგოშვილი, ლევან გოგოლაშვილი, იოანე ხელაია, გიორგი შკინინი, ბექა წიკლაური.

ყოველდღიური სპორტული გაზეთი "ლელო"
358
მკითხველის კომენტარები / 0 /
მსგავსი ამბები
რუბრიკის სხვა სიახლეები