გიორგი კანდელაკი - დამოუკიდებელი საქართველოს პირველი მსოფლიოს ჩემპიონი

როგორც ცხოვრების ნებისმიერ სფეროს, ქართული სპორტის ისტორიასაც ამშვენებს გამორჩეული მოვლენები. ერთ-ერთი ასეთია მოკრივე გიორგი კანდელაკის მიღწევა, ვინც 1997 წლის ოქტომბერში დამოუკიდებელი საქართველოს პირველი მსოფლიოს ჩემპიონი გახდა.

მანამდე საქართველო რამდენჯერმე მივიდა ამ ტიტულთან ერთი ხელის გაწვდენაზე, მაგრამ ბედი თურმე ამ აღიარებას კანდელაკისთვის ინახავდა.

სხვათა შორის, მას 4 წლით ადრეც შეეძლო მოვლენებისთვის დასწრება, როცა 1993 წელს მსოფლიოს ჩემპიონატის ფინალში გავიდა, მაგრამ ლეგენდარულ კუბელ ფელიქს სავონთან დამარცხდა. იმავე წელს თავისუფალ ჭიდობაში ლუკა კურტანიძე, 1994-ში ბერძნულ-რომაულ ჭიდობაში ბაკურ გოგიტიძე, 1995-ში - ძიუდოისტი გიორგი ვაზაგაშვილი, 1997-ში ასევე ძიუდოისტი გიორგი რევაზიშვილი და სხვებიც გავიდნენ მსოფლიოს ჩემპიონატის ფინალში, მაგრამ ბედის ნებიერი კანდელაკი აღმოჩნდა, მხოლოდ მან მოიქნია მუშტი საჩემპიონედ.

თავიდან კანდელაკი ქვემძიმე წონაში - 91 კილოგრამში გამოდიოდა, სადაც მის კარიერას ბედისწერასავით სდევდა კუბელი სავონი - მსოფლიოს ექვსგზის ჩემპიონი და ყველაზე ტიტულოვანი მოჩხუბარი მოყვარულებში, მაგრამ 1997 მსოფლიოს პირველობის წინ, რომელსაც ბუდაპეშტმა უმასპინძლა, წონამომატებულმა ქართველმა მოკრივემ მძიმე წონაში აინაცვლა და თავის ისე იგრძნო, როგორც შევარდენმა - ჰაერში.

ბუდაპეშტურ რინგზე მან თანმიმდევრობით დაამარცხა გერმანელი ვიტალი ბოტი (ქულებით), ჩეხი პეტრ ჰორაჩეკი - ნოკაუტით, კანადელი ჟან-ფრანსუა ბერჟერონი და ნახევარფინალში - რუსი სერგეი ლიახოვიჩი (ორივე - ქულებით), ფინალში კი კუბელი ალექსის რუბალკაბა 4:1 დაამარცხა.

სტატია გაზეთ "ლელოში" (N 85; 29-31 ოქტომბერი, 1997 წელი):

"მსოფლიოს ჩემპიონის ტიტულის მოპოვება სპორტის ყველა სახეობაში საამაყოა, მაგრამ კრივში - განსაკუთრებით. ახლა ჩვენ ერთით მეტ სპორტის სახეობას ვითვლით, სადაც მსოფლიოს ჩემპიონი გვყავს და ერთით ნაკლები გახდა ის სახეობები, სადაც ეს დიდი სპორტული ტიტული ჯერ კიდევ არ მოგვიპოვებია!

ქართველი მოკრივე გიორგი კანდელაკი მსოფლიოს ჩემპიონია! კობა გოგოლაძე - ბუდაპეშტში გამართული ამ ასაპრეზობის მესამე პრიზიორია! ვულოცავთ.

გიორგი კანდელაკმა ფინალური პაექრობა ქულებით 4:1 მოუგო კუბელ მძიმეწონოსან ალექსის რუბალკაბას.

ოქროს მედლები ასე განაწილდა: რუსეთი - 4, კუბა - 3, უნგრეთი - 2, საქართველო, უზბეკეთი და რუმინეთი - თითო. ახლა ამ უმაღლესი ჯილდოს წყალობით საქართველო III-IV ადგილებს იყოფს მსოფლიოში".

რედაქტორის კომენტარი: "ასე მქუხარედ დამოუკიდებელი საქართველო სპორტში ჯერ არავის განუდიდებია. მეტიც, ჩვენი ქვეყანა ახლა იქნებ სწორედ კრივმა და გიორგი კანდელაკმა უფრო ახლოს გააცნო სამყაროს.

6 წელიწადზე მეტია, სპორტის ოლიმპიურ სახეობაში არ გვყოლია მსოფლიოს ჩემპიონი. დასაბამიდან დღემდე კი საქართველო ჯერაც არ იცნობდა თავის ჩემპიონს სპორტის ამ სახეობაში. კრივი კი ანტიკური ოლიმპიური თამაშების შემადგენელიც იყო და იმ ხანებში მუშტით პაექრობა უცხო არც ჩვენი შორეული წინაპრებისთვის ყოფილა. სიმბოლურია, რომ პირველი ხნული თავის სამშობლოს სახელთან წილნაყარმა ათლეტმა გაავლო, რითაც ეს წარმატება კიდევ უფრო შთამბეჭდავი გახადა.

შიდა ქართლი ქვეყნის ბურჯი იყო ისტორიულად და ეს, პირველ ყოვლისა, ითქმის მის რჩეულ ადამიანებზე. გორიც და ვარიანიც ამ მხრივ განსაკუთრებულია. ამიერიდან ვარიანს ღირსეულ მამულიშვილებთან ერთად გიორგი კანდელაკის სახელითა და ღვაწლითაც მოიხსენიებენ.

დღეს ჩვენ სრულად შეიძლება, კიდევ ვერ გაგვიაზრებია ვარიანელი რაინდის წარმატება. მომავალი მის დამსახურებას გაცილებით უკეთ დააფასებს. საერთოდ, ასეთია ერის რჩეულთა ხვედრი.

გიორგი კანდელაკის ადრინდელმა წარმატებებმა კრივისადმი ლტოლვა და სიყვარული ვარიანს და მთელ რაიონს მოსდო. მოზარდებისა და ახალგაზრდების საწადელის ამხდენი რაკი სხვა არავინ იყო, გიორგიმ მათ დაოსტატებას თავად მოჰკიდა ხელი. წარმოიდგინეთ, იგი ბოლო ხანებში თავადვე იყო თავისი თავის მწვრთნელი და შეგირდებთან ერთად იწვრთნებოდა რინგზე. ასე იქცა ვარიანი ქართული კრივის ერთ საიმედო ცენტრად.

ახლა? ახლა წარმოუდგენელიც კია, რა მოხდება - სოფლის კრივის ერთი სკოლა რაღას აუვა მსურველებს. ამიტომ ვაცხადებთ, ვისაც ქართულ სპორტზე შესტკივა გული, ახლა ეძლევა ბრწყინვალე შესაძლებლობა, საქმით დაამტკიცოს ამ სიყვარულის ჭეშმარიტება. ყველაზე კარგი მომენტია საიმისოდ, რომ კრივის სკოლები გაიხსნას შიდა ქართლის სხვა რაიონებში და სოფლებშიც. სპეციალისტები კი უთუოდ წავლენ სამუშაოდ. მათი საერთო კონსულტანტი თვით მისი აღმატებულება, მსოფლიოს ჩემპიონი იქნება.

არა, ვერც სპორტის სახელმწიფო დეპარტამენტი და ვერც ჩვენი რომელიმე სპორტული საზოგადოება ამას ფინანსურად ვერ შეძლებს. მხოლოდ ფირმები და ბიზნესმენები თუ გაიღებენ მოწყალებას, სულაც იქნება ადგილებზე გამოინახოს ამის შესაძლებლობა.

ერთი რამ ყველამ კარგად დავიმახსოვროთ, დღეს ჩვენ თითქმის ისეთსავე ანალოგიურ მოვლენასთან გვაქვს საქმე, როცა ამ 35 წლის წინათ ნონა გაფრინდაშვილმა ჩვენი ჭადრაკის ისტორიაში პირველმა მოიპოვა მსოფლიოს ჩემპიონობა, მერე კი რაც მოხდა, ამ გამარჯვებამ რა გზებით გვატარა და სადამდე მიგვიყვანა, ყველამ კარგად იცის. თუნდაც დღევანდელი დღე აიღეთ, ნონას იმ ბრწყინვალე წარმატებიდან ათეული წლების შემდეგ, ჭადრაკის სამყარომ პირველად დააპირისპირა ერთმანეთს მამაკაცები და ქალები ვაჟთა მსოფლიოს გუნდურ ჩემპიონატში და ადრე რაც თითქმის წარმოუდგენელი იყო, მხოლოდ ქართველ ქალთა ავტორიტეტით იქცა რეალობად,

დიახ, ქართული კრივი დღეს დიდ გზაზეა შემდგარი, მედროშეც ჭეშმარიტად სამაგალითო რაინდი ჰყავს. "ლელო" მოუწოდებს სპორტის მესვეურებს, ბიზნესმენებს, ყველას, ვისაც მაღალი სპორტული წარმატებები ეროვნულ სიამაყედ მიაჩნია, ამ აღფრთოვანებას ისე ნუ გავანელებთ, რომ ისტორიაში გარდა სტატისტიკისა, არაფერი დარჩეს. სწორედ ახლა გადაუდებლად უნდა შემუშავდეს საქართველოში კრივის განვითარების ეროვნული პროგრამა და გამოინახოს მისი რეალიზაციის შესაძლებლობები".

3238
მკითხველის კომენტარები / 0 /
მსგავსი ამბები
რუბრიკის სხვა სიახლეები