ოფიციალურად: ლეონარდო ჟარდიმი მონაკოს მწვრთნელი აღარ არის

"მონაკომ" ოფიციალურად დაადასტურა ის, რაც ბოლო დღეებში ჭორის სახით გავრცელდა - 44 წლის ლეონარდო ჟარდიმი ამ გუნდის მთავარი მწვრთნელის პოსტიდან დაითხოვეს.

რა თქმა უნდა მიზეზი ცუდი შედეგებია - მონეგასკები გასავარდნ ზონაში არიან, რაც თითქოს წარმოუდგენელია იმ გუნდისგან, რომელიც 2016/17 წლების სეზონში ქვეყნის ჩემპიონი გახდა და ითამაშა ჩემპიონთა ლიგის ნახევარფინალში.

მაგრამ, მეორე მხრივ, კილიან მბაპეს, თომა ლემარისა და ბერნარდო სილვას წასვლის შემდეგ "მონაკო" წელში ვეღარ გაიმართა და ახლა არის იქ, სადაც არის - ჟარდიმის აწ უკვე ყოფილმა კრებულმა მიმდინარე ლიგა 1-ში პირველი და ჯერჯერობით უკანასკნელი გამარჯვება (3:1 სტუმრად "ნანტთან") 11 აგვისტოს, პირველ ტურში მოიპოვა...

ვენესუელაში დაბადებული, წარმოშობით კი პორტუგალიელი ჟარდიმი "მონაკოს" მთავარ მწვრთნელად 2014 წლიდან მუშაობდა. მის ყველაზე რეალურ შემცვლელად ფრანგული და მსოფლიო ფეხბურთის ვარსკვლავი ტიერი ანრი სახელდება.

მისი ბოლო სამუშაო ადგილი ბელგიის ნაკრები იყო. რუსულ მუნდიალზე ის გუნდის მთავარ მწვრთნელ რობერტო მარტინესს ეხმარებოდა. ახლახან მას "ასტონ ვილას" თავკაცობა შესთავაზეს ჯონ ტერისთან კომპანიაში, მაგრამ უარი თქვა - ეტყობა, იმიტომაც, რომ "მონაკოში" დამოუკიდებლად მუშაობის პერსპექტივა უფრო ხიბლავს.

118
მკითხველის კომენტარები / 0 /
მსგავსი ამბები
რუბრიკის სხვა სიახლეები