ორნი ზორიაში - არველაძემ უფლება გამოიყენა, მახარაძე ოფიციალურად დადასტურდა

რუსეთის აგრესიის დროს მშობლიური ქალაქიდან დევნილი ლუგანსკის "ზორია" უკრაინის პრემიერლიგაში მაინც წარმატებით თამაშობს.

დასრულებულ სეზონში, ლუგანსკელებმა მეოთხე ადგილი დაიკავეს და ევროპის ლიგაზე თამაშის უფლება ზედიზედ მეორედ მოიპოვეს.

შარშან გუნდის ღირსებას ჯაბა ლიპარტია იცავდა, რომელიც ახლა ქუთაისის "ტორპედოში" გამოდის. თუმცა, ევროგათამაშებაში ლუგანსკელები ქართველის გარეშე არც წელს ითამაშებენ - ახლახან, ევროპის ლიგაზე გასულ გუნდში ორი ქართველი ჩაირიცხა.

დესნა პრემიერლიგაში,
ტრიუმფატორი ლუგანსკში

ლევან არველაძემ ევროპის ლიგაზე გასულ ლუგანსკის "ზორიასთან" მაისის დასაწყისში 2,5-წლიანი კონტრაქტი გააფორმა. კლუბის ცნობით, ამ ვადის დასრულების შემდეგ ხელშეკრულების გაგრძელების პერსპექტივაცაა გათვალისწინებული. ჩერნიგოვის "დესნას" 25 წლის აწ უკვე ყოფილი მოთამაშე "ზორიას" 1 ივნისიდან შეუერთდება, როდესაც ჩერნიგოველებთან ხელშეკრულება ამოეწურება.

შეგახსენებთ, რომ უკრაინის პრემიერ ლიგაში გადასასვლელ პლეი ოფში, პირველი ლიგის მესამეადგილოსანმა ჩერნიგოვის "დესნამ" ორი მატჩის ჯამში პრემიერლიგის აუტსაიდერი "ზირკა" 5:1 დაამარცხა.

პირველი შეხვედრა 1:1 დასრულდა, სახლში კი ჩერნიგოველებმა მეტოქე 4:0 გაანადგურეს და უკრაინის პრემიერლიგაში გადავიდნენ. "დესნას" ამ წარმატებაში დიდი როლი არველაძემ ითამაშა, რომელმაც სტუმართა კარი 52-ე და 88-ე წუთზე ორჯერ აიღო. ეს "დესნაში" ქართველის ბოლო შეხვედრა იყო.

ლევან არველაძე თბილისში დაბადებულია და ცნობილი მწვრთნელის, თემურ ფოცხვერიას გაზრდილია. გიორგი დევდარიანი მას 17 და 19-წლამდელთა ნაკრებში სისტემატურად იწვევდა და ფლანგის შემტევ ნახევარმცველად ათამაშებდა, სანამ უკრაინის მოქალაქეობა არ მიიღო - ლაპარაკია იმ თაობაზე, სადაც თამაშობდნენ ვაკო ყაზაიშვილი, ლაშა პარუნაშვილი, გიორგი ჭანტურია, დავით სხირტლაძე, არჩილ ტვილდიანი, დავით ლეგაშვილი.

არველაძე უკრაინაში 13 წლის ასაკში გადავიდა და პროფესიული კარიერა ამ ქვეყანაში აიწყო: 2010 წელს დნეპროპეტროვსკის "დნიპროში" ჩაირიცხა, თამაშობდა "კრივბასში", "სკალაში", "აგრობიზნესში", "ნაფტოვიკ-უკრნაფტაში", "დესნაში" კი 2017 წელს გადავიდა და გუნდის ერთ-ერთი ლიდერი გახდა.

თავიდან შემტევი ნახევარმცველის პოზიციაზე თამაშობდა, მაგრამ ბოლო ორი წელია, რაც მარცხენა მცველის ამპლუაში დაასაქმეს. ამ კუთხით, საქართველოსთვის საინტერესო უნდა იყოს 25 წლის მცველი, რომელიც უკრაინის პრემიერლიგაში ითამაშებს.

უკრაინული გამოცემის თქმით, მისი პლუსი ისაა, რომ ორივე ფეხს, მარცხენას და მარჯვენას თანაბრად კარგად ხმარობს. სტატისტიკაც საინტერესო აქვს - "დესნაში" 29 მატჩი ჩაატარა და 6 გოლი გაიტანა, რაც კარგი სამაღლის მქონე (სიმაღლე 181 სმ, წონა - 71 კგ) მარცხენა მცველისთვის მშვენიერი შედეგია.

შეგახსენებთ, რომ არველაძე უკრაინის მოქალაქეა და ამ ქვეყნის ასაკობრივ ნაკრებში გამოსვლასაც სთავაზობდნენ.

მახარაძემ კლუბიც შეიცვალა

ახლახან გახსნილ სატრანსფერო პერიოდში ლევან არველაძე პირველი ქართველი არაა, რომელიც "ზორიაში" ჩაირიცხა - მანამდე ლუგანსკელებმა დონეცკის "ოლიმპიკის" მეკარე ზაურ მახარაძე გადაიბირეს. მან "ზორიას" თავისი მომავალი 3 წლით დაუკავშირა.

25 წლის მეკარე ზაურ მახარაძე ჯერ საქართველოს მოქალაქე გახდა, ახლა კლუბიც შეიცვალა - ეს ინფორმაცია მახარაძემ "ლელოსთან" ინტერვიუში ირიბად დაადასტურა, ახლა კი ტრანსფერის სრულყოფა უკრაინული კლუბის ოფიციალურმა ვებგვერდმა გამოაცხადა.

"მახარაძეს უკრაინელი გულშემატკივარი ყურმოკვრით არ იცნობს. ის დიდი ხნის მანძილზე დონეცკის "ოლიმპიკის" ლიდერი იყო და დონეცკურ გუნდში პირველი ნომერი მყარად დაიჯავშნა დასრულებულ სეზონში, მახარაძემ "ოლიმპიკში" 26 მატჩი ჩაატარა, რომელშიც 33 გოლი გაუშვა და 9 მატჩში კარი "მშრალად" შეინახა" - წერს "ზორიას" ოფიციალური გვერდი.

შეგახსენებთ, რომ უკრაინაში დაბადებულ მახარაძეს საქართველოს პასპორტი 24 მაისს გადასცეს და ახლა ქვეყნის ეროვნულ გუნდთან ერთად ავსტრიულ შეკრებაზე უახლოესი ორი ამხანაგური მატჩისთვის ემზადება.

ერთი სიტყვით, არის შანსი, რომ ევროპალიგაზე გასულ ლუგანსკის გუნდში ორი ქართველი ვიხილოთ. აღსანიშნავია, რომ დღემდე "ზორიამ" მხოლოდ ეს ორი ტრანსფერი განახორციელა.

ყოველდღიური სპორტული გაზეთი "ლელო"
1278
მკითხველის კომენტარები / 0 /
მსგავსი ამბები
რუბრიკის სხვა სიახლეები
;