ბორჯღალოსნები. რის ხარჯზე მოვიგეთ რუმინეთში? [VIDEO]

რუმინეთი-საქართველო 9:18
რუმინეთი (15-9): მელინტე, ზახარია, ფერკუ, ვლაიკუ, ონუცუ, (პოპა 62) პლაი (ბუკური 75), კალაფეტეანუ (სურუჯუ 59); (1-8): მ. ლაზარი (ბადიუ 51, ურსაკე 62), ტურაშვილი (კაპაცანა 41), ურსაკე (გორდაში 51), ფან ჰირდენი (დ. ლაზარი 62), ანტონესკუ, მაკოვეი, იონი, გორენი (ლუკაჩი 63)
3ს: ვლაიკუ
სინბინი: კალაფეტეანუ

საქართველო (15-9): ხმალაძე, აფციაური (მოდებაძე 73), ძნელაძე, კვესელაძე, თოდუა, აბჟანდაძე, ლობჟანიძე (აფრასიძე 75); (1-8): გოგიჩაშვილი (მატარაძე 73), მამუკაშვილი (კარკაძე 73), გიგაშვილი (ჩილაჩავა 60), გიგაური (ჭეიშვილი 54), ნემსაძე,^ საღინაძე (თხილაიშვილი 60), ცუცქირიძე, გორგაძე.
2ლ: საჯარიმო, გორგაძე; 2ს: აბჟანდაძე
მსაჯი: შონ გალაჰერი (ირლანდია)

საქართველოს ნაკრებმა სტუმრად, კლუჟში რაგბი ევროპის ჩემპიონატზე უმთავრესი კონკურენტი რუმინეთის ნაკრები 18:9 დაამარცხა და ანთიმოზ ივერიელის თასი შეინარჩუნა.

„საინტერესო თამაში მოვიგეთ. მაქსიმალურად ვეცადეთ გაგვეხარებინა ის გულშემატკივარი, ვინც ტელევიზორიდან გვადევნებდა თვალს. მათ ერთ კვირაში ექნებათ შანსი, რომ სტადიონზე მოვიდნენ და იქ დაგვიჭირონ მხარი. გამარჯვებას და თასს მაყურებლის გარეშე აზრი არა აქვს და ყველას გელით „ავჭალაზე“ - ეს სიტყვები მატჩის შემდეგ საქართველოს ნაკრების კაპიტანმა გიორგი ნემსაძემ თქვა.

რუმინელებმა „ბორჯღალოსნებთან“ საასპარეზოდ ყველა საუკეთესოს უხმეს და მატჩისთვის განსაკუთრებული მონდომებით ემზადებოდნენ. გამოცდილებთან ერთად, მათ რამდენიმე ახალგაზრდაც ათამაშეს. თუმცა, გამოცდილებმა საინტერესო ვერაფერი გვიჩვენეს და ახალგაზრდებიც დიდად ვერ ბრწყინავდნენ. მათ მიერ მოგებული პირველი ტაიმი და აღებული ცხრა ქულა, მთლიანად საქართველოს ნაკრების მარტივი შეცდომების დამსახურებაა.

რუმინელებმა რამდენიმე დერეფანი მოგვიგეს. თუმცა, შერკინებაში ჩვენი ახალგაზრდა მორკინალების უპირატესობამ პირველი ნახევრის დასკვნით 15 წუთში სათამაშო უპირატესობა მოგვაპოვებინა. რამდენჯერმე ლელოს გატანაც შეგვეძლო, მაგრამ საბოლოოდ მხოლოდ სამ ქულას დავჯერდით. საჯარიმო თედო აბჟანდაძემ გაიტანა - 3:6. ასე დასრულდა პირველი ტაიმი.

შესვენების შემდეგ „ბორჯღალოსნები“ უფრო პრაგმატულად და ეფექტურად ათამაშდნენ. დაცვაში ყურადღებით გარჯის შედეგად მეტოქეს მხოლოდ ერთხელ მივეცით ლელოდან ხუთ მეტრში მოახლოვების საშუალება.

45-ე წუთზე კი მარცხენა ფრთაზე მეტოქის ხაზი მოედნის ცენტრთან ახლოს გარემარბმა გიორგი აფციაურმა გაჭრა, რომელიც ლელოდან ათიოდ მეტრში შეაჩერეს. წარმოქმნილი რაკიდან ბურთი მარჯვნივ გამოვათამაშეთ, მაგრამ ერთ ეპიზოდში რუმინელთა ცხრა ნომერმა ვილი კალაფეტიანუმ ჩვენი მგეზავი თედო აბჟანდაძე უბურთოდ შებოჭა და მატჩის არბიტრმა საჯარიმო ლელო ჩათვალა. არადა, იქამდე ბურთი გურამ გოგიჩაშვილმა დაამიწა ყველა წესის დაცვით მეტოქის ჩათვლის მოედანში. ეს მისი პირველი სანაკრებო ლელო იქნებოდა. არბიტრმა სხვაგვარად განსაჯა - 10:6.

მორიგი ლელოს გასატანად 20 წუთი დაგვჭირდა. ამჯერად „ბორჯღალოსნების“ ცხრა ნომერმა ვასილ ლობჟანიძემ იყოჩაღა. მან მოედნის საკუთარი ნახევრიდან ირბინა, ხაზი გაჭრა და რუმინელებმა საკუთარი 22-მეტრიანი ზონის ნიშნულთან შეაჩერეს. რაკიდან ბურთი შეცვლაზე შესულმა მესამეხაზელმა გიორგი თხილაიშვილმა გამოიტანა და მარჯვნივ ალექსანდრე თოდუას გადაწოდა, მან კი თედო აბჟანდაძე მონახა.

ახალგაზრდმა მგეზავმა შეტევაში გამოცდილი მეორეხაზელი გიორგი ნემსაძე ჩართო, რომელსაც კიდევ უფრო მარჯვნივ გიორგი ცუცქირიძე ელოდა, ვინც ერთი შეხებით კიდესთან მდგარი ბექა გორგაძე გარღვევაზე გაიყვანა, რომელმაც 22-მეტრიანი ზონის ხაზიდან ირბინა, გზად ორი რუმინელი მცველი გააბითურა და ბურთი ლელოში დაამიწა. აბჟანდაძეს გარდასახვა გაუცუდდა - 15:6.

რუმინელებმა ერთი კიდევ გაიბრძოლეს. 72-ე წუთზე ფლორინ ვლაიკუმ მესამე საჯარიმო გაიტანა. ანგარიშში სხვაობა ექვს ქულამდე შეამცირა 9:15 და თავის გუნდს მატჩის გადარჩენის შანსი დაუტოვა. თუმცა, ექვს წუთში თედო აბჟანდაძემ მას საჯარიმოთივე უპასუხა და გამარჯვება იმ გუნდს დარჩა, ვისაც უფრო ერგებოდა - 18:9.

I ტური
ბელგია-გერმანია 29:22
ესპანეთი-რუსეთი 16:14

თ მ ფ წ ბ ქ(ს)
1. საქართველო 1 1 0 0 +9 4(0)
2. ბელგია 1 1 0 0 +7 4(0)
3. ესპანეთი 1 1 0 0 +2 4(0)
4. რუსეთი 1 0 0 1 -2 1(1)
5. გერმანია 1 0 0 1 -7 0(0)
6. რუმინეთი 1 0 0 1 -9 0(0)

II ტური

16 თებერვალი
რუმინეთი-გერმანია
რუსეთი-ბელგია

17 თებერვალი
საქართველო-ესპანეთი

ყოველდღიური სპორტული გაზეთი "ლელო"
1766
მკითხველის კომენტარები / 0 /
მსგავსი ამბები
რუბრიკის სხვა სიახლეები
;