ორი დინამო და ორივე განახლებული შემადგენლობით... გადრანი აქ არის, კობახიძე,  ნადარაია და ფონიავა შესაძლოა... 

3 ივლისს ეროვნული ლიგის XXI ტურის ცენტრალური შეხვედრა გაიმართება. თბილისის “დინამო” ბათუმელ თანაკლუბელებს უმასპინძლებს.

ორივე გუნდი მატჩს განახლებული შემადგენლობით შეხვდება. ბათუმელებმა რამდენიმე ახალი ფეხბურთელი დაიმატეს და თავადაც რამდენიმეს შეელივნენ. “დინამოდან” წავიდნენ რატი ცაცკრიალაშვილი და გიორგი გადრანი.

ცნობილია, რომ ცაცკრიალაშვილი კარიერას იჯარით ბოლნისის “სიონში” გააგრძელებს. რაც შეეხება გადრანს, რომელმაც ბათუმელთა რიგებში 5 მატჩი ჩაატარა და გულშემატკივრებს თავი თბილისის “დინამოს” კარში გატანილი უმნიშვნელოვანესი გოლით დაამახსოვრა, მისი წასვლა მამუკა კობახიძის ტრანსფერმა გამოიწვია.

ცნობილი გახდა, რომ 24 წლის ცენტრალური მცველი ქუთაისის “ტორპედოში” ჩაირიცხა. ცნობილი მოვლენების გამო, “ტორპედოც” განახლების გზაზეა. როგორც ჩანს, ქუთაისში ახალგაზრდული გუნდი ეყოლებათ.

დღეს “ტორპედო” წყალტუბოს 26 მაისის სახელობის სტადიონზე თბილისის “ლოკომოტივს” უმასპინძლებს და კახა ჩხეტიანის ახალი გუნდის კონტურებიც გამოჩნდება. კლუბის პრეზიდენტ ზაზა ჩაჩავას თქმით, ბიუჯეტს შეამცირებს და სეკვესტრირებული “ტორპედო” ძველისგან საგრძნობლად განსხვავებული იქნება - შემადგენლობთაც და, დიდი ალბათობით, მიზნებითაც.

უკვე ვწერდით, რომ ლიდერების წასვლის შემდეგ ქუთაისურ კლუბში ცოტნე მოსიაშვილი და დავით იონანიძე მივიდნენ.

ქუთაისელები კიდევ რამდენიმე ტრანსფერს ამზადებენ. შევიტყვეთ, რომ გუნდთან ერთად ვარჯიშობს ოთარ კობახიძეც, რომელმაც თავი ბოლნისის “სიონსა” და თბილისის “ლოკომოტივში” თამაშით დაგვამახსოვრა. 23 წლის ნახევარმცველმა “ლოკომოტივის” ფორმით მიმდინარე სეზონში 18 მატჩი ჩაატარა და 1 გოლი გაიტანა. 

ამას გარდა, შესაძლოა, ქუთაისელთა რიგები მალე “საბურთალოს” მცველმა ცოტნე ნადარაიამ და “რუსთავის” ნახევარმცველმა პაპუნა ფონიავამაც შეავსონ. ეს უკანასკნელი ბოლო დროს მარცხენა მცველის პოზიციაზე თამაშობდა. 

ყოველდღიური სპორტული გაზეთი "ლელო"
833
მკითხველის კომენტარები / 0 /
მსგავსი ამბები
რუბრიკის სხვა სიახლეები
;