ორი დინამოელის ორი ინტერვიუ. ნიკა ნინუას იტალიის, ესპანეთისა და მეორე ბუნდესლიგის ვარიანტები აქვს. როგორ ახასიათებს ნოდარ იაშვილი ჩისკოს...

თბილისის  "დინამომ" საქართველოს ჩემპიონის ტიტული დაიბრუნა. რა თქმა უნდა, ჩემპიონობა არ იყო იოლი და მასში სამწვრთნელო შტაბის წევრების გარდა, ფეხბურთელებმაც შეიტანეს წვლილი...

"ლელო" გაესაუბრა დინამოელთა ნახევარდაცვის ლიდერ ნიკა ნინუას და მარჯვენა მცველ ნოდარ იაშვილს. მათ ვესაუბრეთ როგორც დასრულებულ პირველობაზე, ისე თბილისური კლუბის ევროპერსპექტივაზე...

ნიკა ნინუა: წავალ თუ დავრჩები, ამას ერთად გადავწყვეტთ!

- პირველ რიგში, როგორ აფასებთ დასრულებულ სეზონს?

- "დინამოსთვის" სეზონი წარმატებული გამოდგა. მოხარული ვარ, საქართველოს ჩემპიონობა რომ დავიბრუნეთ. ამას გულშემატკივარი კარგა ხნის განმავლობაში ელოდა. თავიდან, სეზონის დასაწყისში, ალბათ ბოლომდე არ გვესმოდა მწვრთნელის დავალებები. თანდათან, სამწვრთნელო შტაბის მითითებები ბოლომდე გავიგეთ. გუნდი შეკრული იყო ერთ მუშტად და შედეგიც მოვიდა.

- საჩემპიონო ბრძოლაზე რას იტყვით?

- ბრძოლა დაძაბული იყო. ბათუმის "დინამოსა" და "საბურთალოს" სახით ძალიან ძლიერი კონკურენტები გვყავდა. მიმაჩნია, რომ ამ ჩემპიონატში წინაზე მეტი დაძაბულობა იყო.

- როგორ ფიქრობთ, ახალგაზრდა ფეხბურთელს შეუძლია საქართველოს ჩემპიონატში პროგრესირება?

- არ მინდა, ვინმემ საკუთარი თავის ქებაში ჩამითვალოს, მაგრამ მგონია, რომ თამაშს მოვუმატე. ეს პროგრესი, და საერთოდ, რასაც დღეს წარმოვადგენ, თბილისის "დინამოსა" და საქართველოს ჩემპიონატის დამსახურებაა. მე ეს გზა გავიარე და აქედანაც დასტურდება, რომ ახალგაზრდა ფეხბურთელს ჩვენს ჩემპიონატში პროგრესის მიღწევა შეუძლია.

- "ფეიენოორდთან" შეხვედრას როგორ იხსენებთ?

- ნამდვილად შეგვეძლო, უკეთესი შედეგი დაგვედო. პირველი, გასვლითი შეხვედრა თუნდაც მინიმალურიუ სხვაობით რომ წაგვეგო, ვფიქრობ, თბილისში შევძლებდით შემოტრიალებას. გახსოვთ, იყო ამის რეალური შანსი. ფაქტია, ჩვენმა ახალგაზრდულმა გუნდმა დიდი გამოცდილება შეიძინა "ფეიენოორდის" დონის გუნდთან თამაშით.

- ვიცით, რომ თქვენ მიმართ არის ინტერესი უცხოური კლუბებიდან. მეორე მხრივ, "დინამოს" მოავალ სეზონში   ჩემპიონთა ლიგაზე მოუწევს ასპარეზობა...

- ნამდვილად არ არის ახლა გადაწყვეტილი, რა და როგორ იქნება მომავალში. არის იტალიური, ესპანური და პოლონური ვარიანტები, არის შემოთავაზება მეორე ბუნდესლიგის კლუბიდან... გააჩნია, როგორი წინადადებები იქნება... დავსხდებით "დინამოს" ხელმძღვანელობასთან ერთად და განვიხილავთ ყველაფერს. მათთან ერთად მივიღებ გადაწყვეტილებას.

- ახალგაზრდულ ნაკრებზე მინდა გკითხოთ, რომლის ერთ-ერთ ლიდერი ხართ...

- ჩვენ ყველა შეხვედრაში სული და გული ჩავდეთ. მგონი, ცუდად არ გვითამაშია. დანარჩენი სპეციალისტების შესაფასებელია. წინ მნიშვნელოვანი თამაშები გველის და უნდა გავახაროთ ქართველი გულშემატკივარი.

- რას იტყვით ეროვნულ ნაკრებში თქვენს შანსზე?

- რა თქმა უნდა, ყველა ფეხბურთელის ოცნებაა ნაკრებში თამაში და არც მე ვარ გამონაკლისი. მე მაქსიმუმს და კიდევ მეტს ვშრომობ. დანარჩენი მწვრთნელის გადასაწყვეტია...

ნოდარ იაშვილი: ...ვუთხარი, რომ აქ ჩემპიონობისთვის მოვედი!

- ჩემპიონები გავხდით და ეს ძალიან სასიხარულოა. ვიცი, როგორ ელოდა ამ ჩემპიონობას "დინამოს" გულშემატკივარი. როდესაც გუნდში მოვედი, სამწვრთნელო შტაბი გამესაუბრა და მკითხა, თუ რა იყო ჩემი მიზანი. მე ვუთხარი, რომ აქ მხოლოდ და მხოლოდ ჩემპიონობისთვის მოვედი. მიზანს მივაღწიეთ და ეს ყველას გვახარებს. ჩემთვის სასიხარულოა ისიც, რომ ზედიზედ ორჯერ გავხდი საქართველოს ჩემპიონი - ჯერ "საბურთალოში", მერე "დინამოში".

- რა იყო ის სიახლე, რომელიც გუნდში ახალმა სამწვრთნელო გუნდმა შემოიტანა?

- ძალიან უშუალო დამოკიდებულება იყო სამწვრთნელო შტაბსა და ფეხბურთელებს შორის. მინდორზე ყველამ თავისი საქმე იცოდა და დისციპლინა მაღალ დონეზე იდგა. ამასთან, მინდა ვთქვა, რომ ჩისკო ძალიან კარგი, უშუალო და ფეხბურთის ღრმად მცოდნე სპეციალისტია.

- ერთადერთი, რაც ცუდად გაგახსენდებათ დასრულებული სეზონიდან, "ფეიენოორდთან" მატჩია...

- ...არადა, შეიძლებოდა ამ გუნდთან წარმატებით თამაში. რა თქმა უნდა, ფეიენოორდი" სხვა დონის ჩემპიონატში თამაშობს და მთლიანობაში ჩვენზე წინაა, მაგრამ როტერდამში რომ მინიმალური ანგარიშით წაგვეგო, სახლში თავს შევაკლავდით, გულშემატკივრის განწყობაც სხვანაირი იქნებოდა... რატომღაც მგონია, რომ ამ ბარიერს გადავლახავდით. თუნდაც მეორე თამაში რომ ავიღოთ, მე იქ "ფეიენოორდის" უპირატესობა ვერ დავინახე.

- თუ იყო გუნდი, რომლის წინააღმდეგაც განსაკუთრებით გაგიჭირდათ თამაში?

- ასე ვერცერთს გამოვარჩევ... როცა საქმე თბილისის "დინამოს" ეხება, ყველა გუნდი გაორმაგებული მოტივაციით გამოდის სათამაშოდ. მათ შორის, აუტსაიდერებიც. მაგალითად, "ვიტ ჯორჯია" გავარდნილი იყო უკვე, მაგრამ ყველამ ვნახეთ, როგორ გვებრძოლა...

- თუ არის კომპონენტი, რომლის გამოსწორებასაც მომავალი სეზონისთვის ისურვებდით საქართველოს ჩემპიონატში?

- რამდენჯერმე ძალიან ცუდ მინდორზე მოგვიხდა თამაში. კარგი იქნება, თუ ამას მიექცევა ყურადღება. და კიდევ, ძალიან მინდა, რომ სტადიონის ტრიბუნებზე მეტი მაყურებელი იყოს.

- რას ნიშნავს ფეხბურთელისთვის მაყურებელი?

- ძალიან ბევრს, ყველაფერს!.. როცა სავსე ტრიბუნების წინაშე გადიხარ სათამაშოდ, სულ სხვანაირად ხარ მოტივირებული და საკუთარ თავს მეტს სთხოვ.

4373
მკითხველის კომენტარები / 0 /
მსგავსი ამბები
რუბრიკის სხვა სიახლეები
;