[ოქროს ფონდი] ლეგენდების კვალდაკვალ, ძალოსანი დიტო შანიძე

1973 წლის 18 სექტემბერი და უკვე იმხანად "თავისუფლების კუნძულად" წოდებული კუბა; მისი დედაქალაქი ჰავანა და სპორტის სასახლე "სიიუდად დეპორტივა" მსოფლიოს ჩემპიონატს მასპინძლობენ ძალოსნობაში, სადაც წარმატებით გამოდის მაშინდელი საბჭოთა კავშირის ძალოსანი დიტო შანიძე, ვინც ორჭიდში მოპოვებული 272.5 კგ-ით (120+152.5) მსოფლიოს ჩემპიონი გახდა.

ამ დროს ის 36 წლის გახლდათ და წყალტუბოს ზონის სოფელ დერჩიდან ამ წარმატებამდე საკმაოდ რთული გზა გაიარა. მართალია, იყო მიღწევებიც: ორი ვერცხლი ოლიმპიადებზე - მეხიკოსა და მიუნხენში, მცირე ოქრო მსოფლიოს ჩემპიონატზე - 1969 წელს, აკვრაში, ევროპის ჩემპიონობა 1972 წელს, ყოფილი საბჭოთა კავშირის პირველობა კი 6-ჯერ მოიგო, მაგრამ მას მაინც უიღბლოს და "მარად მეორეს" სახელი ჰქონდა, რადგან მთავარ შეჯიბრებებზე ლამის მუდმივად ხელი ეცარებოდა. ცალკეულ მოძრაობებში ჰავანაშიც აჯობეს კონკურენტებმა, მაგრამ ის მაინც ყველაზე სტაბილური იყო და ორჭიდშიც ამან მოუტანა გამარჯვება.

ქართულ ძალოსნობას ამ დროს უკვე ჰქონდა მსოფლიოს ჩემპიონის ორი ტიტული, რომელსაც ლამის 20 წლით ადრე რაფაელ ჩიმიშკიანი დაეუფლა. თუმცა მთლად ამას ვერ დავაბრალებ, მაგრამ რატომღაც მის ჩემპიონობას იმდროინდელ საზოგადოებაში დიდი გამოხმაურება არ მოჰყოლია - "ლელოც" კი ძალზე ლაკონური სტატიით შემოფარგლულა.

დიტო შანიძე 2010 წელს გარდაიცვალა. 8 დეკემბერს მისი დაბადების დღე იყო...

გაზეთი "ლელო", 19 სექტენბერი, 1973 წელი
ყველაფერი გადაწყვიტა ნურიკიანისა და შანიძის დუელმა

ჰავანა, 18 სექტემბერი, პირველივე საბჭოთა ძალოსანმა, რომელიც სპორტის სასახლე "სიიუდად დეპორტივას" ფიცარნაგზე მსოფლიო პირველობისთვის ბრძოლაში ჩაება, ოქროს მედალი მოიპოვა. ეს იყო 36 წლის თბილისელი ვეტერანი დიტო შანიძე, რომელიც გუშინ ჭეშმარიტად ახალგაზრდული ენერგიითა და გატაცებით ასპარეზობდა.

მან თავის საპატიო წოდებებს ქვემსუბუქ წონაში მსოფლიო ჩემპიონობაც დაუმატა, როცა ორჭიდის ჯამში 272.5 კგ (120+152.5) დააგროვა. დღემდე შანიძეს მოპოვებული ჰქონდა გამარჯვებები კონტინენტური მასშტაბის შეჯიბრებებში, მაგრამ მსოფლიოს ჩემპიონატებში და ოლიმპიურ თამაშებში ვერცხლის ჯილდოებს სჯერდებოდა.

ამჯერად თბილისელმა ათლეტმა მტკიცედ გადაწყვიტა გამარჯვება და მიაღწია კიდეც მიზანს. მან 5 კგ-ით ჩამოიტოვა 25 წლის ბულგარელი ათლეტი, მიუნჰენის ოლიმპიადის ჩემპიონი ნ, ნურიკიანი.

ბრინჯაოს მედალი ხვდა პოლონელ ი. ვოინოვსკის - 257.5 კგ.

პირველ მოძრაობაში - ატაცში ყველას აჯობა უნგრელმა ი. ბენედეკმა, რომელმაც ოქროს მედალი მოიპოვა - 122.5. მაყურებლების დიდი მოწონება დაიმსახურა იაპონელმა კ. ხირაიმაც, რომელმაც მეოთხე დამატებითს ცდაზე მსოფლიო რეკორდი დაამყარა - 126 კგ. შანიძემ 120 კგ აიტაცა, რითაც ვერცხლის ჯილდო უზრუნველყოფილი ჰქონდა. მაგრამ ამჯერად ქართველი ძალოსანი თანახმა არ იყო მეორე როლზე, მით უმეტეს, რომ ნურიკიანი მასთან უკვე 5 კგ-ით აგებდა.

ბოლო ვარჯიშმა - აკვრამ პრეტენდენტთა წრე შეავიწროვა. ფინიშზე ხელი მოეცარათ იმავე ბენედეკს, ძლიერ ავსტრიელ ძალოსან პიტნერს, შეჯიბრება დაბალი შედეგით - (142.5) დაამთავრა ვოინოვსკიმაც.

ყველაფერი ნურიკიანისა და შანიძის "დუელმა" გადაწყვიტა. ბულგარელმა ათლეტმა ისღა შეძლო, რომ აკვრაში მეტოქის შედეგი გაიმეორა - 152.5. მიუნჰენის ოლიმპიადის ჩემპიონმა ოქროს მედალი მიიღო მხოლოდ აკვრაში, ვინაიდან წონით შანიძეზე ცოტა ნაკლები აღმოჩნდა.

2737
მკითხველის კომენტარები / 0 /
მსგავსი ამბები
რუბრიკის სხვა სიახლეები