[ოქროს ფონდი] ქეთევან ლოსაბერიძე... ისრები მიქრიან ქარდაქარ

ქართულ სპორტს ბევრი წარმატებული ათლეტი ჰყავს, მშვილდოსნობაში მოსკოვის ოლიმპიადის ჩემპიონი ქეთევან ლოსაბერიძე კი ერთ-ერთი გამორჩეულია.

თუმცა არა მარტო მათ შორის - ევროპას ქალთა მშვილდოსნობაში სხვა ოლიმპიური ჩემპიონი არა ჰყავს. ვაჟებში ევროპელები ტოლს არ უდებენ აზიელებს და ამერიკელებს, ქალებში კი აზია, უფრო კონკრეტულად - სამხრეთი კორეა ლიდერობს, თუმცა მათ ჰეგემონიაში დისონანსი ქართველმა ჩუბინმა შეიტანა.

სხვათა შორის, მოსკოვიდან მოყოლებული, მთელი 20 წელიწადი ოლიმპიადებს მხოლოდ კორეელები იგებდნენ, ვიდრე მათი ჰეგემონია პეკინში არ დაამხო ისევ ჩინელმა ჭანმა.

ტყიბულში დაბადებული ლოსაბერიძე 5 წლის იყო, როცა დედა გარდაეცვალა, ობოლი გოგო კი მშვილდოსნობას ქუთაისში, პედაგოგიურ ინსტიტუტში სწავლისას ეზიარა, როცა პირველკურსელი გოგო სავარჯიშოდ მშვილდოსნობის პატრიარქმა შალვა ჯაშიაშვილმა წაიყვანა სასროლეთზე.

მან წარმატებები თავიდანვე მოიპოვა: გახდა ევროპისა და ყოფილი საბჭოთა კავშირის ჩემპიონი პირად-გუნდურში, მსოფლიოს პირველობა კი ორჯერ მოიგო გუნდურში.

ოლიმპიადაზე ის მთავარ ფავორიტად მიუნხენში მიიჩნეოდა 1972 წელს, მაგრამ მეოთხე ადგილზე დარჩა და მხოლოდ ქულა წააგო ბრინჯაოს მედალოსანთან.

1975 წელს ყველა გააკვირვა, როცა ევროპისა და მსოფლიოს ჩემპიონი საკუთარი განცხადებით წავიდა საკავშირო ნაკრებიდან, მიზეზი კი ოჯახური მდგომაროება იყო - წინა წელს გათხოვდა და დედობისთვის ემზადებოდა... სპორტში 1978 წელს დააბრუნეს და როგორც მერე, მოსკოვში გაირკვა, თურმე ამით ერთი ოლიმპიური ოქროც დაგვიბრუნებია.

არადა, მოსკოვში ყოფილი საკავშირო გუნდის ფავორიტად ნატალია ბუტუზოვა მიიჩნეოდა, ლოსაბერიძე კი კინაღამ პოლიტიკურ ინტრიგებს შეეწირა: გუნდში შეყვანილს მაინც დაუნიშნეს საკონტროლო სროლები უზბეკ ოლღა როგოვასთან.

ბუნებრივია, ქართველმა ჩუბინმა დიდი უპირატესობით აჯობა მას, ამ დამატებითმა ბარიერმა კი, როგორც მოგვიანებით თავად იხსენებდა, მასზე დოპინგივით იმოქმედა, რაც მოსკოვშიც დადასტურდა: ლოსაბერიძემ 1980 წლის 3 აგვისტოს არა მარტო ბუტუზოვას და ქალებს აჯობა, არამედ ვაჟთა ჩემპიონზე, ფინელ ტომი პოიკოლაინენსაც აჯობა (2455 ქულა).

იმავე წელს ლოსაბერიძე საქართველოს საუკეთესო სპორტსმენად დაასახელეს, ხოლო XX საუკუნის საუკეთესო სპორტსმენთა გამოკითხვაში IV ადგილზე გავიდა.

ლოსაბერიძე ამჟამადაც აქტიურადაა ჩართული მშვილდოსნობაში და ფედერაციაში მუშაობს, პარალელურად კი თსუ-ში ეწევა პედაგოგიურ საქმიანობას.

გაზეთი "ლელო", 1980 წლის 3 აგვისტო
ქეთევან ლოსაბერიძე ოლიმპიური ჩემპიონია

...ისრები მიქრიან ქარდაქარ

ალბათ, არც ერთ შეჯიბრებას ისე არ ამჩნევს თავის დაღს ქარი, როგორც - მშვილდოსნობას. და თამაშების დღეებში არც ერთ სარბიელზე არ ქროდა ისეთი ქარი, როგორც ეს მშვილდოსანთა ასპარეზობისას იყო - მესამე დღეს კრილატსკოეში იგი განსაკუთრებით მძვინვარებდა.

მიუხედავად ამისა, კვლავ მშვიდად დაიწყო ასპარეზობა ლიდერმა ქეთევან ლოსაბერიძემ, თუმცა კაცმა რომ თქვას, 6-ქულიანი უპირატესობა ასეთ პირობებში დიდი ვერაფერი "სიმდიდრეა".

დილის პროგრამა, რომელიც ითვალისწინებდა 70 მეტრზე სროლას, ჩვენმა ჩემპიონმა კვლავ ოსტატურად წარმართა: 282 ქულა მოაგროვა და უკვე 10 ქულით დაწინაურდა, ბუტუზოვას მხოლოდ 278 ქულა ჰქონდა.

...ქარი კი თავისას არ იშლიდა - სახეში სცემდა მოასპარეზეებს, რომლებიც ნაშუადღევს 60 მეტრიან დისტანციაზე გამოვიდნენ. ამ დროს მშვილდოსნებს რამდენჯერმე გადაუარა თავზე შვეულმფრენმა, საიდანაც საბჭოთა ოპერატორები კრილატსკოეში მიმდინარე მშვილდოსანთა და ნიჩბოსანთა სტარტებს იღებდნენ მოსკოვის დიდი ოლიმპიადის ფილმისთვის.

თუ ეს კადრები ამ სურათში შევა, დიქტორი, ალბათ, იტყვის: "ასე ისროდა ქეთევან ლოსაბერიძე - მოსკოვის ოლიმპიადის... მედლის მფლობელი". ნეტავ ვიცოდეთ, რა სახის მედალი იქნება ეს? ნერვები მომართული მშვილდივით დაგვეძაბა ყველას, სუნთქვა გვეკვროდა, როდესაც ქეთევანი "ათიანებს" უმიზნებდა.

წარმოგვიდგენია, რა დღეში იყო ამ დროს თვით სპორტსმენი, თუმცა გარეგნულად ვერაფერს შეატყობდით.

მაგრამ რა ხდება? N 1 ფარზე, რომელზეც ჩვეულებრივ, ქეთევანი ისროდა, ისრები "მიმოიფანტა" - "6", "7", "9". ეს ხომ მთელი 8 ქულის დაკარგვაა?

ბუტუზოვა გაცილებით უკეთ ისვრის - "10", "10", "9". კიდევ ერთი სერიაც და 2 ქულით წინაა ლოსაბერიძის მთავარი მეტოქე. ქეთევანს 1684 ქულა აქვს, მაგრამ 210 ისრის სროლის შემდეგ ქართველი სპორტსმენი კვლავ ჯაბნის მეტოქეს - ბუტუზოვას 1786 ქულა შეუგროვდა, ლოსაბერიძეს - 3-ით მეტი.

ამასობაში ლიდერებს საგრძნობლად მიუახლოვდა მესამე ადგილზე მყოფი ფინელი პ. მერილუოტო, რომელიც აქამდე საბჭოთა წყვილს 40 ქულით ჩამორჩებოდა.

მსაჯები თვლიან 60 მეტრიდან სროლის შედეგებს: ლოსაბერიძე - 304 ქულა, ბუტუზოვა - 306, მერილუოტო - 317. ამრიგად, ასპარეზობის უკანასკნელი დღის წინ (50 და 30 მ) ლოსაბერიძეს 1843 ქულა ჰქონდა და 8 ქულით უსწრებდა ბუტუზოვას, რომელიც, თავის მხრივ, 15 ქულით აჭარბებდა ფინელი სპორტსმენის შედეგს.

ოლიმპიური ტაბლო.
2 აგვისტო. მშვილდოსნობა. ქალები. აბსოლუტური პირველობა
ქ. ლოსაბერიძე - 2491, ნ. ბუტუზოვა (ორივე - სსრკ) - 2477, პ. მერილუოტო (ფინეთი) - 2489, ზ. პადევეტოვა (ჩსსრ) - 2405, ო. გუანგ სონი (კორეის სახალხო-დემოკრატიული რესპუბლიკა) - 2401, კ. ფლორისი (ჰოლანდია) - 2382.

1412
მკითხველის კომენტარები / 0 /
მსგავსი ამბები
რუბრიკის სხვა სიახლეები