ოქროს ბიჭები და იმედები - ვინ ითამაშებს ჩემპიონთა ლიგაზე?

სულ მალე საქართველოს ნაკრები ერთა ლიგის გათამაშებაში ჩაერთვება. რა თქმა უნდა, ყველას გვჯერა, რომ ვლადიმირ ვაისის გაწვრთნილ გუნდს ჯგუფშიც და პლეი ოფშიც წარმატებით თამაში შეუძლია.

ისიც ფაქტია, რომ ეროვნული გუნდის კარგი თამაში მნიშვნელოვნად იქნება დამოკიდებული თითოეული ფეხბურთელის სათამაშო კონდიციებზე.

სექტემბრამდე არც ისე დიდი დროა დარჩენილი და თამამად შეგვიძლია ვთქვათ, რომ ასეთი ნაყოფიერი სეზონი ქართველ ლეგიონერებს კარგა ხანია, არ ჰქონიათ. თუნდაც, ჩემპიონთა ლიგა, ევროპის ყველაზე წარმომადგენლობითი ტურნირი რომ ავიღოთ, მივხვდებით, რომ პროგრესი თვალსაჩინოა.

რა თქმა უნდა, ვისურვებდით მეტსაც, თუმცა რაც ამ ეტაპზე გვაქვს, ცუდი ნამდვილად არ არის. ევროპული ფეხბურთის მთავარი საკლუბო ტურნირის ჯგუფურ ეტაპზე ქართული კლუბის გასვლა ჯერაც უტოპიად მოჩანს.

სამაგიეროდ, არ გვექნება იმ გუნდების ნაკლებობა, რომელთაც შეგვიძლია, ვუქომაგოთ - გუნდებს, რომელთა შემადგენლობაშიც ჩვენებურები თამაშობენ...

ჩემპიონთა ლიგა: ნერვიულობა
არ აგვცდება!

როცა საქმე ჩემპიონთა ლიგას ეხება, ქართველ გულშემატკივარს სანერვიულო ისედაც ბლომად აქვს. ზოგი "ბარსელონას" ქომაგობს, ზოგი "რეალს", ზოგი "მანჩესტერს", ზოგიც "ბაიერნსა" თუ "იუვენტუსს". ახლა კი იმ კლუბების გამოსვლაზეც მოგვიწევს ნერვების წყვეტა, რომლებშიც ქართველები ითამაშებენ.

რუსეთის ჩემპიონი გახდა მოსკოვის "ლოკომოტივი". ერთია ჩვენი სურვილი და მეორე რეალობა, მაგრამ აშკარაა - ამ ეტაპზე "რკინიგზული" კლუბის ხელმძღვანელობა საბა კვირკველიას გამშვებს არ ჰგავს. ეს იმის მიუხედავად, რომ საქართველოს ნაკრების ერთ-ერთმა ლიდერმა სეზონი მართლაც რომ ერთი ამოსუნთქვით ჩაატარა.

კვირკველიას მიმართ არის ინტერესი და ეს სავსებით ბუნებრივია. რომ არა მისი შესანიშნავი თამაში, "ლოკომოტივის" ეს ჩემპიონობა, შეიძლება, არც ყოფილიყო. მეორეც - იური სიომინი თუნდაც ევროპული მასშტაბით ავტორიტეტული სპეციალისტია და მის სიტყვას ფასი აქვს. ის შანსს არ უშვებს, ჩვენებური შეაქოს, მადლიერება გამოხატოს მის მიმართ...

მეორე მომენტია ის, რომ ჩემპიონთა ლიგაზე სტარტის წინ კლუბის ხელმძღვანელობას გულშემატკივრები ნამდვილად ვერ გაუგებენ, თუკი ერთ-ერთ ლიდერს, გამორჩეულ ფეხბურთელს შეელევიან.

ის კი არა, ლიგაზე გასული "ლოკომოტივი" მნიშვნელოვნად აპირებს შემადგენლობის გაძლიერებას - რუსული მედია იმასაც კი ვარაუდობს, რომ "ლოკომოტივში" რამდენიმე ძალიან ცნობილი ფეხბურთელიც შეიძლება გამოჩნდეს. ასეა თუ ისე, რუსულ რკინიგზას ფული ნამდვილად არ აკლია.

მართალია, ჯერ ოფიციალურად არა, მაგრამ უკრაინის ჩემპიონის ტიტული ჯიბეში უდევს დონეცკის "შახტარს". სხვა სცენარით დონეცკელებმა ორივე თამაში უნდა წააგონ, კიევის "დინამომ" კი პირიქით. დარჩენილ ორ ტურში 5-ქულიანი ფორა პაულო ფონსეკას გუნდისთვის წარმატების გარანტიაა. არ შეიძლება, ეს ამბავი არ გვახარებდეს, რადგან დონეცკელთა შემადგენლობაში ორი ჩვენებური ფეხბურთელი თამაშობს - დავით ხოჭოლავა და გიორგი არაბიძე.

აქედანვე შეიძლება იმის თქმა, რომ "შახტარი" შეინარჩუნებს ძირითად ბირთვს და მომავალ საფეხბურთო წელსაც უფრო "ბრაზილიური გუნდი" იქნება, ვიდრე "ევროპულ-უკრაინული". ამის მიუხედავად, ხოჭოლავა გუნდისთვის მეტად საჭირო ფეხბურთელია. როცა აუცილებელია, თამაშს ძირითადში იწყებს, თუ არა და, შეცვლაზე შედის და ასე ეხმარება გუნდს.

პრაქტიკულად გამოვრიცხავთ, გუნდიდან ხოჭოლავას წასვლის საკითხი დადგეს დღის წესიგში. ის კი არა, იმის იმედიც გვაქვს, რომ მომავალ სეზონში გაცილებით მეტი სათამაშო პრაქტიკა ექნება - როგორც ჩემპიონთა ლიგაში, ისე უკრაინის პირველობაზე.

აი, არაბიძის საკითხი კი აშკარად დასაფიქრებელია. ის კარგად უნდა დააკვირდეს წინასასეზონო პერიოდს. ალბათ ბევრი რამ იმაზე იქნება დამოკიდებული, დარჩება თუ არა ფონსეკა "შახტარის" მთავარი მწვრთნელის პოსტზე. ცხადად ჩანს, რომ პორტუგალიელი სპეციალისტი მაინცდამაინც დიდი ხალისით არ ენდობა ახალგაზრდა ფეხბურთელებს.

არაბიძე კი უკვე იმ ასაკშია, როცა კიდევ ერთი სეზონი "შახტარის" დუბლებში დამღუპველი შეიძლება აღმოჩნდეს მისი კარიერისთვის. თუ ის შეატყობს, რომ ძირითად გუნდში არც ამჯერად აწინაურებენ, მაშინ დონეცკური კლუბიდან წასვლაზე უნდა დაფიქრდეს.

მან ითამაშა საქართველოს ყველა ასაკობრივ ნაკრებში. მას ძალიან პატარა ასაკში ჰქონდა დებიუტი ეროვნული გუნდის რიგებში და აუცილებლად გამოჩნდებიან კლუბები, რომლებიც მისი სამსახურით დაინტერესდებიან.

ერთი აუცილებლად უნდა დაიწეროს: თუ გაზრდა და წინსვლა უნდა, არაბიძის მომავალი გუნდი არამც და არამც არ უნდა იყოს "შახტარის" მოსატელიტო რომელიმე უკრაინული კლუბი. იმ შემთხვევაში, თუ ის არ დარჩება "შახტარში", მაშინ სხვა ჩემპიონატში უნდა გადაბარგდეს.

ჩემპიონთა ლიგის ჯგუფში უნდა ითამაშოს ჯანო ანანიძის "სპარტაკმაც". თუ ის თანაქალაქელ "დინამოს" დაამარცხებს რუსეთის ჩემპიონატის ბოლო ტურში, ამისკენ გზა ხსნილი ექნება. ჯანო ახლა ტრავმას იშუშებს, მაგრამ შემოდგომაზე უკვე მწყობრში იქნება.

ვისურვოთ ერთი: ანანიძის პოტენციალი მომავალ საფეხბურთო სეზონში სრულად გამოვლინდეს და ხელი არ შეუშალონ ტრავმებმა. ასეთ შემთხვევაში, ჯანოს ყველანაირი საფუძველი ექნება საიმისოდ, რომ ევროპის ყველაზე პრესტიჟულ ტურნირში "სახალხო გუნდში" ერთ-ერთი წამყვანი პოზიცია დაიჭიროს.

ჩემპიონთა ლიგაში იასპარეზებს ვახტანგ ჭანტურიშვილის "ტრნავა". რა თქმა უნდა, ამ გუნდს გაუჭირდება ჯგუფში მოხვედრა, მაგრამ სლოვაკური კლუბები ყოველთვის შეკრულ, ორგანიზებულ გუნდებად გვევლინებიან ევროთასებზე და ეს "ტრნავას" შემთხვევაშიც, ალბათ, იქნება.

იმის თქმა კი აქედანვე შეიძლება, რომ ჭანტურიშვილი, როგორც სლოვაკეთის ჩემპიონატში, ჩემპიონთა ლიგაშიც გუნდის ერთ-ერთი ლიდერი იქნება. ეს არის მორიგი დიდი გამოწვევა ჭანტურიშვილისთვის, ვინც წესით ახალი და უფრო ხმაურიანი ნაბიჯი უნდა გადადგას კარიერაში.

ჩემპიონთა ლიგაზე ვიხილავთ ირაკლი ძარიასაც. თავის დროზე, ის შეუცვლელი ფეხბურთელი იყო "ზესტაფონისთვის", რომელმაც კინაღამ დიდი და ზღაპრული ევროპული ისტორია დაწერა. მერე იყო თბილისის "დინამოში" გატარებული პერიოდი, რის შემდეგაც ფეხბურთელის კარიერა როგორღაც დაღმართზე დაეშვა.

მოულოდნელად, ძარიას გამოუჩნდა ალბანეთის ერთ-ერთ საუკეთესო კლუბ "კუკესიში" გადასვლის შანსი და, რა თქმა უნდა, მან ეს შანსი გამოიყენა. უმოკლეს ხანში ის ალბანური კლუბის ერთ-ერთ წამყვან ფეხბურთელად იქცა და ბელგიური ჟუპილერლიგის მავანი გუნდის ინტერესიც დაიმსახურა.

"კუკესი" ალბანეთის ჩემპიონი ვერ გახდა, მეორე ადგილი დაიკავა ჩემპიონატში, მაგრამ რადგან "შკენდერბეუს" ჩემპიონთა ლიგაში ასპარეზობა აკრძალული აქვს უეფას მიერ, ევროპის ყველაზე წარმომადგენლობით ტურნირში სწორედ "კუკესი" ითამაშებს, მაგრამ ეს ჯერ ოფიციალურად უნდა გამყარდეს - ჩემპიონატის დასრულებამდე 3 ტურით ადრე ძარიას გუნდი 9 ქულით უსწრებს მესამეადგილოსან "ლუფტეტარის" და დარჩენილ თამაშებში ქულაც ჰყოფნის მიზნის მისაღწევად.

თუნდაც მხოლოდ "შკენდერბეუს" მაგალითი რომ ავიღოთ, ბოლო წლებში ალბანური კლუბები მიეჩვივნენ ჩემპიონთა ლიგასა და ევროპის ლიგაზე წარმატებით (რა თქმა უნდა, მათი საზომით) თამაშს. სამწუხაროა, მაგრამ ისიც უნდა ვაღიაროთ, რომ დღეს მათი საკლუბო ფეხბურთი ჩვენებურზე წინ არის.

ევროპალიგის
ეშხი

თუნდაც წლევანდელმა სეზონმაც დაადასტურა, რომ მართალია, ჩემპიონთა ლიგას ვერ დაეტოლება, მაგრამ თავისი ეშხი ევროპალიგასაც აქვს.

ქართველებს ნერვიულობა არც ამ ტურნირის მსვლელობისას აგვცდება.ჯერ ერთი, რომელიმე ქართული კლუბის მოხვედრა ევროპალიგის ჯგუფში მეტად რეალურია, ვიდრე ჩემპიონთა ლიგაზე. და მეორეც, ქართველი ფეხბურთელები ყველანაირად ეცდებიან, თავი გამოიჩინონ საკუთარ კლუბებში, რათა მერე ეს ტურნირი ტრამპლინად გამოიყენონ.

დიდი ალბათობით, ვენის "რაპიდი" ვერ დაეწევა "შტურმს" და, შესაბამისად, ვერ ითამაშებს ჩემპიონთა ლიგის საკვალიფიკაციო ეტაპზე. სამაგიეროდ, ევროპალიგაზე ვნახავთ გუნდს, რომელსაც გიორგი ქვილითაიას გამო ვქომაგობთ.

თუ ჩვენებურმა ფორვარდმა ამჟამინდელი სათამაშო ფორმა შეინარჩუნა, შეტევაში პრობლემები არც "რაპიდს" ექნება და არც საქართველოს ნაკრებს - ერთა ლიგაზე.

ცალი ფეხით ევროპალიგაზეა გურამ კაშიას "ვიტესი". რა თქმა უნდა, ქართველი მცველი, რომელიც უკვე იქცა არნემული კლუბის ლეგენდად, შეუცვლელი ფიგურაა ჰოლანდიური გუნდისთვის.

"ვიტესის" შემადგენლობა ისედაც კარგია და, ალბათ, კიდევ უკეთესი გახდება მწვრთნელად ლეონიდ სლუცკისა და "ჩელსიდან" დამატებული რამდენიმე ფეხბურთელის ხარჯზე.

მართალია, "ორდაბასი" და ჯაბა ჯიღაური ევროპის რანგით მეორე ტურნირზე ვეღარ ითამაშებენ, მაგრამ სამაგიეროდ, იქ ვიხილავთ "ტობოლს" და ორ ქართველს - საქართველოს ნაკრების ორ მნიშვნელოვან ფიგურას - ჯაბა კანკავასა და ნიკა კვეკვესკირს.

ამავე ტურნირზე უნდა ითამაშოს სანდრო კობახიძისა და ანდრო გიორგაძის "ვორსკლამაც". თუ მოვლენები ჩვენთვის სასურველი სცენარით განვითარდა, აქვე უნდა ვნახოთ გიორგი ჩაკვეტაძის "გენტიც".

შანსი აქვს გიორგი მერებაშვილის "პლოცკსაც", ოღონდ - მცირე. რა თქმა უნდა, ჩვენი ქომაგობა არ მოაკლდება ვაკო გვილიას "ლუცერნს".

ასე რომ, მსოფლიოს ჩემპიონატის დასრულების შემდეგ ახალი გამოწვევების წინაშე დავდგებით და ევროტურნირებზე ქართული კლუბების გარდა, იმ გუნდებსაც ვუქომაგებთ, რომელთა ღირსებასაც ჩვენებურები იცავენ.

ყოველდღიური სპორტული გაზეთი "ლელო"
1647
მკითხველის კომენტარები / 0 /
მსგავსი ამბები
რუბრიკის სხვა სიახლეები
;